بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ايتتى.
زەينەتكە ەرتە شىققىسى كەلەتىن ازاماتتاردىڭ ەڭبەك ءوتىلى 25 جىلدان كەم بولماۋى كەرەك، دەپ حابارلايدى aqshamnews.kz
«بۇگىنگى تاڭدا ءبىزدىڭ قوعامدا بىرنەشە سۇراق تالقىلانىپ جاتىر. بۇل - زەينەت جاسىن كۇتپەي، زەينەتكە ەرتە شىعۋ. بۇل سۇراق انالارىمىز، كوپبالالى انالارىمىز، مۇگەدەكتىگى بار بالالاردى تاربيەلەپ وتىرعان انالارىمىز ءۇشىن وتە ماڭىزدى. بۇل كىسىلەر دە ەرتە زەينەتكە شىعۋ ماسەلەسىن كوتەرىپ وتىر. سونداي-اق مينيسترلىكتىڭ الدىنا زياندى جاعدايدا جۇمىس ىستەيتىن ازاماتتاردى 50-55 جاستان زەينەتكە شىعارۋ ماسەلەسى دە قويىلىپ وتىر»، - دەدى مينيستر.
ءمينيستردىڭ ايتۋىنشا، بۇل حالىقارالىق دەڭگەيدە شەشىمىن تاپقان سۇراقتار.
«مىسالى، زەينەت جاسىنا كەلسە دە، زەينەتكە شىقپاي، جۇمىسىن ءارى قاراي جالعاستىرعان ازاماتتارعا زەينەتاقىسىن تولەمەي، ونى بيۋدجەتتە قالدىرۋ. ال زەينەت جاسىنا جەتپەي، زەينەتكە شىققىسى كەلەتىن ازاماتتارعا بيۋدجەتتەگى سول قارجىنى تولەۋ قاراستىرىلىپ وتىر»، - دەدى ەڭبەكمينى.
بۇل رەتتە زەينەتكە ەرتە شىققىسى كەلەتىن ازاماتتاردىڭ ەڭبەك ءوتىلى 25 جىلدان كەم بولماۋى كەرەك. ياعني وسى ۋاقىت بويى زەينەت جارنالارى اۋدارىمى بولۋى قاجەت. مىسالى، ازامات 20 جاسىنان باستاپ جۇمىس ىستەسە جانە ءتيىستى جارنالارى ۋاقىتىلى اۋدارىلىپ وتىرسا، وندا ول 45 جاسىندا ەرتە زەينەتكە شىعا الادى. ۇسىنىستار ءالى قابىلدانعان جوق، مۇنى ءقازىر مينيسترلىك ءتيىستى ورگاندارمەن بىرلەسە قاراپ جاتىر.