ەلىمىزدەگى كۋرورتتار مەن ساياباقتاردان قوقىس شىعارۋعا ءبىر كۇن بەرىلدى

بيىل ەلدەگى تۋريستىك ورىندارعا بارۋشىلار سانى كوبەيدى.

قازاقستاننىڭ ۇلتتىق ساياباقتارى مەن كۋرورتتارىنا كەلەتىن تۋريستەر سانىنىڭ ارتۋىنا بايلانىستى ينفراقۇرىلىمعا جۇكتەمە دە ارتتى، دەپ حابارلايدى Almaty-akshamy.kz قازاقستان ۇكىمەتىنىڭ رەسمي Telegram-كانالىنا سىلتەمە جاساپ.

2022 جىلى ەلدەگى تۋريستىك ورىندارعا بارۋ سانى ارتتى. بۋراباي مەن شىمبۇلاق شيپاجايلارىنا وتكەن جىلمەن سالىستىرعاندا ەكى ەسە كوپ تۋريست كەلدى، ال الماتى تاۋ كلاستەرىنىڭ ۇلتتىق ساياباقتارىنا كەلەتىن تۋريستەر 50 پايىزعا ءوستى.

كەلۋشىلەردىڭ كوبەيۋىنە بايلانىستى ينفراقۇرىلىمعا جۇكتەمە ارتتى، بۇل، اسىرەسە، كۋرورتتىق ايماقتاردى تازا جانە تارتىپپەن ۇستاۋعا اسەر ەتەدى. بۋراباي، الاكول، يمانتاۋ-شالقار كۋرورتتىق ايماقتارىندا، الماتى ءوڭىرى مەن ماڭعىستاۋدىڭ ۇلتتىق ساياباقتارىندا قوقىس كونتەينەرلەرىنىڭ جەتىسپەۋشىلىگى بايقالادى.

بۇل اقپارات پرەمەر-مينيستردىڭ ورىنباسارى ەرالى توعجانوۆتىڭ ورتالىق جانە جەرگىلىكتى اتقارۋشى ورگاندارمەن كەزدەسۋىندە ايتىلدى. كەزدەسۋ ءتۋريزمدى ساپالى دامىتۋ ءۇشىن جاعدايدى جاقسارتۋ ماسەلەلەرىنە قاتىستى بولدى.

ەرالى توعجانوۆ ءبىر كۇن ىشىندە ۇلتتىق پاركتەر مەن كۋرورتتىق ايماقتار اۋماعىنان قاتتى تۇرمىستىق قالدىقتاردى شىعارۋدى تاپسىردى. بۇل رەتتە قوقىستى شىعارۋ جيىلىگى ۇلعايتىلۋى ءتيىس. سونداي-اق، قاتتى تۇرمىستىق قالدىقتاردى جيناۋعا ارنالعان قوسىمشا كونتەينەرلەر ورناتۋ تاپسىرىلدى.

سونىمەن قاتار، كەڭەستە shagym.kz ءمودۋلىن ەنگىزۋ تالقىلاندى. بۇل قىزمەت ساپاسىن جاقسارتۋعا قاتىستى سۇرانىستارعا جەدەل جاۋاپ بەرۋگە مۇمكىندىك بەرەدى. تۋريستەردىڭ شاعىمدارى مەن ۇسىنىستارىن جيناۋ پروسەسىن سيفرلاندىرۋ تاپسىرىلدى.