ءبىلىم بەرۋ سالاسىنداعى ساپانى قامتاماسىز ەتۋ كوميتەتى ءبىلىم بەرۋ ۇيىمدارىنا مونيتورينگ جاسادى.
ونىڭ بارىسىندا 40 مەكتەپتىڭ ليسەنزياسىز جۇمىس ىستەگەنى انىقتالدى. ونىڭ ىشىندە 30 مەملەكەتتىك جانە 10 جەكەمەنشىك مەكتەپ بار، دەپ حابارلايدى Almaty-akshamy.kz وقۋ-اعارتۋ مينيسترلىگىنە سىلتەمە جاساپ.
ليسەنزياسىز جۇمىس ىستەگەن مەكتەپتەردىڭ دەنى استانا، الماتى قالالارى مەن باتىس قازاقستان، الماتى، جامبىل، جەتىسۋ جانە ماڭعىستاۋ وبلىستارىندا. 32 مەكتەپكە قاتىستى اكىمشىلىك ءىس قوزعالىپ، ليسەنزياسىز قىزمەت ءۇشىن ايىپپۇل سالىندى. ونىڭ 23ء-ى مەملەكەتتىك، 9-ى جەكەمەنشىك مەكتەپ.
«ليسەنزيانىڭ جوقتىعى مەكتەپتىڭ سايكەستىك تەكسەرۋىنەن وتپەگەنىن نەمەسە رۇقسات الۋ ءۇشىن قۇجاتتار تاپسىرماعانىن بىلدىرەدى.وننان اسا مەكتەپتە سانيتارلىق-ەپيدەميولوگيالىق قورىتىندى جانە توتەنشە جاعداي اكتىلەرى جوق. بۇل بالالاردىڭ دەنساۋلىعى مەن جايلىلىعىنا ءقاۋىپ تۋدىرۋى مۇمكىن. 14 مەكتەپتە ماتەريالدىق-تەحنيكالىق بازا ءبىلىم بەرۋدىڭ زاماناۋي تالاپتارىنا ساي كەلمەيدى، ءبىلىم بەرۋ ينفراقۇرىلىمى، بىلىكتى پەداگوگيكالىق كادرلارمەن تولىق جابدىقتالماعان، ۇيىمداستىرۋ جۇمىستارى دا دۇرىس جولعا قويىلماعان بۇل ءبىلىم بەرۋ ساپاسىن كەرى اسەرىن تيگىزەدى»، - دەدى كوميتەتتىڭ رۇقسات بەرۋ ساياساتى باسقارماسىنىڭ باسشىسى جۇلدىز اۋەزحانوۆا.
ايتا كەتەيىك، ليسەنزياسى جوق مەكتەپتەر ءبىلىم تۋرالى مەملەكەتتىك ۇلگىدەگى قۇجاتتاردى، ياعني نەگىزگى جانە جالپى ورتا ءبىلىم تۋرالى اتتەستاتتاردى بەرە المايدى. ليسەنزياسىز جۇمىس ىستەيتىن بارلىق مەكتەپتەرگە قاتىستى اكىمشىلىك ىستەر قوزعالدى. بۇگىنگى تاڭدا اۋماقتىق دەپارتامەنتتەرگە ليسەنزياسى جوق مەكتەپتەرگە قاتىستى ءتيىستى شارالار قابىلداۋ تاپسىرىلدى، وڭىرلەردىڭ اكىمدىكتەرىنە ءتيىستى حاتتار جولداندى.