ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ ارحەولوگ-عالىمدارى ەۋرازيا دالاسىندا كەزدەسپەيتىن ءىرى كولەمدەگى قولا ءداۋىرىنىڭ دالا پيراميداسىن تاپتى، دەپ حابارلايدى Almaty-akshamy.kz.
بۇل تۋرالى ۋنيۆەرسيتەتتىڭ باسپا ءسوز قىزمەتى حابارلاعان.
قازبا جۇمىستارى اباي وبلىسىندا جۇرگىزىلۋدە. 2014 جىلدان باستاپ ەۇۋ تاريح فاكۋلتەتى ارحەولوگيا جانە ەتنولوگيا كافەدراسىنىڭ عالىمدارى اباي وبلىسى، اباي اۋدانى توقتامىس ەلدى مەكەنىنىڭ جانىنداعى قىرىقۇڭگىر كەشەندى ەسكەرتكىشىندە ارحەولوگيالىق قازبا جۇمىستارىن جۇرگىزىپ كەلەدى. وعان ۋنيۆەرسيتەت ستۋدەنتتەرى مەن ماگيسترانتتارى اتسالىستى. جۇرگىزىلگەن زەرتتەۋ جۇمىستارىنىڭ ناتيجەسىندە ەۋرازيا دالاسىندا كەزدەسپەيتىن ءىرى كولەمدەگى ءبىزدىڭ داۋىرىمىزگە دەيىنگى ەكىنشى مىڭجىلدىقتىڭ باسى، ياعني وسىدان ءتورت مىڭ جىل بۇرىنعى قولا ءداۋىرىنىڭ دالا پيراميداسى تابىلدى.
«دالا پيراميداسى وتە دالدىكپەن سالىنعان، التى قىرلى. ءاربىر قىرىنىڭ اراسى ون ءۇش مەتر جانە سەگىز قاتار تاسپەن قالانعان. ورتاسىندا بىرنەشە شەڭبەرلەرى بار. بۇل - وتە كۇردەلى كەشەندى قۇرىلىس. سول كەشەندەگى قۇرىلىستىڭ سىرتىنداعى قابىرعالارىندا ءارتۇرلى جانۋارلاردىڭ، اسىرەسە جىلقىنىڭ سۋرەتتەرى باسىم بەينەلەنگەن. سونىمەن بىرگە تۇيەنىڭ دە بەينەلەرى بار. قازبادان تابىلعان مالىمەتتەر، قىش ىدىستار، ايەل ادامنىڭ التىن سىرعاسى جانە تاعى باسقا اشەكەي بۇيىمدار وسى قولا ءداۋىرىنىڭ ۇلكەن كونە داۋىردە مادەنيەتى، وشاعى بولعاندىعىن كورسەتەدى. بۇل، ياعني، سول كەزەڭنىڭ وزىندە جىلقى كۋلتىنىڭ وتە جوعارى بولعاندىعىن سول تاس قۇرىلىستىڭ اينالاسىنداعى جىلقى سۇيەكتەرىنىڭ تابىلۋى دالەلدەپ وتىر»، - دەيدى تاريحشى عالىم، ەۇۋ ارحەولوگيا جانە ەتنولوگيا كافەدراسىنىڭ مەڭگەرۋشىسى ۇلان ۇمىتقالييەۆ.
ونىڭ ايتۋىنشا، قازىرگى ۋاقىتتا زەرتتەۋلەر شەتەلدىك عالىمدارمەن بىرلەسىپ جۇرگىزىلۋدە.