اتىراۋدان الەم ەلدەرىن جاياۋ ارالاۋعا شىققان اقساقال گرۋزياعا جەتتى.
ۇلىتاۋ وبلىسىنىڭ تۋماسى سارسەنباي قوتىراشوۆ گرۋزيا رەسپۋبليكاسىنا جەتكەنىن ءىnstagram الەۋمەتتىك جەلىسىندە ءبولىستى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«كەشە گۋداۋريدەگى قوناقۇيگە قوندىم. مۇندا ءقوناقۇي، مەيرامحانا كوپ، ازىق-تۇلىك دۇكەنىن كورمەيسىڭ. جولى ىلدي، شۇعىل بۇرىلىستار بار. مىنە، مەن ءقازىر تاۋدىڭ باۋرايىندا كەتىپ بارا جاتىرمىن. جولدىڭ ءبىر جاعى – جار، ءبىر جاعى – ىلدي»، -دەيدى ەگدە جاستاعى ساياحاتشى سارسەنباي قوتىراشوۆ.
گۋداۋري – گرۋزيانىڭ استاناسى – تبيليسيدەن 120 شاقىرىم قاشىقتىقتاعى كەنت. وعان تبيليسيدەن كولىكپەن 2 ساعاتتا جەتۋگە بولادى.
ساياحاتتاۋ ەشقاشان كەش ەمەس دەيتىن 73 جاستاعى اقساقال 2 تامىزدا اتىراۋدان جولعا شىققان ەدى.
ەگدە جاستاعى ساياحاتشى جاياۋ ساپارىن 2025 جىلدىڭ تامىزىندا اياقتاۋدى جوسپارلاعان. ەكى جىلعا سوزىلاتىن جاياۋ ساپارى ءۇش كەزەڭگە بولىنگەن.
ءبىرىنشى كەزەڭىندە قازاقستان، رەسەي، گرۋزيا، تۇركيا ەلدەرىنە 100 كۇندە جەتۋ. اتالعان ەلدەرگە دەيىنگى قاشىقتىق 3 مىڭعا جۋىق شاقىرىمدى قۇرايدى.
ال، ەكىنشى كەزەڭدە تۇركيا، فرانسيا، اقش ەلدەرىنە 180 كۇندىك ساياحاتىن باستايدى. بۇل ەلدەردى ارالاۋ ءۇشىن 9 مىڭ شاقىرىمنان استام جول جۇرەدى.
ءۇشىنشى كەزەڭدەگى ساپارىندا اقش پەن قىتايعا، موڭعولياعا بارادى. ودان سوڭ رەسەي ارقىلى قازاقستانعا ورالۋدى كوزدەپ وتىر. اقش-تان قازاقستانعا جەتكەنگە دەيىنگى 130 كۇندە 4 مىڭ شاقىرىمنان اساتىن جولدى ارتقا تاستايدى.
«مەنىڭ ۇستانىمىم – ساياحاتتاۋ ەشقاشان كەش ەمەس. الەم ەلدەرىن جاياۋ ارالاعان قازاق قارياسىنىڭ اتىن گيننەستىڭ رەكوردتار كىتابىنا تىركەپ، الەمدىك رەكورد ورناتسام دەيمىن. ەڭ باستىسى، بەيبىتشىلىكتى ناسيحاتتاپ، جاھان ەلدەرىن ىنتىماققا شاقىرعىم كەلەدى»، -دەگەن ەدى سارسەنباي قوتىراشوۆ.