قازاقستان ەلشىلىگى ۇستالعان وتانداستارىمىزدى سوتتىڭ قاراۋىنسىز دەپورتاسيالاۋ تۋرالى كەلىسىمگە قول جەتكىزدى.
بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ءمالىم ەتتى، دەپ حابارلايدى Almaty-akshamy.kz Ulysmedia.kz-كە سىلتەمە جاساپ.
«بيىل ناۋرىز ايىنىڭ سوڭىندا يراك رەسپۋبليكاسىنىڭ قۇقىق قورعاۋ ورگاندارى زاڭسىز ەڭبەك قىزمەتىن جۇزەگە اسىرعانى ءۇشىن قازاقستاننىڭ 20 ازاماتىن ۇستادى. قازاقستاننىڭ يوردانياداعى جانە يراكتاعى ەلشىلىگى جەرگىلىكتى ورگاندارمەن سوت قاراۋىنسىز دەپورتاسيالاۋ تۋرالى ۋاعدالاستىققا قول جەتكىزدى. ءقازىر ۇستالعان ازاماتتار ايىپپۇل تولەپ يران اۋماعىنان شىعىپ كەتتى»، - دەدى ءسىم وكىلى.
ونىڭ ايتۋىنشا، جىل باسىندا دا وسىعان ۇقساس وقيعا بولعان.
«بيىل اقپاندا قازاقستاننىڭ 7 ازاماتى يراك رەسپۋبليكاسىنىڭ شەتەلدىكتەردىڭ بولۋى تۋرالى زاڭىنىڭ نورمالارىن بۇزعانى تۋرالى، اتاپ ايتقاندا، جاسىرىن كازينودا زاڭسىز ەڭبەك ەتكەنى ءۇشىن تەرگەۋگە تارتىلعان بولاتىن. بىزگە ءمالىم بولعانداي، وتكەن جىلدىڭ قاراشا ايىندا ولاردىڭ 5-ەۋى ۇستالىپ، سوت قاراۋىنا دەيىن كەپىلمەن بوساتىلعان. وسىعان قاراماستان جەرلەستەرىمىز يراككا قايتا ورالىپ، ەلدىڭ زاڭناماسىن قايتادان بۇزدى. قازاقستان ەلشىلىگى شۇعىل كومەك كورسەتۋدى ۇيىمداستىرعان. سونداي-اق، سوت جانە پروكۋراتۋرامەن كەلىسسوزدەر وتكىزىلدى»، - دەيدى ول.
ا.سمادياروۆ جوعارىدا اتالعان زاڭبۇزۋشىلىق ءۇشىن يراك زاڭناماسى بويىنشا ءبىر جىلعا دەيىن باس بوستاندىعىنان ايرىلۋى نەمەسە 500 مىڭنان 3 ملن يراك دينارىنا دەيىن ايىپپۇل سالىنۋى مۇمكىن ەكەنىن اتاپ ءوتتى.