ەلىمىزدەگى انيماسيانىڭ ساپاسىن ارتتىرۋ كوزدەلۋدە

قازاقستاندىق انيماسيانى جاڭا بەلەستەر كۇتەدى.

وتاندىق مۋلتتوپتاما جاندانۋدى قاجەت ەتەدى،  دەپ حابارلايدى Almaty-akshamy.kz. 24.kz-كە سىلتەمە جاساپ.

زاماناۋي ۇلگىدەگى انيماسيالىق ونىمدەرگە ەڭبەكتەگەن بالادان ەڭكەيگەن كارىگە دەيىن قىزىعاتىنى انىق. الايدا قازاقستاندىقتاردىڭ كوڭىلىنەن شىعىپ، كەڭىنەن تانىلعان وتاندىق تۋىندى نەكەن-ساياق. قازاق ەرتەگىسىنىڭ جەلىسىمەن انيماسيالىق فيلمدەردى ءتۇسىرىپ، ولاردىڭ تانىمالدىلىعىن ارتتىرۋعا نە كەدەرگى؟  قازاقستاندىقتاردى ەلەڭ ەتكىزگەن ەرتوستىك تۋرالى تۇڭعىش تولىق مەتراجدى ءفيلمنىڭ شىققانىنا 10 جىلعا تايادى. الايدا 3D فورماتتا سالىنعان باتىردىڭ بەينەسى ەش جەردەن كورىنبەي، كومەسكىلەنىپ قالدى. ەرتوستىكتىڭ ايگىلى Marvel كەيىپكەرلەرىندەي تانىمالدىلىققا تاتيتىنى انىق. ءبىراق زاماناۋي باتىر فەنومەنىن تۋدىرا المادى. 

انيماسيا سالاسىنىڭ مامانى، ۇلتتىق كينونى قولداۋ مەملەكەتتىك ورتالىعىنىڭ باس پروديۋسەرى اداي ابەلدينوۆتىڭ پىكىرىنشە، تولىق مەتراجدى ءبىر فيلمگە قاراعاندا، كوپ سەريالى مۋلتفيلمدەردىڭ قارالىمى جاقسىراق.

«ولاردىڭ تانىمالدىلىعى، كوپتەپ، سانمەن ايتقاندا، كوپتەپ كونۆەيەرمەن شىعارادى. كوپ شىعارعان كەزدە ونىڭ اۋقىمى دا كوپ بولادى. بىزگە قازىرگى ساتىدا كەيىپكەردىڭ تانىمالدىلىعىن ارتتىرۋ ءۇشىن، ارينە، سانىن ءوسىرۋ كەرەك»، - دەدى اداي ابەلدينوۆ.