ناۋقاستار كوبىنە وق جاراقاتىمەن تۇسكەن
جاپپاي تارتىپسىزدىك كەزىندە قالالىق جەدەل شۇعىل كومەك كورسەتۋ اۋرۋحاناسىنىڭ ۇجىمى قالاي جۇمىس ىستەدى؟ ول تۋرالى اۋرۋحانا قىزمەتكەرلەرى Facebook جەلىسىندە ءبولىستى، دەپ حابارلايدى Almaty-akshamy.kz.
اۋرۋحانانىڭ قابىلداۋ بولىمشەسىنە قىسقا مەرزىمدە كوپتەگەن جاراقات العان ادامدار ءتۇستى. ول تۋرالى اۋرۋحانانىڭ قابىلداۋ بولىمشەسىنىڭ مەڭگەرۋشىسى باۋىرجان وماروۆ ايتتى.
«ءتۇرلى جاراقاتپەن تۇسكەن ناۋقاستاردى كىم ەكەنىنە، قاي سالادا ىستەيتىنىنە قاراماي، پاسيەنت رەتىندە قابىلداي بەردىك. سەبەبى، دارىگەر قانداي جاعداي بولماسىن جانە كەز كەلگەن ساتتە ناۋقاسقا كومەك كورسەتۋى ءتيىس. اۋرۋحانا باسشىلىعى مەديسينالىق كومەك بريگاداسىن كۇشەيتۋ تۋرالى الدىن الا شەشىم قابىلداعان. قۇرامىندا تراۆماتولوگ، حيرۋرگ، نەيروحيرۋرگ، انەستەزيولوگ-رەانيماتولوگ جانە باسقا دا ماماندار بار 5-6 بريگادا دايىن بولدى. وسىمەن جانە تۇسكەن ناۋقاستاردى جەدەل سۇرىپتاۋ جۇيەسىنىڭ ارقاسىندا قىزمەتكەرلەردىڭ جۇمىسىندا رەتسىزدىك پەن ۇرەيگە جول بەرىلمەدى. وسى جولى ناۋقاستار كوبىنە وق جاراقاتىمەن ءتۇستى، ودان باسقا دا ءتۇرلى جاراقاتتار بولدى - گراناتا سىنىقتارىمەن جاراقاتتالعاندار، گازبەن ۋلانعان ادامدار، كەسىلگەن نەمەسە جارىلعان جاراقاتپەن تۇسكەندەر. اۋرۋحاناداعى 9 وتا جاسايتىن بولمە ۇزدىكسىز جۇمىس ىستەدى»،- دەدى باۋىرجان وماروۆ.
1-ساناتتى حيرۋرگ، جاۋاپتى دارىگەر مۇرات احمەتوۆتىڭ ايتۋىنشا، قاڭتاردىڭ 4-نەن 5-نە قاراعان ءتۇنى باسشىلىق دارىگەرلەردى قابىلداۋ بولىمىنە كومەكشى قول رەتىندە جيناي باستاعان.
«سولاردىڭ ىشىندە مەن دە بولدىم. سول ۋاقىتتان باستاپ اۋرۋحانامىزدىڭ بوساعاداعى كۇزەت قىزمەتكەرلەرى، دارىگەرلەر، مەدبيكەلەر، تازالىقشى، شارۋا ءبولىمى دامىل تاپقان جوق. دەمالىستاعى دارىگەرلەر دە كەلدى. قابىلداۋ ءبولىمى بەينە ءبىر سوعىس الاڭىنا اينالعانداي بولدى. دارىگەردىڭ انتى بويىنشا بىزگە بەيبىت شەرۋشى، قاراقشى، ءتارتىپ ساقشىلارى، اسكەريلەر، بارلىعى - بىردەي. بارلىعىن بىردەي ءجىتى باقىلاۋعا الىپ، وتا جاسادىق. نەگىزگى لەك وق جاراقاتىنان تۋىنداعان، باس مي، كەۋدە جانە ءىش، قول-اياقتىڭ اۋىر جاراقاتتارى بولدى. جانساقتاۋ ۇجىمى ءۇشىن دە بۇل اسا قيىن ءسات بولدى. باسا ايتپاعىم، اۋرۋحانا ۇجىمى، مەيلى گينەكولوگ بولسىن، نيەۆروپاتولوگ، تەراپيەۆت، جالپى حيرۋرگيا پروفيلىنەن تىس ماماندار بىزگە سىن ساعاتى سوققاندا زور دەمەۋ بولدى. مەن ارىپتەستەرىمدى ماقتان تۇتام!
ەلىمىزدە تىنىشتىق ورناپ، بارشامىز امان بولىپ، تاۋەلسىزدىگىمىز ماڭگى بولسىن دەگىم كەلەدى»،-دەگەن تىلەگىن جەتكىزدى مارات احمەتوۆ.
قابىلداۋ بولىمشەسىنىڭ اعا مەدبيكەسى گۇلزيرا مۇحامەدجان قىزىنىڭ ايتۋىنشا، 5 قاڭتار كۇنى تاڭەرتەڭ دالادا وتشاشۋ اتقانداي دىبىستار مەن ادامداردىڭ شۋلاعاندىعى ەستىلىپ جاتقان.
«جۇمىسقا كەلسەم، ارىپتەستەرىمنىڭ ءتۇرى شارشاعان ەكەن. بارلىق ءمان-جايدى كۇندەلىكتى وتەتىن 5 مينۋتتىق جينالىس بارىسىندا ءتۇسىندىم. تۇنگى 1-2-لەردەن باستاپ اۋرۋحاناعا وق جاراقاتتارىمەن ناۋقاستار تۇسكەن ەكەن... سودان ساعات 9-10-داردان باستاپ، كەزەك-كەزەك وق جاراقاتىن العان 5-10 ناۋقاسقا دەيىن تۇسە باستادى. ءار جەرىنەن - اياعىنان، سانىنان، كەۋدە جاراقاتتارى، باس جاراقاتتارىمەن تۇسكەندەر كوپ بولدى... 6-سى كۇنى دە وسىنداي جاعداي ورىن الدى. كەيىن بۇلىكشىلەر اۋرۋحاناعا قاراي كەلە جاتىر دەگەن حابار كەلگەندە، قورقىنىش سەزىمى پايدا بولدى. «اللا جار بولسىن»، «قۇداي ساقتاي گور» دەپ بىلگەن سۇرەلەرىمىزدى ايتىپ، جۇمىسىمىزدى جالعاستىرا بەردىك. قابىلداۋ ءبولىمىنىڭ جارىعىن ءوشىرىپ، ەسىگىن جاپتىق. تۇنگى 2-3-تەردە تىنىشتالا باستادى. سودان تاڭعى 4-تەن باستاپ ناۋقاستاردى قايتادان قابىلداي باستادىق.. 7 قاڭتار كۇنى 4 جاسار قىز تۇسكەندە، سول كۇنى جۇمىستا بولعان بارلىق قىزمەتكەرلەردىڭ جۇرەگى اۋىردى... سول كۇنى ءبارىمىز جىلاپ الدىق»، - دەدى گۇلزيرا مۇحامەدجان قىزى.
وتالىق مەدبيكە ايتولقىن بەكسۇلتانوۆانىڭ ايتۋىنشا، تۇستەن كەيىن ناۋقاستاردى بىرىنەن سوڭ ءبىرىن الىپ كەلە باستاعان.
«سودان باستاپ تاڭعا دەيىن ءۇزىلىسسىز قابىلدادىق. كىشكەنە تىنىشتالدى دەگەن كەز – 6-سى كۇنى تاڭعى التىلاردا بولدى. وتكەن جاعدايدى سوزبەن ايتىپ جەتكىزۋ وتە قيىن. مۇندايدى ومىرىمدە ءبىرىنشى رەت كوردىم.. اۋىر كۇندەر بولدى. تەلەديداردان بۇرىنعى سوعىس تۋرالى فيلمدەردى كورۋشى ەدىك، ەندى ءوز كوزىمىزبەن دە كوردىك. ءالى كۇنگە دەيىن كوزىمە جاس كەلەدى... مۇنداي جاعداي ەلىمىزدە ەندى قايتالانباسا ەكەن دەپ تىلەيمىن»،- دەدى وتالىق مەدبيكە.
