نورۆەگيا — قازاقستان ماچىنىڭ باستى وقيعالارى
نورۆەگيا قۇراماسى قازاقستاندى 5:0 ەسەبىمەن ويسىراتا جەڭىپ، ماچتىڭ باستى كەيىپكەرى ەرلينگ حوللاند حەت-تريك جاسادى، دەپ حابارلايدى aqshamnews.kz.
قازاقستان قۇراماسى چەرچەسوۆتىڭ باسشىلىعىمەن قاتارىنان بەسىنشى رەت جەڭىلىپ، ۇلتتار ليگاسىنىڭ ۆ ليگاسىن ءساتسىز اياقتادى. قۇراما بۇل تۋرنيردە بار بولعانى ءبىر عانا ۇپاي جيناپ، بىردە-بىر گول سوعا المادى. ءقازىر چەرچەسوۆتىڭ جاعدايى قيىنداپ بارادى، ال ونىڭ وتستاۆكاسى تۋرالى پىكىرتالاستار ۇدەي تۇسۋدە.
قازاقستان قۇراماسى نەگە گول سوعا المادى؟
چەرچەسوۆقا باعىتتالعان سىننىڭ باستى سەبەبى — قارسىلاستاردىڭ جوعارى دەڭگەيى ەمەس، قازاقستان قۇراماسىنىڭ شابۋىل ۇيىمداستىرا الماۋىندا. گول سوعۋ بىلاي تۇرسىن، قۇراما ءقاۋىپتى ساتتەر دە جاساي الماي وتىر.
ماسەلەلەردىڭ نەگىزگى سەبەپتەرى:
- جىلدام فلانگتاردىڭ جوقتىعى. قازاقستان قۇراماسىنىڭ قارسى شابۋىلدارى ءتيىمسىز.
- شابۋىلشىنىڭ السىزدىگى. دوپتى ۇستاپ، شابۋىل ۇيىمداستىرا الاتىن سەنىمدى شابۋىلشى جوق.
- فيزيكالىق دايىندىقتىڭ جەتكىلىكسىزدىگى. قۇراما قارسىلاستىڭ الاڭىندا پرەسسينگ جاساي المايدى.
- جەكە قاتەلىكتەر مەن ءجيى دوپ جوعالتۋلار. بۇل پوزيسيالىق شابۋىلدار قۇرۋعا كەدەرگى كەلتىرەدى.
- ستاندارتتىق جاعدايلاردىڭ ازدىعى. بۇرىشتامالار مەن ايىپ دوبىنان ءقاۋىپتى ساتتەر جاساۋ سيرەك كەزدەسەدى.
چەرچەسوۆتىڭ قورعانىسى تاعى سىر بەردى
قازاقستان قۇراماسىنىڭ قورعانىسى جەكە قاتەلىكتەردەن كوز اشپادى. بىردە دوپ جوعالتىپ، بىردە تۋرا پاسپەن قارسىلاسقا مۇمكىندىك بەرىپ، حوللاند العاشقى گولىن سوقتى.
ەكىنشى گولدى نورۆەگيالىق شابۋىلشى باسپەن قاقپاعا ءدال باعىتتاسا، ءۇشىنشى گول تاعى قورعانىستىڭ قاتەلىگىنەن كەيىن ورىن الدى. ءتورتىنشى جانە بەسىنشى گولدار دا ماچتىڭ تاعدىرىن شەشىپ قانا قويماي، چەرچەسوۆقا سىن ايتۋشىلاردىڭ دالەلىن كۇشەيتە ءتۇستى.
حوللاندتىڭ "قارۋى" تابىلمادى
ماچتا ەرلينگ حوللاند چەرچەسوۆقا العاشقى كەزدەسۋ ءۇشىن "ەسەسىن قايتاردى". سول كەزدە ويىن 0:0 ەسەبىمەن تەڭ اياقتالعان ەدى. تىلشىلەر باس باپكەردەن نورۆەگيالىق شابۋىلشىنى قالاي توقتاتۋعا بولاتىنىن سۇراعان بولاتىن.
— گۆارديولا حوللاندتى ءتىپتى تاپانشامەن دە توقتاتۋ مۇمكىن ەمەس دەپ ايتقان، — دەدى جۋرناليستەر.
— جاقسى، ونىڭ بۇل قارۋدىڭ ءتيىمسىز ەكەنىن ايتىپ بەرگەنى دۇرىس بولدى. ەندى سەنىمدىرەك قارۋ، اكم قولدانامىز، — دەپ ازىلدەگەن ەدى چەرچەسوۆ.
الايدا بۇل جولى دا "قارۋ" تابىلمادى. حوللاند قازاقستان قۇراماسىنىڭ قورعانىسىن تولىقتاي جەڭدى.
چەرچەسوۆ نەگە قىزمەتىنەن بوساتىلمادى؟
قازاقستان قۇراماسى ۇلتتار ليگاسىنىڭ ۆ ليگاسىنان ءساتسىز شىقتى. ءبىراق چەرچەسوۆتىڭ وتستاۆكاسى تالاپ ەتىلمەدى. مۇنىڭ ەكى نەگىزگى سەبەبى بار.
- فورمالدى مىندەتتەردىڭ بولماۋى. باپكەرگە بۇل تۋرنيردە ناقتى ماقسات قويىلماعان ەدى. ول قۇرامانى 2026 جىلعى الەم چەمپيوناتىنا دايىنداۋ ءۇشىن شاقىرىلعان بولاتىن. ۇلتتار ليگاسى جاڭا كوماندانى سىناۋ الاڭى رەتىندە قاراستىرىلدى.
- شەشىمدى قابىلدايتىن باسشىنىڭ جوقتىعى. جەرگىلىكتى فۋتبول فەدەراسياسىنىڭ بۇرىنعى باسشىسى چەرچەسوۆتى شاقىرىپ، قولداعان ەدى. الايدا ول قىزمەتىنەن كەتكەن. ال جاڭا پرەزيدەنت جەلتوقساننىڭ ورتاسىندا عانا سايلانباق.
چەرچەسوۆپەن كەلىسىمشارت مەرزىمىنەن بۇرىن بۇزىلسا، 1 ميلليون ەۋرو كولەمىندە وتەماقى تولەۋ قاجەت. بۇل دا باپكەردىڭ ورنىندا قالۋىنا اسەر ەتۋدە.
الدا 2026 جىلعى الەم چەمپيوناتىنا ىرىكتەۋ كەزەڭى بار. قازاقستان قۇراماسىنىڭ جانكۇيەرلەرى بۇل سىناقتا كوماندانىڭ دەڭگەيىن كورسەتەتىنىنە ءۇمىت ارتادى.