«بويىمدى ورىندىققا شىعىپ ولشەدى»
شىعىس قازاقستان وبلىسى اياگوز قالاسىندا وتان الدىنداعى بورىشىن وتەپ جۇرگەن دميتريي شاپۋلوۆتىڭ بويى – 2 مەتر. اتىراۋ قالاسىنان كەلگەن جىگىت تانك اسكەري بولىمىنە قابىلدانعان. دميتريي بويىنىڭ ۇزىندىعى اسكەري ورتادا ەش ىڭعايسىزدىق تۋدىرمايتىنىن، كەرىسىنشە باسىمدىق بەرەتىنىن ايتتى دەپ حابارلايدى Almaty-akshamy.kz قازاقپاراتقا سىلتەمە جاساپ.
دميتريي شاپۋلوۆ قاسىنداعى ساربازدار اراسىندا بويشاڭدىعىمەن بىردەن كوزگە تۇسەدى. 45ء-شى ولشەمدەگى اياق-كيىم كيەتىن ساربازدىڭ اسكەري بورىشىن وتەۋگە كەلگەنىنە ەكى اي بولعان. شىمىر دەنەلى، شيراق قيمىلدايتىن جىگىت ءوز ورتاسىندا ەرەكشەلەنىپ جۇرەدى. ءوز سوزىندە ول بويىنىڭ ۇزىندىعى اسكەري ورتادا ەش ىڭعايسىزدىق تۋدىرمايتىنىن، كەرىسىنشە سپورت نورماتيۆتەرىن ورىنداۋ مەن جاۋىنگەرلىك دايىندىقتا قارۋمەن اتۋ كەزىندە پايداسىن تيگىزەتىنىن ايتتى.
«اياگوز قالاسىنداعى تانك اسكەري ءبولىمىنىڭ موتواتقىشتار باتالونىندا بورىشىمدى وتەپ ءجۇرمىن. وسىندا اتىراۋ قالاسىنان كەلدىم. بويىم مەكتەپ قابىرعاسىنان باستاپ جىلدام وسە باستاعان»، – دەيدى دميتريي.
جاسى نەبارى ون توعىزداعى جاۋىنگەردىڭ بويى – 2 مەتر. بويى مەكتەپتە دە، كوللەدجدە دە ەڭ ۇزىن بولىپتى. باسكەتبول وينايتىنى دا بار.
«اكەمنىڭ بويى – 197 سانتيمەتر. سول كىسىگە تارتقان شىعارمىن. ال انامنىڭ بويى الاسا. جالپى بويىمنىڭ ۇزىن بولعانى وزىمە ۇنايدى. وعان بولا ەش الاڭدامايمىن»، – دەيدى دميتريي شاپۋلوۆ.
دميتريي اسكەري بولىمگە العاش مەديسينالىق تەكسەرۋدەن وتۋگە كەلگەن شاعىندا مەدبيكەلەر ونىڭ بويى ولشەيتىن قۇرالدان اسىپ تۇسكەنىن ايتىپتى. ارتىنشا امالىن تاۋىپ ورىندىقتىڭ ۇستىنە شىعىپ ولشەگەن.
قاتارداعى جاۋىنگەر اسكەرگە كەلگەنىنە ەش وكىنبەيدى. اسكەري قىزمەتتى بارلىق ەر ازامات مىندەتتى تۇردە وتەۋى ءتيىس دەپ سانايدى.