بيىل ءازىربايجاندا قازاقستاننىڭ مادەنيەت كۇندەرى وتەدى.
بۇل تۋرالى ەلىمىزگە رەسمي ساپارمەن كەلگەن ءازىربايجان پرەزيدەنتى يلحام الييەۆپەن كەڭەيتىلگەن قۇرامداعى كەزدەسۋ بارىسىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ەكى ەلدىڭ مادەني ونكۇندىكتەرىن وتكىزۋ تۋرالى ۋاعدالاستىقتى ايرىقشا اتاپ وتكىم كەلەدى. قازاقستاننىڭ مادەني كۇندەرى وسى جىلدىڭ ىشىندە وتەدى. بۇگىن ءبىز ءازىربايجاننىڭ قۇرمەتتى پرەزيدەنتىمەن كورنەكتى مەملەكەت قايراتكەرى گەيدار الييەۆتىڭ اتىنداعى كوشەنى اشامىز. بۇل ءىس-شارانى ءازىربايجان حالقىنىڭ ۇلى پەرزەنتىنىڭ 100 جىلدىعىنا ورايلاستىرىپ وتىرمىز»، - دەدى مەملەكەت باسشىسى.
قاسىم-جومارت توقايەۆ بۇگىن گەيدار الييەۆتىڭ ومىرىنە ارنالعان «عازيز عۇمىر» دەرەكتى ءفيلمىنىڭ تانىستىرىلىمى وتەتىندىگىن ايتتى. ءفيلمدى قازاقستان تەلەراديوكورپوراسياسى تۇسىرگەن.
«ەلدەرىمىزدىڭ دوستىعى مەن ءوزارا قولداۋىنىڭ جارقىن دالەلىنىڭ ءبىرى - قازاق حالقىنىڭ ءازىربايجانعا – فەزۋلي قالاسىندا قۇرمانعازى اتىنداعى بالالار شىعارماشىلىعى ورتالىعىن سىيعا تارتۋى بولماق. ماعان اتالعان ورتالىقتىڭ قۇرىلىسى بارىنشا جىلدام قارقىنمەن جۇرگىزىلىپ جاتقانىن ايتتى. مەنىڭشە، تاياۋ ارادا وسىناۋ ماڭىزدى نىساننىڭ جۇمىس ىستەي باستاعانىن كورەمىز. ءبىز مۇنان ارى دا جان-جاقتى گۋمانيتارلىق بايلانىستى دامىتۋعا، ورتاق رۋحاني قۇندىلىقتاردىڭ اسىل قازىناسىن بايىتۋعا نىق نيەتتىمىز»، - دەدى پرەزيدەنت.