قازاقستاندا سەيسميكالىق ءقاۋىپتى ساپالى بولجاۋ ءۇشىن ەل بويىنشا 285 سەيسموستانسيا مەن 11 بيوستاسيونار قاجەت.
بۇل ماسەلە اشىق نقا پورتالىندا جاريالانعان قازاقستاندا سەيسمولوگيا سالاسىن دامىتۋدىڭ 2024-2028 جىلدارعا ارنالعان كەشەندى جوسپارىندا كوتەرىلگەن، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ءقازىر سەيسميكالىق اۋدانداردا جۇمىس ىستەپ تۇرعان ستانسيالار مەن بيوستاسيونارلاردىڭ سانى از. تيىسىنشە، ول باعالاۋ جانە تاۋەكەلدى انىقتاۋ بويىنشا قويىلعان مىندەرتتەردى ورىنداۋعا مۇمكىندىك بەرمەيدى. ماسەلەن، سەيسميكالىق باقىلاۋدى «ستاە» ءجشس-نىڭ 69 سەيسمولوگيالىق ستانسياسى جۇرگىزەدى. ونىڭ التاۋى ىستەن شىققان. بۇگىندە ستانسيالار الماتى، شىمكەنت قالالارى مەن 12 وبلىستىڭ اۋماعىندا بار»، - دەگەن دەرەكتەر كەلتىرىلگەن كەشەندى جوسپاردا.
بۇگىندە الماتى قالاسىنان باسقا سەيسميكالىق بەلسەندى ايماقتاردا ورنالاسقان ءىرى شاھارلاردا ءقاۋىپتى انىقتايتىن بىردە-بىر زاماناۋي قۇرىلعى جوق.
«مامانداردىڭ ەسەبىنە سايكەس، سەيسميكالىق ءقاۋىپتى ساپالى بولجاۋ جانە ونىڭ الدىن الۋ ءۇشىن رەسپۋبليكانىڭ بۇكىل اۋماعىندا قوسىمشا 285 سەيسموستانسيا مەن 11 بيوستاسيونار قويۋ قاجەت»، - دەپ ماسەلەنى شەشۋگە باعىتتالعان ۇسىنىس جازىلعان قۇجاتتا.