ماشاقاتى كوپ ماشينا

«ونەركاسىپتى دامىتۋ قورىنىڭ» باسپا ءسوز قىزمەتى تاراتقان مالىمەت بويىنشا، 6 اقپاننان بەرى اۆتوموبيلگە بەرىلەتىن جەڭىلدەتىلگەن نەسيەگە 2 549 ملن تەڭگەنىڭ ءوتىنىمى ماقۇلدانعان، دەپ حابارلايدى Almaty-akshamy.kz. قازاقپاراتقا سىلتەمە جاساپ.

«بيىلعى 6 اقپاندا استانا ۋاقىتى بويىنشا ساعات 10.00-دە «ونەركاسىپتى دامىتۋ قورى» اق autonesie.kz سايتىندا «جەڭىلدىكپەن اۆتوكرەديتتەۋ» باعدارلاماسى بويىنشا وتىنىمدەردى قابىلداۋ ءۇشىن پيلوتتىق پلاتفورمانى ىسكە قوستى. پلاتفورمانىڭ العاشقى ىسكە قوسىلۋ قورىتىندىسى بويىنشا پۋلدا 19 مەن 62 جاس ارالىعىنداعى 761 قاتىسۋشى تىركەلدى.

پلاتفورما ىسكە قوسىلعاننان بەرى autonesie.kz سايتىنا كىرۋشىلەردىڭ باسىم كوپشىلىگى الماتىدا – 31%، استانادا – 22،6% جانە شىمكەنتتە – 9،3% بايقالدى. پلاتفورمانى العاش ىسكە قوسۋعا ارنالعان ريەۆولۆەرلىك قاراجات كولەمى – 7،6 ملرد تەڭگە. بۇگىنگى تاڭدا اۆتوسالوندارعا 463 قاتىسۋشى جۇگىنىپ، تولەم شوتتارىن الدى. قاتىسۋشىلار اراسىندا ەڭ تانىمال اۆتوموبيل برەندتەرى – Hyundai جانە Chevrolet»، - دەلىنگەن مالىمەتتە.

وڭىرلەر اراسىنداعى كورسەتكىش مىنانداي:

● استانا – 175؛

● الماتى – 79؛

● قوستاناي وبل. – 44؛

● جەتىسۋ وبل. – 43؛

● شىمكەنت – 41؛

● قاراعاندى وبل. – 20؛

● شىعىس قازاقستان وبل. – 13؛

● اقتوبە وبل. – 9؛

● سولتۇستىك قازاقستان وبل. – 7؛

● جامبىل وبل. – 6؛

● اتىراۋ وبل. – 5؛

● پاۆلودار وبل. – 5؛

● اقمولا وبل. – 4؛

● اباي وبل.- 4

● ماڭعىستاۋ وبل. – 3؛

● تۇركىستان وبل.-3؛

● باتىس قازاقستان وبل. – 2؛

قازىرگى تاڭدا باعدارلاماعا قاتىسۋشى بانكتەر («ەۋرازيالىق بانك» اق، «بانك سەنتركرەديت» اق، «قازاقستان حالىق بانكى» اق جانە «ForteBank» اق) جالپى سوماسى 2 549 ملن تەڭگەگە وتىنىمدەردى قابىلدادى جانە ماقۇلدادى. پلاتفورمادا ءوتىنىم بەرگەن ساتتەن باستاپ، اۆتوموبيل بەرىلگەنگە دەيىن جەڭىلدىكپەن كرەديت رەسىمدەۋدىڭ جالپى مەرزىمى كۇنتىزبەلىك 60 كۇننەن اسپايدى. سونداي-اق، ءبىر بانك كەپىلدىك حات بەرۋدەن باس تارتقان جاعدايدا، ءوتىنىش بەرۋشىنىڭ باعدارلاماعا قاتىسۋشى باسقا بانككە جۇگىنۋگە قۇقىعى بار ەكەنىن اتاپ وتكەن ءجون»، - دەپ جازادى قوردىڭ باسپا ءسوز قىزمەتى.

بۇعان دەيىن «ونەركاسىپتى دامىتۋ قورى» اق وكىلدەرى العاشقى لەككە كىرگەن 761 ءوتىنىمنىڭ كەيبىرى كەرى قايتارىلۋى مۇمكىن ەكەنىن حابارلاعان ەدى.