جابىق ۋچاسكەلەردە جولداردى قاردان تازالاۋ ءۇشىن ارنايى تەحنيكالار جۇمىلدىرىلدى
اۋا رايىنىڭ ناشارلاۋى، كوكتايعاق، بۇرقاسىن، شەكتەۋلى كورىنۋگە بايلانىستى التى وڭىردە: اقمولا، اقتوبە، قاراعاندى، قوستاناي، پاۆلودار، باتىس قازاقستان وبلىستارىنداعى رەسپۋبليكالىق جانە وبلىستىق ماڭىزى بار تاس جولداردا قوزعالىس جابىلدى، دەپ حابارلايدى Almaty-akshamy.kz.
«قازگيدرومەت« رمك دەرەگىنشە، وڭىرلەردە بۇرقاسىن، قار، كوكتايعاق كۇتىلەدى، جەل 15-20 م/س كۇشەيەدى.
تجم جەدەل شتابى جول قىزمەتتەرى، ءىىم، قازگيدرومەت جانە جەرگىلىكتى اتقارۋشى ورگاندار بىرلەسىپ جۇمىس ىستەۋدە. جابىق ۋچاسكەلەردە جولداردى قاردان تازالاۋ ءۇشىن ارنايى تەحنيكالار جۇمىلدىرىلدى. ارنايى بەكەتتەردە قۇتقارۋشىلار مەن پوليسيا قىزمەتكەرلەرى كەزەكشىلىك ەتۋدە. جىلىتۋ پۋنكتتەرى ىسكە قوسىلعان.
كولىك ءنوپىرىنىڭ جينالۋىنا بايلانىستى پوليسيا جانە جول قىزمەتتەرى كەزەك-كەزەگىمەن اۆتوكولوننالاردى ىلەستىرىپ، دىتتەگەن جەرىنە جەتكىزۋدە.
«ازاماتتاردى اۋا رايىنىڭ وزگەرۋىن باقىلاۋعا شاقىرامىز. قاجەتتى ساقتىق شارالارىن ۇستانىڭىز. قىسقى كەزەڭدە ەلدى مەكەندەر اراسىنداعى اۆتوموبيل جولدارىنا شىعۋدى جوسپارلاماس بۇرىن مىندەتتى تۇردە الداعى قوزعالىس باعىتى بويىنشا اۋا رايى بولجامىمەن تانىسقان ءجون»، - دەپ ەسكەرتەدى ق ر تجم.