تەلەفونمەن ءجيى قال-جاعداي سۇراسىپ تۇرعانىڭمەن، اناڭنىڭ مەيىرىمىنە شومىلىپ، اكەڭنىڭ ءبىر-اق اۋىز قۋاتتى سوزدەرىن ەستىپ قايتقاندى كىم قالامايدى دەيسىز؟!.
بىردە توركىندەپ ۇيىمە باردىم. ادەتتەگىدەي، كەلىنىمىز داستارحانىن جايىپ، قوناقجايلىلىق تانىتتى. ءبىزدىڭ كەلگەنىمىزدى بىلگەن كورشىمىز دە امانداسا كەلىپ، داستارحان باسىنان تابىلدى. شاي ءىشىلدى. اتا-انامىزدى كورىپ، كوڭىل جايلاندى. ەندى ۇلكەن اسقا دەيىن ءبىراز ۋاقىت بار. مۇندايدا بوس وتىراسىڭ با، وتكەن-كەتكەندى ايتىپ، جاعداي سۇراسىپ جاتىرمىز. سودان نە كەرەك، اڭگىمەمىزدىڭ سوڭى «اناڭا قوڭىراۋ شالاسىڭ با؟» دەگەن تاقىرىپقا ويىسىپ، قىزۋ پىكىرتالاسقا ۇلاستى.
– جوووق، مەن اناما مەرەكەلەردە عانا تەلەفون شالامىن. ءوز باسىم، ءجونسىز حابارلاسىپ، مازالارىن المايمىن. بىر-ەكى ايدا ءبىر سويلەسىپ قويامىن، جەتەدى، – دەپ تاكاپپارلانا سويلەدى كورشىمىز.
– قالاي شىدايسىز، سوندا، اناڭىزدى ساعىنبايسىڭ با؟ – دەدىم تاڭدانا.
– ۇيرەنىپ كەتكەنمىن. حابارلاسپاسا، ياعني ءبارى جاقسى دەگەن ءسوز... – دەدى ول سۇراعىمدى ءىلىپ اكەتىپ.
– ال ماعان انام ءوزى حابارلاسىپ تۇرادى. ولار اۋىلدا عوي، – دەدى كەلىنىمىز.
قاسىمدا وتىرعان ءسىڭلىم شىدامادى بىلەم، سوزگە ارالاسىپ:
– ءماسساعان، مەن ولاي ىستەي المايمىن... لاجى بولسا، الىستا بولسا دا كۇندە
حابارلاسىپ، انامنىڭ قال-جايى مەن كوڭىل-كۇيىن سۇرايمىن. سوسىن اناما ءوزىنىڭ الەمدەگى ەڭ كەرەمەت اننا ەكەنىن ايتامىن. «جىلى ءسوز جان سەمىرتەدى».
انام كۇندە تىڭداسا دا، ءبىرىنشى رەت ەستىگەندەي قۋانىپ قالادى. سوسىن اينالىپ-تولعانىپ قياسىنا قونىپ، ءوز بەتىمەن قانات قاققان بالاپانىنا دۇعاسىن جاۋدىرادى. اكەم مەن انامنىڭ بويىندا بالالارى ۇلگى تۇتارلىق كوپ نارسە بار. بارلىق ماسەلەنى ەكەۋى اقىلداسىپ شەشەدى. ءبىرىنسىز ءبىرى اس ىشپەيدى، قايدا بارسا دا جۇبىمەن جاراسىپ، قولتىقتاسىپ كەلە جاتقانىنا سۇيسىنەسىڭ. ەكەۋى سكانۆورد شەشكەندى جاقسى كورەدى. شەمىشكەشە شاققاندا تاڭ قالاسىڭ. وزدەرىنە حوببي. اناممەن حابارلاسقاندا بىر-ەكى اپتاعا جەتەتىندەي گازەت-جۋرنال، سكانۆوردتاردى اپارىپ بەرەتىنىمدى ايتامىن. مىنە، وسى سويلەسكەنىمە بار-جوعى بىر-ەكى مينۋت كەتەدى. ەسەسىنە اناڭنىڭ داۋىسىن ەستيسىڭ، باتاسىنا شومىلاسىڭ. «اينالايىن، ساتتىلىك جولىڭا! اللا جار بولسىن» دەيدى مەيىرلەنىپ.
– ءسىز بىلەسىز بە، انا مەن بالانىڭ اراسىندا كوزگە كورىنبەس ەنەرگيا قۋاتى بولادى. سول قۋاتتىڭ اسەرى مە ەكەن، ايتەۋىر، اناممەن سويلەسكەننەن كەيىن تۇلا بويىمدى ەرەكشە ءبىر سەزىم بيلەپ الا جونەلەدى. مىنە، سول سەزىم كوڭىلىڭە قانات ءبىتىرىپ، تىرشىلىگىڭە سۇڭگىتىپ جىبەرەدى عوي، شىركىن! – دەدى ءسىڭىلىم.
– ءومىر بولعان سوڭ، ءبىر كۇنىڭ ءبىر كۇنىڭە ۇقساماي جاتادى. سول سەبەپتى كەي كەزدەرى بىر-ەكى كۇن حابارلاسپاي قالاتىنىم بولماسا، مەن دە اتا-اناما ءجيى حابارلاسامىن. دەنساۋلىعىن، جاعدايىن سۇرايمىن. اناڭنىڭ كوڭىل-كۇيىن بىلگىڭ كەلسە، داۋىس ىرعاعىنا ءمان بەرسەڭ جەتىپ جاتىر. ءوز باسىم، بىردەن سەزەمىن، – دەدىم مەن اڭگىمەنى تۇيىندەپ.
ايتسە دە كورشىمىزدىڭ سوزدەرىنە ويلانىپ قالدىم. «قالاي اناسىمەن تەك مەرەكەلەردە عانا سويلەسەدى. نەگە انالاردىڭ ءار كۇنىن مەرەكە ەتپەسكە؟!» دەپ.
ەگەر ول ءوز اناسىمەن – بىر-ەكى ايدا ءبىر سويلەسسە، وزگەنىڭ اناسىمەن جىلداپ سويلەسپەۋگە بار عوي. «حابارلاسپاسا، ياعني ءبارى جاقسى دەگەن ءسوز...» دەگەنى نەسى؟!. ومىردە نەشە ءتۇرلى جايتتار بولىپ جاتادى. بالكىم، ونىڭ اناسى قاندايدا ءبىر كومەككە ءزارۋ شىعار. مۇمكىن، سىرقاتتانىپ جاتقان بولار، ءبارى مۇمكىن عوي. كوپ انالار ونداي ساتتەردە «بالام ۋايىمداماسىن» دەپ حابارلاسپايدى، بىلەم. بارلىق انانىڭ بالاسىنا دەگەن مەيىرىمى ءھام ماحابباتى تەڭىزدەي تەرەڭ، اسپانداي بيىك، كۇن نۇرىنداي شۋاقتى ەكەنى اقيقات.
سوندىقتان، انانى ساعىنباۋ استە مۇمكىن ەمەس-اۋ... ماسەلەن، ءقازىر مەن ءۇشىن انام بار كەزدەگى توركىندەپ باراتىن سول كۇندەرىم ساعىنىشقا اينالعان. ەگەر انام بار بولعاندا، بۇگىنگى مەرەكەسىمەن قۇتتىقتاۋعا قۇستاي ۇشىپ بارىپ قايتار ەدىم، اتتەڭ... يسلام عالىمدارىنىڭ ءبىرى: «ءبىر كۇنى اناڭ و دۇنيەگە اتتانادى. انانىڭ بالاعا دەگەن ماحابباتى وزىمەن بىرگە كەتەدى. ءبىلىپ قوي، انانىڭ و دۇنيەگە اتتانۋىمەن، سەن ءۇشىن «ءجاننات ەسىكتەرىنىڭ» ءبىرى جابىلادى. ەگەردە سەنىڭ اناڭ
ءتىرى بولسا، ونى جالعىز قالدىرما. الىستا بولسا دەرەۋ حابارلاس، ۇيدە بولسا تەزىرەك بارىپ، ماڭدايىنان ءسۇي! قولىڭنان كەلگەنشە اناڭا جاقسىلىق جاسا. ول قانداي ءسوز ايتسا دا، اناڭدى رازى قىلۋعا تىرىس. ەشۋاقىتتا اناڭا اشۋلانبا. ونىڭ ساعان دەگەن ماحابباتى ورنالاسقان «جۇرەگىن» جارالايتىن اۋىر سوزدەر ايتۋشى بولما!» دەگەن ەكەن. ەندەشە، انالارىڭىزدى بارىندا باعالاڭىزدار! ويتكەنى، بۇل ومىردە انانىڭ مەيىرىمى مەن ايالى الاقانىنا، ىستىق قۇشاعىنا ەشتەڭە جەتپەيدى.
ماسەلەن، ءسىز بۇگىن اناڭىزبەن حابارلاستىڭىز با؟ ەگەر ءالى سويلەسپەسەڭىز، ءدال ءقازىر تەلەفون شالىڭىز، قۋانىپ قالسىن. بۇگىنگى انالار كۇنى مەرەكەسىمەن قۇتتىقتاۋدى دا ۇمىتپاڭىز! ايتپەسە، مۇنداي ءساتتىڭ ءبىر كۇندەرى مۇمكىن بولمايتىنى انىق...