ەلىمىزدىڭ بەس ءوڭىرى قىسقى مال ازىعىن دايىنداپ ۇلگەرمەي جاتىر

اۋىل شارۋاشىلىعى مينيسترلىگىندە جەمشوپپەن قامتاماسىز ەتۋ جانە جەدەل ارەكەت ەتۋدى ۇيلەستىرۋ جونىندەگى جەدەل شتابتىڭ كەزەكتى وتىرىسى ءوتتى.

جەرگىلىكتى اتقارۋشى ورگانداردىڭ جەدەل دەرەكتەرىنە سايكەس رەسپۋبليكا بويىنشا ءشوپ دايىنداۋ 20،7 ملن توننانى نەمەسە جوسپارلانعان كولەمنىڭ 82،7%-ن قۇرادى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«ءشوپ قورى بويىنشا كوشباسشىلار تۇركىستان (100،9%)، قوستاناي (100،0%)، جامبىل (97،2%)، سولتۇستىك قازاقستان (93،1%) جانە اقمولا (92،7%) وبلىستارى بولىپ تابىلادى.

رەسپۋبليكالىق دەڭگەيدەن ەداۋىر تومەن كورسەتكىشتەر پاۆلودار (38،1%)، شىعىس قازاقستان (57،2%)، اتىراۋ (57،9%)، باتىس قازاقستان (58،8%) جانە اباي وبلىستارىندا ساقتالىپ وتىر»، - دەپ جازدى اشم-نان.

ۆيسە-مينيستر الماتى، اتىراۋ، قاراعاندى، پاۆلودار جانە ۇلىتاۋ وبلىستارى اكىمدىكتەرىنىڭ جىل باسىنان بەرى جەمشوپ دايىنداۋدى سۋبسيديالاۋعا قاراستىرىلعان 11،7 ملرد تەڭگە سۋبسيديا كولەمىنە قوسىمشا 10،1 ملرد تەڭگە بولەتىنىن حابارلادى.

وبلىس اكىمدىكتەرىنە قىستايتىن جەرلەرگە جەم دايىنداۋ جانە تاسىمالداۋ جۇمىستارىن جانداندىرۋدى، سونداي-اق، جەكە قوسالقى شارۋاشىلىقتاردى ازىقپەن قامتاماسىز ەتۋدى باقىلاۋدا ۇستاۋ، بۇل رەتتە باعانىڭ نەگىزسىز وسۋىنە جول بەرمەۋ جونىندە شارالار قابىلداۋ تاپسىرىلدى.

سونىمەن قاتار، فەرمەرلەردى جەمشوپ دايىنداۋ جۇمىستارى كەزىندە جەڭىلدىكتى ديزەل وتىنىمەن قامتاماسىز ەتۋ ماسەلەسى تالقىلاندى. ۇلىتاۋ وبلىسىنىڭ اكىمدىگىنە جەم دايىنداۋعا بولىنگەن ارزانداتىلعان ديزەل وتىنىنىڭ كولەمىن تولەۋ جانە ىرىكتەۋ جونىندە قاجەتتى شارالار قابىلداۋ جۇكتەلدى.