ەلىمىزدە جول بويىندا اجەتحانا جەتىسپەيدى

جولاۋشىلار مەن تۋريستەر ءۇشىن 300-گە جۋىق اجەتحانا جەتكىلىكسىز.

بۇل تۋرالى «Kazakh Tourism» اق باسقارما ءتوراعاسىنىڭ ورىنباسارى قايرات ءسادۋاقاسوۆ ءمالىم ەتتى، دەپ حابارلايدى Almaty-akshamy.kzقازاقپاراتقا سىلتەمە جاساپ. 

«ءبىز 2018 جىلى اجەتحانالار بويىنشا تەكسەرۋ جۇرگىزىپ، 500 اجەتحانا جەتىسپەيتىنىن انىقتادىق. سودان بەرى جانارماي قۇيۋ بەكەتتەرىندە جانە كولدەر جاعاسىندا 200 اجەتحانا سالىندى. سونىمەن قاتار اجەتحانالاردى كۇتىپ ۇستاۋعا سۋبسيديا بەرۋ ەنگىزىلدى. بۇگىندە تاعى 300 سالۋ كەرەك. بۇل –بىرلەسكەن جۇمىس، سەبەبى «Kazakh Tourism» وزدىگىنەن اجەتحانالار سالۋعا قۇقىعى جوق. ءبىزدىڭ مىندەت – اجەتحانانى قايدا سالۋ كەرەگىن كورسەتۋ جانە جەرگىلىكتى اتقارۋشى ورگاندار مەن بيزنەسكە كومەكتەسۋ. ءبىز –پروبلەمالاردى انىقتاۋشى ورگانبىز. جالپى تۋريزمگە 30-دان استام سالانىڭ قاتىسى بار»، - دەدى قايرات ءسادۋاقاسوۆ.

سونداي-اق سپيكەر «Kazakh Tourism» ۇلتتىق كومپانياسىنىڭ جۇمىسىنا قاتىستى سىن ايتىلاتىنىن جەتكىزدى.

«تۋربيزنەستى قورعاۋ كەرەك، ءبىز ۇكىمەتكە تۋريزم سالاسىنىڭ ءۇنىن جەتكىزۋشىمىز. ونىڭ ىشىندە اجەتحانا ماسەلەسى دە بار. اكىمدىكتەر ءوڭىردىڭ تۋريستىك الەۋەتى بار ما دەگەن ماسەلەنى شەشىپ الۋى كەرەك. ءبىز اكىمدىكتەرگە وڭىردەگى نەگىزگى تۋريستىك مارشرۋتتار، جول بويىنداعى دارەتحانالار ماسەلەسى جانە ولاردىڭ قانشا كولەمدە جەتىسپەيتىنى تۋرالى اقپارات بەردىك. بۇگىندە ەلدەگى جانارماي قۇيۋ بەكەتتەرىنىڭ 75%-ى جول بويىنداعى قىزمەت بويىنشا ۇلتتىق ستاندارتتارعا سايكەس كەلەدى. بۇل جاعدايدى «قازاۆتوجول» كومپانياسى قاداعالايدى. بۇل باعىتتا بىرنەشە جىل بويى بىرلەسىپ جۇمىس ىستەپ كەلەمىز»، - دەيدى سپيكەر.