جول قۇرىلىسى ماۋسىمى اياسىندا مينيستر مارات قارابايەۆ باستاعان كولىك مينيسترلىگىنىڭ وكىلدەرى ەل وڭىرلەرىنە تۇراقتى تۇردە جۇمىس ساپارىن جۇرگىزۋدە.
سالا ءمينيسترى جۇمىس ساپارىمەن قىزىلوردا، تۇركىستان وبلىستارى مەن شىمكەنت قالاسىنا باردى. ساپار بارىسىندا مينيستر ءبىرقاتار ينفراقۇرىلىم نىساندارىنىڭ قۇرىلىسىمەن تانىستى، دەپ حابارلايدى Almaty-akshamy.kz.
مەملەكەت باسشىسىنىڭ بىلتىر قازان ايىنداعى قىزىلوردا وبلىسىنا جۇمىس ساپارى اياسىندا بەرگەن تاپسىرماسىنا سايكەس بۇل ۋچاسكەدەگى جۇمىستار اسا ماڭىزدىلىققا يە. مارات قارابايەۆ رەسپۋبليكالىق ماڭىزى بار م-32 "سامارا-شىمكەنت" كۇرە جولىنىڭ "قىزىلوردا-سەكسەۋىل" ۋچاسكەسىندە قولعا الىنعان جۇمىستاردى تەكسەردى. قىزىلوردادان سەكسەۋىلگە دەيىن قايتا قۇرۋ جۇمىستارىمەن 463 شاقىرىم جول قامتىلادى.
سونىمەن قاتار شاقپاق بابا اسۋى ارقىلى وتەتىن ەلمىزدەگى العاشقى اۆتوموبيل تۋننەلىنىڭ قۇرىلىسى قاشان اياقتالاتىنى بەلگىلى بولدى.
"بيىل جازدا شاقپاق بابا اسۋى ارقىلى وتەتىن تۋننەلدىڭ قۇرىلىسىن اياقتاپ، حالىققا پايدالانۋعا بەرۋ جوسپارلانىپ وتىر. بەتون جانە اسفالتبەتون جۇمىستارى تولىعىمەن اياقتالدى، سونداي-اق جارىقتاندىرۋ ورناتىلدى. ءقازىر بەينەباقىلاۋ جانە گاز قۇبىرلارىن وتكىزۋ، جەلدەتۋ مەن ورتكە قارسى قۇرال-جابدىقتار ورناتۋ جۇمىستارى جۇرگىزىلۋدە. باستى جۇمىستار اياقتالدى"، - دەپ اتاپ ءوتتى اۆتوموبيل جولدارى كوميتەتىنىڭ وكىلدەرى.
اشىلعالى جاتقان تۋننەل كولىك جۇرگىزۋشىلەرىنە قىستا شاقپاق بابا اسۋىندا بوراندى كۇندەرى قار قۇرساۋىندا قالىپ كەتپەۋىنە جول اشادى.