شىمكەنت، تۇركىستان، الماتى قالالارىندا زاڭسىز اراق شىعاراتىن 40 سەح جابىلدى.
ال ماماندار الكوگولدىڭ ادام ومىرىنە ءقاۋىپ توندىرەتىنىن ايتادى. ەلدەگى استىرتىن اراق ءوندىرىسى جاعا ۇستاتارلىق. بۇعان دالەل دە جوق ەمەس. كۇنى كەشە عانا قوستاناي مەن سولتۇستىك قازاقستان وبلىستارىندا مىڭ جارىم ليترگە جۋىق سپيرتتىك ءونىم اينالىمنان شىعارىلدى. جاسىرىن سەحتاردان تاركىلەنگەن ىشىمدىكتەر ارنايى پوليگوندا جويىلدى، دەپ حابارلايدى Almaty-akshamy.kz 24.kz-كە سىلتەمە جاساپ.
كونترافاكتىلى قويما پەتروپاۆل قالاسىندا دا انىقتالدى. بۇل جەردەن 740 ليتر سپيرت، 50 ليتر كونياك قۇيىلعان ىدىس تابىلدى. ال الكوگول قاۋىمداستىعىنىڭ باسشىسى بۇل تۇستا شاعىن دۇكەندەر مەن قالادان شەتكەرى بازارلاردى تەكسەرۋ قاجەتتىگىن ايتادى. ايتۋىنشا، شالعايداعى وڭىرلەردى قويىپ، استانانىڭ وزىندە پلاستيك قۇتىعا قۇيىلعان اراق ساۋدالانىپ جاتىر.
«ءبىز ۇساق ماگازيندەردە كولەڭكەدەگى اراقتىڭ پلاستيك بوتەلكەگە قۇيىلعان ءتۇرىن تاپتىق. وسى استانادان 3 نۇكتە تابىلدى. ءبىز ول تۋرالى ۇكىمەتتىڭ تەكسەرۋ ورگاندارىنا حابارلادىق. اراقتىڭ ءوزىنىڭ زيانىن بىلەمىز. قۇرامىنداعى سپيرت پلاستيك ىدىسقا قۇيىلعاندا، رەاكسياعا ءتۇسىپ، ۋلى زات بولەدى. ادام ودان ۋلانىپ قالۋى مۇمكىن. سوندىقتان ءبىز وسىمەن كۇرەسۋگە اتسالىسىپ جاتىرمىز»، - دەدى «كازالكوتاباك» قاۋىمداستىعىنىڭ پرەزيدەنتى ءامىرجان قالييەۆ.
"ال ارزان دەپ ساپاسىنا باس قاتىرمايتىندار اۋرۋعا دۋشار بولادى"، - دەيدى، يممۋنولوگتار. ءتىپتى جاساندى اراق ءىشۋدىڭ سوڭى ولىمگە اكەپ سوعۋى مۇمكىن.
«جالپى، ىشىمدىكتىڭ ءوزى ادام دەنساۋلىعىنا كەرى اسەر ەتەتىنىن ايتىپ ءجۇرمىز. الايدا، ءقازىر نارىقتا ونىڭ ءتۇر-تۇرى بار. ال، ساپاسىنا كوپشىلىگى باس قاتىرمايدى. استىرتىن ىشىمدىك جاساۋشىلار الكوگولدى الماستىرعىشتاردىڭ باسقا ءتۇرىن قولدانۋى مۇمكىن. مىسالى، مەتيل ءسپيرتى ەتيل سپيرتىنە ۇقساعانىمەن، وتە ءقاۋىپتى. ونىڭ از مولشەرىنىڭ ءوزى ادامدى كوز جانارىنان ايىرادى. ال مولشەرى ارتىپ كەتسە، ولىمگە دۋشار ەتەدى»، - دەيدى يممۋنولوگ رافايل روزەنسون.
ال سانيتارلىق باقىلاۋ سالاسىنىڭ ماماندارى ءونىم ساپاسىن تەكسەرىپ وتىراتىنىن ايتادى. بيىل 1100-دەن استام الكوگول ونىمدەرىنە زەرتتەۋ جۇرگىزگەن. وسى ءونىمنىڭ 3 پايىزى كۇمان تۋعىزعان. سەبەبى تاڭبالانۋىندا ناقتىلىق جوق. دەمەك، قۇرامى كۇماندى.
«ءاربىر تۇتىنۋشى الكوگولدىك ءونىمدى العاندا، ءبىرىنشى تاڭبالانۋىنا، ەتيكەتكاسىنا قاراۋ كەرەك. ول ءونىم قاي جەردە شىقتى، ءوندىرۋشىنىڭ اتاۋى، مەكەنجايى، ساقتالۋ مەرزىمى، قۇرامى - ءبارى بولۋ كەرەك. تولىق اقپارات بولماسا، شەت تىلىندە جازىلعان نەمەسە مەملەكەتتىك اۋدارماسى بولماسا، بۇل زاڭ بۇزۋشىلىق بولىپ تابىلادى. بولماعان جاعدايدا ساۋدا ورنىنان ءونىمنىڭ قاۋىپسىزدىگى تۋرالى قۇجاتىن سۇراۋ كەرەك»، - دەيدى قالالىق تەحنيكالىق رەگلامەنتتەر تالاپتارىن باقىلاۋ ءبولىمىنىڭ باسشىسى قارلىعاش ابدىشيەۆا.
"استىرتىن اراق ءوندىرىسى جويىلماي، ءقاۋىپ سەيىلمەيدى. بۇل، ءبىر جاعىنان، الكوگولدىڭ زاڭدى نارىعىن تىعىرىققا تىرەيدى"، - دەيدى ماماندار.