وكقا-داعى جاعدايدى وقشاۋلاۋ جونىندەگى ءىس-شارالار كەشەنى پاسيەنتتەردىڭ ايتۆ-ينفەكسياسىنا ۋاقتىلى تەستىلەۋ جانە كاسىبي رەگلامەنتتەردى ساقتاۋ ارقىلى جۇرگىزىلدى.
الماتىدا دەنساۋلىق ساقتاۋ مينيسترلىگىنىڭ سانيتاريالىق-ەپيدەميولوگيالىق، مەديسينالىق جانە فارماسيەۆتيكالىق باقىلاۋ كوميتەتتەرى، الماتى قالاسى كوميتەتتەرىنىڭ اۋماقتىق دەپارتامەنتتەرى ماماندارىنىڭ قاتىسۋىمەن ءۇش پاسيەنتتىڭ ايتۆ-ينفەكسياسىن جۇقتىرۋ فاكتىسى بويىنشا ەپيدەميولوگيالىق تەكسەرۋ اياقتالدى، دەپ حابارلايدى Almaty-akshamy.kz.
ەپيدەميولوگيالىق تەكسەرۋ بارىسىندا 745 ادام تەكسەرىلدى، ولاردىڭ ىشىندە 118 قان دونورى جانە ونىڭ كومپونەنتتەرى، 231 مەديسينا قىزمەتكەرى، 396 پاسيەنت بىرلەسىپ ستاسيونارلىق ەم قابىلداعان نەمەسە وسى باعىت بويىنشا مەديسينالىق ۇيىمدارعا جۇگىنگەن. بارلىق تالداۋلاردىڭ ناتيجەلەرى - تەرىس.
ەپيدەميولوگيالىق زەرتتەۋ ناتيجەلەرى بويىنشا كوميسسيا مۇشەلەرى وكقا ءۇش پاسيەنتىنىڭ جۇقتىرۋ فاكتىسى، ەڭ الدىمەن، ادامي فاكتورمەن، اتاپ ايتقاندا، ورتا مەديسينالىق پەرسونالدىڭ جەكەلەگەن قىزمەتكەرلەرىنىڭ ءينۆازيۆتى مانيپۋلياسيالار جۇرگىزۋ كەزىندە وپەراسيالىق راسىمدەر ستاندارتتارىن بۇزۋىمەن جانە ولاردىڭ قىزمەتىنە باقىلاۋدىڭ بولماۋىمەن بايلانىستى دەگەن قورىتىندىعا كەلدى. سانيتارلىق-ەپيدەميولوگيالىق قاۋىپسىزدىكتىڭ جۇيەلى بۇزۋشىلىقتارى انىقتالعان جوق. 2023 جىلدىڭ 6 ايىندا قالا ستاسيونارلارىندا 147736 ادام مەديسينالىق كومەك الدى، ونىڭ ىشىندە رەانيماسيالىق كومەك – 14650 پاسيەنت، مەديسينالىق كومەك كورسەتۋ كەزىندە پاسيەنتتەردىڭ جۇقتىرۋ فاكتىلەرى انىقتالعان جوق.
قازىرگى ۋاقىتتا ايتۆ-ينفەكسياسى انىقتالعان بارلىق ءۇش پاسيەنت جيتس ورتالىعىنا ديسپانسەرلىك ەسەپكە قويىلدى، ەمدەۋدىڭ جەكە سحەماسى بويىنشا انتيرەتروۆيرۋستىق پرەپاراتتارمەن قامتاماسىز ەتىلدى، ولارعا جەرگىلىكتى بيۋدجەت قاراجاتى ەسەبىنەن بارلىق قاجەتتى مەديسينالىق جانە پسيحولوگيالىق كومەك كورسەتىلەدى.
قالىپتاسقان جاعدايدى ەسكەرە وتىرىپ، كوميسسيا قورىتىندىلارى نەگىزىندە باسقارما شەشىم قابىلدادى:
- ق ر ەڭبەك كودەكسىنىڭ 48 - بابى 2-تارماعىنىڭ 6) تارماقشاسى نەگىزىندە قالالىق اۋرۋحانانىڭ باس دارىگەرى ن. ب. تابىنبايەۆ جۇمىستان شەتتەتىلدى؛
- ق ر ەڭبەك كودەكسىنىڭ 52-بابى 1-تارماعىنىڭ 16) تارماقشاسىنىڭ نەگىزىندە ەپيدەميولوگيا بويىنشا باس دارىگەر ورىنباسارى، رەانيماسيا مەڭگەرۋشىسى، ستاسيوناردىڭ باس مەدبيكەسى جانە رەانيماسيا بولىمشەسىنىڭ اعا مەدبيكەسى تەرىس سەبەپتەرىمەن جۇمىستان شىعارىلدى.
كوميسسيا جۇمىسىنىڭ قورىتىندىسى بار انىقتاما ماتەريالدارى ءىس جۇرگىزۋ شەشىمىن قابىلداۋ جانە ءاربىر جاۋاپتى تۇلعانىڭ جاۋاپكەرشىلىك شاراسىن ودان ءارى ايقىنداۋ ءۇشىن قالالىق پوليسيا دەپارتامەنتىنە جىبەرىلدى.
قوعامدىق دەنساۋلىق ساقتاۋ باسقارماسى جۇيەلى شارالار كەشەنىن قامتيتىن سانيتارلىق-ەپيدەميولوگيالىق رەجيمنىڭ بۇزىلۋىنىڭ الدىن الۋ جونىندەگى قولدانىستاعى ءىس-شارالار جوسپارىن وزەكتەندىردى. ولاردىڭ ىشىندە، ەمدەلۋگە تۇسەتىن بارلىق پاسيەنتتەردى، (قابىلداۋ بولىمشەلەرىنە دە، قالا ستاسيونارلارىنىڭ رەانيماسياسىنا دا) كۇندەلىكتى باقىلاۋ. سونداي-اق كوپبەيىندى ستاسيونارلاردىڭ ينفراقۇرىلىمىنا تالداۋ جانە اۋديت جۇرگىزىلدى جانە بيۋدجەتتى جاقىن ارادا ناقتىلاۋ كەزىندە ءماسليحاتتىڭ قاراۋىنا جابدىق ەسكىرگەن ستاسيونارلاردا رەانيماسيالىق جانە ورتالىق زارارسىزداندىرۋ بولىمشەلەرىن زاماناۋي جابدىقتارمەن جاڭعىرتۋعا جانە قوسىمشا جاراقتاندىرۋعا 2،3 ملرد تەڭگە سوماسىنا ءوتىنىم ەنگىزىلەتىن بولادى. سونداي-اق كەلەسى جىلى ستاسيونارلاردىڭ سورۋ جەلدەتكىشىن قايتا جاڭارتۋ جۇرگىزىلەدى.
جيتس ورتالىعى ICAP (حالىقارالىق ۇكىمەتتىك ەمەس ۇيىم) جاتتىقتىرۋشىلارىن تارتا وتىرىپ، 31 شىلدەدەن 5 تامىزعا دەيىن سانيتاريالىق-ەپيدەميولوگيالىق جانە سانيتاريالىق-گيگيەنالىق نورمالاردى ساقتاۋ بويىنشا، كەيىننەن اتتەستاتتاۋمەن جانە ءتيىستى سەرتيفيكاتتار الۋمەن بارلىق ورتا مەديسينالىق پەرسونالدى (350 ادام) وقىتاتىن بولادى. تامىز ايىنان باستاپ جوعارى مەديسينالىق كوللەدج بازاسىندا الماتى قالاسىنىڭ بارلىق ورتا مەديسينالىق پەرسونالىن وقىتۋ جوسپارلانۋدا (11502 ادام).
ەستەرىڭىزگە سالا كەتەيىك، جىل سايىن قالالىق جيتس ورتالىعىنىڭ ماماندارى ايتۆ-عا 450 مىڭعا جۋىق زەرتتەۋ جۇرگىزەدى. وسىلايشا، شامامەن 15-20% نەمەسە مەگاپوليس حالقىنىڭ بەستەن ءبىر بولىگى جەرگىلىكتى قىزمەتتەردىڭ ءجىتى باقىلاۋىندا.
بۇگىندە الماتىنىڭ جيتس-تىڭ الدىن الۋ جانە وعان قارسى كۇرەس ورتالىعىندا ديسپانسەرلىك ەسەپتە ايتۆ دياگنوزى بار 4429 ادام تۇر. 2022 جىلى قالانىڭ 499 تۇرعىنى انىقتالدى (2021 جىلى 467 جاعداي). جالپى، ەل بويىنشا وسىنداي كورىنىس بايقالادى. 2022 جىلى ايتۆ-ينفەكسياسىنىڭ 4007 جاعدايى تىركەلدى، وتكەن جىلدىڭ سايكەس كەزەڭىمەن سالىستىرعاندا انىقتالۋدىڭ 408 جاعدايعا (11،8%) ۇلعايۋى بايقالادى، بۇل ەڭ الدىمەن حالىقتى تەستىلەۋدىڭ ورتا ەسەپپەن 10% - عا ۇلعايۋىمەن بايلانىستى.
دۇنيەجۇزىلىك دەنساۋلىق ساقتاۋ ۇيىمى ايتۆ - ينفەكسياسىن سوزىلمالى، باقىلاناتىن اۋرۋ دەپ تانىدى. سوڭعى حالىقارالىق حاتتامالارعا سايكەس ددۇ مەن ق ر دسم دياگنوز قويىلعاننان كەيىن بىردەن انتيرەتروۆيرۋستىق تەراپيانى (ارت) تاعايىندايدى. تەراپيا يممۋنيتەتتى قورعاۋدى قامتاماسىز ەتەدى، ال ايتۆ-مەن اۋىراتىن ادامنىڭ ءومىر ءسۇرۋ ۇزاقتىعى مەن ساپاسى ايتۆ-مەن اۋىراتىن ادامنىڭ ءومىر ءسۇرۋ ۇزاقتىعى مەن ساپاسىنان ەرەكشەلەنبەيدى.