«قازاەروناۆيگاسيا» رمك كاسىبي دايىنداۋ ورتالىعىندا 15 قاراشادا جاڭا وقۋ-جاتتىعۋ قۇرىلعىسى كەشەنى ىسكە قوسىلدى.
ول اۋە قوزعالىسىنا قىزمەت كورسەتۋ ديسپەچەرلەرىنىڭ العاشقى دايىندىعى مەن جاتتىعۋلارىن وتكىزۋگە ارنالعان، دەپ حابارلايدى aqshamnews.kz كولىك مينيسترلىگىنە سىلتەمە جاساپ.
اقش ءوندىرىسىنىڭ «Air Traffic Simulation and Voice Technologies» جاتتىعۋ كەشەنىن «قازاەروناۆيگاسيا» رمك تاپسىرىسى بويىنشا اۋە قوزعالىسىن باسقارۋدى مودەلدەۋ جۇيەسىن الەمدىك ازىرلەۋشى UFA Inc. قۇرعان.
ول بولاشاق ديسپەچەرلەردىڭ باستاپقى دايارلاۋدان ءوتىپ قانا قويماي، جۇمىس ىستەيتىن ديسپەچەرلەردىڭ كاسىبي دەڭگەيىن ارتتىرۋعا مۇمكىندىك بەرەدى.
كەشەننىڭ تەحنيكالىق مۇمكىندىكتەرى اۋەايلاقتاعى اۋە ترافيگى مەن جەردەگى جاعدايدى يميتاسيا جاساۋعا مۇمكىندىك بەرەدى.ال جاساندى ينتەللەكت وقۋ بارىسىندا پيلوتتى الماستىرا الادى جانە راديوبايلانىسقا جي شىعادى. سونداي-اق كەشەننىڭ فۋنكسياسىنا ۆيرتۋالدى شىنايىلىقتى مودەلدەۋ كىرەدى، بۇل اۆياديسپەچەردىڭ شىنايى جۇمىس ورنىن بارىنشا قايتالاۋعا مۇمكىندىك بەرەدى.
جاڭا وقۋ-جاتتىعۋ قۇرىلعىسى كەشەنى جۇيەسىنە جۇكتەلگەن اەروناۆيگاسيالىق كارتالار رەسپۋبليكانىڭ قولدانىستاعى اۋەايلاقتارى مەن اۋە كەڭىستىگىن يميتاسيالايدى. قازىرگى تاڭدا بۇل جابدىققا قازاقستاندا دا، ورتا ازيادا دا بالاما جوق.
2023 جىلدىڭ قورىتىندىسى بويىنشا «قازاەروناۆيگاسيا» رمك كاسىبي دايىنداۋ ورتالىعىندا 291 ادام جاتتىعۋ كەشەنىندە دايارلاۋدان ءوتتى. اعىمداعى جىلدىڭ 9 ايىندا وسىنداي دايىندىقتان 192 ادام ءوتتى. جاڭا ترەناجەر ورتالىق نۇسقاۋشىلارىنا بولاشاق جانە جۇمىس ىستەپ تۇرعان اۋە قوزعالىسىنا قىزمەت كورسەتۋ ديسپەچەرلەرىن ەكى ەسە كوپ وقىتۋعا مۇمكىندىك بەرەدى.
ايتالىق، كاسىبي دايىنداۋ ورتالىعى يكاو TRAINAIR PLUS Gold باعدارلاماسىنىڭ تولىققاندى قاتىسۋشىسى مارتەبەسىنە يە قازاقستان رەسپۋبليكاسىنداعى جالعىز اۆياسيالىق وقۋ ورتالىعى. بۇگىندە كدو باسشىلىعى ءوز الدىنا يكاو TRAINAIR PLUS Platinum مارتەبەسىنە قول جەتكىزۋ جانە قازاقستاننىڭ عانا ەمەس، ورتالىق ازيا مەن تمد-نىڭ اۆياسيا سەكتورىنداعى جەتەكشى وقۋ ورتالىعىنا اينالۋ مىندەتىن قويىپ وتىر