قىركۇيەكتىڭ ءۇشىنشى جەكسەنبىسىندە الماتىدا قالا كۇنى مەرەكەلەنەدى. بيىل مەرەكەگە وراي بالالارمەن قاتار، ەرەسەكتەرگە دە قىزىقتى بولاتىن 150-دەن استام ءارتۇرلى فورماتتاعى ءىس-شارا جوسپارلانعان. ءاربىر ءىس-شارا ءوزىنىڭ ءستيلى مەن مازمۇنىنا قاراي «الماتى – ءبىزدىڭ ورتاق ءۇيىمىز»، «الماتى – اسەم قالا»، «الماتى – تازا قالا» ۇعىمى ارقىلى قالا تۇرعىندارى مەن قوناقتارىن بىرىكتىرەدى، دەپ حابارلايدى aqshamnews.kz.
مادەني-كوپشىلىك شارالار اشىق اسپان استىندا اباي اتىنداعى الاڭدا (رەسپۋبليكا سارايىنىڭ الدىندا)، استانا الاڭىندا (قبتۋ الدىندا)، ارباتتا، تۇڭعىش پرەزيدەنت ساياباعىندا، م.گاندي اتىنداعى ساياباقتا، «الاتاۋ» تەاترىنىڭ الدىنداعى الاڭدا، «كوكتوبە» ساياباعىندا، Family Park ساياباعىندا، گۇلدەر ساياباعىندا جانە الماتىلىقتاردىڭ سۇيىكتى دەمالىس ورىندارىنا اينالعان بىرنەشە لوكاسيادا وتەدى. ولاردىڭ باسىم دەنى حالىققا تەگىن ۇيىمداستىرىلادى. تەك تەاترلاردا، شاپيتو سيركىندە نەمەسە جابىق عيماراتتاردا وتەتىن قويىلىمدارعا بيلەت الۋ قاجەت بولادى.
مەرەكەلىك ءىس-شارالار اياسىندا وركەسترلەر، تەاتر ارتيستەرى، تانىمال انشىلەر قالا ىشىندە ارنايى اۆتوبۋسپەن ءجۇرىپ وتەدى. ولار ايالدامالارعا، كوپقاباتتى ۇيلەردىڭ اۋلاسىنا جانە اشىق الاڭدارعا توقتاپ، تۇرعىنداردى پەرفورمانسپەن تاڭعالدىرادى. الماتىلىقتار مەن قالا قوناقتارى مەرەكەلىك شارالارعا اياق استىنان قاتىسىپ قالۋى مۇمكىن، ويتكەنى ارتيستەر ءجۇرىپ وتەتىن شىعارماشىلىق باعىت الدىن الا حابارلانبايدى.
سونىمەن قاتار، الماتى كۇنىن تويلاۋ كەزىندە قالاداعى مەترو ناعىز ونەر الاڭىنا اينالادى. مۇندا جونگلەرلەر، اكروباتتار، سيمفونيالىق جانە دجاز وركەسترلەرى ونەر كورسەتەدى. مەترو بەكەتتەرىندە قالا مۋزەيلەرى، كىتاپحانالارى جانە مەملەكەتتىك ارحيۆ ۇيىمداستىرعان ۇلكەن كورمە وتەدى. جەر استى كولىگىنىڭ جولاۋشىلارى جول-جونەكەي ەكسپوناتتارمەن تانىسىپ، اۋەزدى اۋەن تىڭداپ، قىزىقتى كىتاپتار وقي الادى.
قالاداعى ءار اۋداندا «ءۇي ماڭىنداعى ساۋىق-كەشتەرى» ۇيىمداستىرىلادى. اشىق الاڭدا ۇلكەن ەكراندار ورناتىلىپ، قالا تۇرعىندارى مەن قوناقتارى كەشكى ۋاقىتتا تاريحي، كلاسسيكالىق جانە انيماسيالىق فيلمدەر تاماشالاپ، كاراوكەدە ءان ايتا الادى. جوباعا بەلگىلى ارتيستەر دە قاتىسىپ، تۇرعىندارمەن بىرگە كاراوكە ايتادى.
الماتىلىقتار مەن قالا قوناقتارى ءتۇرلى اۋديتورياعا باعىتتالعان اۋقىمدى كونسەرتتەر تاماشالاي الادى. مىسالى، كلاسسيكالىق مۋزىكا اۋەسقويلارى سيمفونيالىق وركەسترلەردىڭ قويىلىمىن تاماشالاپ، ۇلكەن شىعارماشىلىق ۇجىمداردىڭ ورىنداۋىنداعى ساف ونەرگە كۋا بولادى. دجازسۇيەر قاۋىمعا دا ارنايى كونسەرت ۇيىمداستىرىلادى، ال رەترو مۋزىكا اۋەسقويلارى «ساعىندىم الماتىمدى» سىندى رەترو كەشىن تاماشالاي الادى.
جالپى قىركۇيەك ايىنىڭ سوڭىنا دەيىن اۋقىمدى مادەني باعدارلاما ازىرلەنگەن. الماتىلىقتاردى العاشقىلاردىڭ ءبىرى بولىپ «دوس-مۇقاسان» قۇتتىقتايدى. اتى اڭىزعا اينالعان ءانسامبلدىڭ كونسەرتى 11 قىركۇيەكتە ساعات 19:00-دە «الاتاۋ» ءداستۇرلى ونەر تەاترىنىڭ الدىندا (نۇركەنت شاعىن اۋدانى، 6) وتەدى. ودان كەيىن ءدال وسى الاڭدا ساعات 20:00-دە «مۋزارت» توبىنىڭ كونسەرتى باستالادى. كىرۋ تەگىن.
سونىمەن قاتار، 11 قىركۇيەك ساعات 19:00-دە ارباتتا «الماتى ماحابباتىم» اتتى تەاترلاندىرىلعان كونسەرت وتەدى. «جاڭا عاسىر» تەاترىنىڭ ارتيستەرى رەترو اندەر مەن پوەزيا ارقىلى ميۋزيكل جانرىنداعى ەركىن شىعارماشىلىق اتموسفەراعا بولەمەك.
12 قىركۇيەكتە «الاتاۋ» ءداستۇرلى ونەر تەاترىنىڭ الدىندا ساعات 18:00-دە (نۇركەنت شاعىن اۋدانى، 6) «ۇلى دالا ءۇنى» كونسەرتتىك باعدارلاماسى وتەدى. حالىق الدىندا Ulytau تانىمال ەتنو-روك توبى ونەر كورسەتەدى. شىعارماشىلىق ۇجىم تىڭدارمانداردى زامانعا ساي وڭدەلگەن تانىمال كومپوزيسيالارمەن تاڭعالدىرادى. Ulytau — بۇل باتىس پەن شىعىس مادەنيەتتەرىنىڭ ۇيلەسىمى، جانە الەمدە تەڭدەسى جوق اسپاپتىق جوبا. سكريپكانىڭ اسەرلى ءۇنى دومبىرانىڭ اۋەزدى موتيۆىمەن ۇيلەسىپ، ەلەكترلى گيتارادان اسەم اۋەن بولىپ توگىلەدى. كىرۋ تەگىن.
12-15 قىركۇيەك ارالىعىندا پانفيلوۆ كوشەسىندەگى ارباتتا ساعات 10:00-دەن 20:00-گە دەيىن الماتى كىتاپحانالارى «كىتاپ وقۋعا ساياحات» اتتى كۆەست وتكىزەدى. سونىمەن قاتار، 14-15 قىركۇيەكتە ساعات 11:00-دەن باستاپ ارباتتا جىل سايىنعى «كىتاپ fest» فەستيۆالى وتەدى.
سونداي-اق، 12 قىركۇيەكتە ساعات 15:00-دە ش. ايمانوۆ اتىنداعى «قازاقفيلم» ۇلتتىق كينوستۋدياسىندا كينوستۋديانىڭ التىن قورىنداعى فيلمدەر كورسەتىلەدى. ايتا كەتەيىك، بيىل ش.ايمانوۆ اتىنداعى «قازاقفيلم» كينوستۋدياسىنىڭ قۇرىلعانىنا 90 جىل، ال اكتەر ءارى رەجيسسەر شاكەن ايمانوۆتىڭ تۋعانىنا 110 جىل تولادى.
13 قىركۇيەكتە ساعات 18:00-دە «الاتاۋ» ءداستۇرلى ونەر تەاترىنىڭ (نۇركەنت شاعىن اۋدانى، 6) الدىندا «الماتى كەشى» اتتى تەاترلاندىرىلعان كونسەرت وتەدى، ءىل-شالا ساعات 19:30-دا تەاتر ارتيستەرى «Qazaqsha تەراپيا» توبىنىڭ قاتىسۋىمەن «عاسىرلار ءۇنى» تەاترلاندىرىلعان كونسەرت ۇسىنادى. كىرۋ تەگىن.
قالا كۇنىنە ارنالعان نەگىزگى مەرەكەلىك ءىس-شارالار وسى دەمالىس كۇندەرى – 14 جانە 15 قىركۇيەكتە وتەدى.
14 قىركۇيەكتە ساعات 18:00-دە «الاتاۋ» ءداستۇرلى ونەر تەاترىنىڭ الدىندا (نۇركەنت شاعىن اۋدانى، 6) Open Air Jaidarman وتەدى. اشىق اسپان استىنداعى كونسەرتتە قالانىڭ ەڭ تانىمال كتك كوماندالارى ونەر كورسەتىپ، ۇمىتىلماس اسەر، قاعىتپا قالجىڭ، ادەمى ءازىل ۇسىنادى. كىرۋ تەگىن. ارتىنشا ساعات 20:00-دە «الاتاۋ» ءداستۇرلى ونەر تەاترىنىڭ الدىندا (نۇركەنت شاعىن اۋدانى، 6) «ءان تەربەگەن الماتىم» رەترو كەشى ءوتىپ، اقبوتا كەرىمبەكوۆا، جۇبانىش جەكسەن، سالتانات باقايەۆا، ەربول سپالينوۆ، لاشىن مۇرات قىزى، «ءۇش قوڭىر» توبى جانە تەاتر ارتيستەرى ونەر كورسەتەدى.
14 قىركۇيەكتە ساعات 16:00-دە استانا الاڭىندا LuxFM راديوستانسياسىنىڭ فەستيۆالى ءوتىپ، وعان ميراس جۇگىنىسوۆ، ايقىن تولەپبەرگەن، Jazzdauren جانە Adam سياقتى تانىمال ارتيستەر قاتىسادى. كەشتىڭ باستى قوناعى – گرەممي سىيلىعىنىڭ يەگەرى،پروديۋسەر DJ Imanbek.
قالا كۇنى، 15 قىركۇيەكتە ساعات 10:00-دەن 21:00-گە دەيىن رەسپۋبليكا سارايىنىڭ الدىنداعى اباي الاڭىندا «الماتى – ءبىزدىڭ ورتاق ءۇيىمىز» اتتى اۋقىمدى وتباسىلىق فەستيۆال وتەدى. بۇل بىرەگەي جوبا ءاربىر وتباسى مۇشەسىنە قىزىقتى بولماق. وسى جەردە ساعات 11:30-دا «الماتى – ارمان قالا!» ەسترادالىق كونسەرتى وتەدى، وعان ءجاميلا سەركەبايەۆا، وكتەم التايەۆ، قاراكوز سۇلەيمەنوۆا، جۇبانىش جەكسەن ۇلى، ديانا يسمايلوۆا، مۇقاسان شاحزادا جانە باسقا دا تانىمال ارتيستەر قاتىسادى. بالالار مەن جاسوسپىرىمدەرگە، سونداي-اق «TikTok» بەلسەندى قولدانۋشىلارىنا ارنالعان ەرەكشە فوتو جانە ۆيدەو الاڭدارى ۇيىمداستىرىلادى. فەستيۆال اياسىندا ساعات 19:00-دە YOLO HOUSE، BIP HOUSE جانە باسقا دا تانىمال تيكتوك جۇلدىزدارىنىڭ قاتىسۋىمەن كونسەرت وتەدى.
ءداستۇر بويىنشا 15 قىركۇيەك كۇنى تۇڭعىش پرەزيدەنت اتىنداعى ساياباقتا ساعات 10:00-دە جىل سايىنعى «الما Fest» فەستيۆالى باستالادى. ساياباق اۋماعىندا كونسەرتتەر، اشىق اسپان استىنداعى كينوتەاتر، كورمەلەر، قولونەرشىلەر جارمەڭكەسى، الما سورتتارىنىڭ ءاربىر ءتۇرىن قامتيتىن جارمەڭكە، بالالار ويىن الاڭدارى، فوتوايماقتار، سپورتتىق ويىندارعا ارنالعان ايماقتار جانە ت.ب. ۇيىمداستىرىلادى. ساياباقتا الماتىلىقتار كۇنى بويى وتباسىمەن، دوستارىمەن جانە قوناقتارىمەن مەرەكەلىك اتموسفەرانى سەزىنە الادى. ءدال وسى ساياباقتا 15 قىركۇيەكتە ساعات 16:30-دا «الماتى – سۇيىكتى قالام» كونسەرتى ءوتىپ، مەگاپوليس تۇرعىندارى مەن قوناقتارى ءۇشىن روزا رىمبايەۆا، نۇرعالي ءنۇسىپجانوۆ، باقتيار تايلاقبايەۆ، جۇبانىش جەكسەن، ديانا يسمايلوۆا جانە باسقا دا تانىمال ارتيستەر ونەر كورسەتەدى.
15 قىركۇيەك كۇنى ساعات 11:00-دەن باستاپ ارباتتا «تۋعان كۇنىڭمەن، الماتىم» فەستيۆالى ءوتىپ، قالا تۇرعىندارى مەن قوناقتارى سۋرەتشىلەر كورمەسىنە، قولونەرشىلەر جارمەڭكەسىنە، شەبەرلىك دارىستەرىنە جانە باسقا دا ءىس-شارالارعا قاتىسا الادى.
15 قىركۇيەكتە استانا الاڭىندا ساعات 17:00-دە ەسترادا جۇلدىزدارىنىڭ قاتىسۋىمەن Almaty Cover Show وتەدى. ساحنادا ناعيما ەسقالييەۆا، مەيرامبەك بەسپايەۆ، Kalifarniya، RaiM، نۇرلان مەن مۇرات، ARO، ەربولات قۇدايبەرگەن، قايرات تۇنتەكوۆ، ەركىن نۇرجانوۆ، ايدار تۇرعانباي جانە ت.ب. ونەر كورسەتەدى.
سول كۇنى، 15 قىركۇيەكتە، قالا كۇنىنە وراي ەلىمىزدىڭ ەڭ تانىمال جاس ءارتيستىڭ ءبىرى سادراددين العاش رەت ورتالىق ستاديوندا جەكە كونسەرتىن وتكىزەدى.
16 قىركۇيەكتە ساعات 18:00-دە «الاتاۋ» ءداستۇرلى ونەر تەاترىندا (نۇركەنت شاعىن اۋدانى، 6) رەسپۋبليكالىق «ۇلاعات ءسوزىم ۇرپاققا» فەستيۆالى وتەدى. فەستيۆالگە تەرمە ورىنداۋشىلارى جانە ەلدىڭ ءار وڭىرىنەن كەلگەن جىراۋلار قاتىسادى.
سونىمەن قاتار، 15-25 قىركۇيەك ارالىعىندا قازاق مەملەكەتتىك سيرك ارتيستەرى تۇڭعىش پرەزيدەنت ساياباعىندا شوۋ باعدارلاما ۇسىنىپ، قالا تۇرعىندارى مەن قوناقتارىن قۋانتپاق. بۇل ءۇشىن ساياباق اۋماعىندا العاش رەت شاپيتو سيركى ورناتىلادى. بۇل ديامەترى 13 مەتر بولاتىن جىلجىمالى مانەج، وندا سيرك ونەرىنىڭ بارلىق جانرىنداعى ارتيستەر ونەر كورسەتەدى. شاپيتو كۇمبەزىنىڭ بيىكتىگى 10 مەتردەن اسادى، كەشەن 700 ورىنعا ەسەپتەلگەن جانە حالىقارالىق ستاندارتتارعا سايكەس كەلەدى. بالالار مەن ەرەسەكتەر اكروباتتاردىڭ، جونگلەرلەردىڭ، كلوۋنداردىڭ جانە باسقا دا سيرك ارتيستەرىنىڭ ەرەكشە قويىلىمدارىن تاماشالاي الادى. 3000-4000 تەڭگە ارالىعىندا بيلەتتى الدىن الا ونلاين نەمەسە شاپيتو سيركىنىڭ كىرەبەرىسىندەگى كاسسادان ساتىپ الۋعا بولادى.
ءىس-شارالار جوسپارىنىڭ تولىق نۇسقاسى الماتى قالاسى اكىمدىگىنىڭ سايتىندا، سونداي-اق اكىمدىكتىڭ Instagram پاراقشاسىندا، الماتى مادەنيەت باسقارماسى مەن اۋداندىق اكىمدىكتەردىڭ رەسمي پاراقشالارىندا جاريالانعان. ەسكەرتەيىك، ازداعان وزگەرىستەر بولۋى مۇمكىن. اقپاراتتى اكىمدىكتىڭ رەسمي ينتەرنەت-رەسۋرستارى ارقىلى باقىلاپ وتىرۋدى سۇرايمىز.
سونىمەن قاتار، مەرەكەلىك ءىس-شارالار قالانىڭ بارلىق اۋداندارىندا وتەدى:
-اۋەزوۆ اۋدانىندا «الماتى - ءسۇيءىكتى قالا» مەرەكەلىك كونسەرتى 13 قىركۇيەك كۇنى ساعات 11:00-دە Family park دەمالىس ساياباعىندا وتەدى؛
-الاتاۋ اۋدانىندا «الماتى - مەنىڭ جۇرەگىمدە» مەرەكەلىك كونسەرتى 14 قىركۇيەك كۇنى ساعات 16:00-دە «الاتاۋ» ءدوت الدىندا وتەدى؛
-المالى اۋدانىندا «تۋعان كۇنىڭمەن، الماتى!» 13 قىركۇيەك كۇنى ساعات 15:00-دە گاندي اتىنداعى ساياباقتا وتەدى؛
-بوستاندىق اۋدانىندا «تۋعان كۇنىڭمەن، الماتى!» 13-14 قىركۇيەكتە ساعات 16:00-دە Mega Almaty سوو اۋماعىندا وتەدى؛
-جەتىسۋ اۋدانىندا قالا كۇنىن مەرەكەلەۋ 13 قىركۇيەك كۇنى ساعات 18:00-دە قۇلاگەر ش/ا «گۇلدەر» ساياباعىندا وتەدى؛
-ناۋرىزباي اۋدانىندا «الماتى - ءبىزدىڭ ورتاق ءۇيىمىز» مەرەكەلىك كونسەرتى 14 قىركۇيەك كۇنى ساعات 12:00-دە شۇعىلا ش/ا، 347 امفيتەاتر اۋماعىندا وتەدى؛
-تۇركسىب اۋدانىندا «الماتى - اسەم قالام» نەگىزگى اۋداندىق كونسەرتى 14 قىركۇيەك كۇنى ساعات 15:00-دە №6 وقۋشىلار ءۇيىنىڭ سكۆەرىندە كوركەمونەر ۇجىمدارىنىڭ، ق ر ەسترادا جۇلدىزدارىنىڭ جانە Live band قاتىسۋىمەن وتەدى؛
-مەدەۋ اۋدانىندا «تۋعان كۇنىڭمەن، الماتى!» 14 قىركۇيەك كۇنى ساعات 12:00-دە ورتالىق مادەنيەت جانە دەمالىس ساياباعىندا وتەدى؛