جالپى، ىندەت جۇقتىرعاندار سانىنىڭ كوبەيۋى 20 ماۋسىمنان باستالعان.
دەنساۋلىق ساقتاۋ ءمينيسترى اجار عينيات قازاقستان ۇكىمەتىنىڭ وتىرىسىندا ەلدەگى ەپيدەميولوگيالىق احۋال تۋرالى باياندادى، دەپ حابارلايدى Almaty-akshamy.kz
دەنساۋلىق ساقتاۋ ءمينيسترىنىڭ ايتۋىنشا، 20 ماۋسىمنان باستاپ رەسپۋبليكا بويىنشا كۆي جۇقتىرۋ كورسەتكىشى وسە باستاعان. كەيىنگى ەكى اپتادا ۆيرۋس جۇقتىرعاندار سانى 3،2 ەسەگە ءوستى.
«كەيىنگى تاۋلىكتە كۆي-دىڭ وڭ ناتيجەسىمەن 2021 جاعداي، كۆي-دىڭ تەرىس ناتيجەسىمەن 1 جاعداي تىركەلدى، ءولىم-جىتىم تىركەلگەن جوق. باعالاۋ ماتريساسىنا سايكەس، نۇر-سۇلتان قالاسى "سارى" ايماقتا، قازاقستان رەسپۋبليكاسى جانە قالعان وڭىرلەر "جاسىل" ايماقتا تۇر. ءقازىر ينفەكسيالىق توسەك-ورىنمەن قامتۋ 30 پايىز، رەانيماسيالىق توسەك-ورىنمەن قامتۋ 7 پايىز. ءقازىر 5 ميلليوننان اسا ادام ريەۆاكسينالاۋدان ءوتتى (ريەۆاكسينالاۋعا 7 ميلليون 430 مىڭ ادام جاتادى)، بۇل ءتيىستى كونتينگەنتتىڭ 68 پايىزى»، - دەدى دەنساۋلىق ساقتاۋ ءمينيسترى.
سونىمەن قاتار، ۇكىمەت وتىرىسىندا پرەمەر-مينيستر ءاليحان سمايىلوۆ كوروناۆيرۋس ينفەكسياسىن جۇقتىرۋدىڭ الدىن الۋ شارالارىن ساقتاپ، دەنساۋلىق ساقتاۋ مينيسترلىگىنە جاعدايدى قاتاڭ باقىلاۋدا ۇستاۋىن تالاپ ەتتى.
«جالپى، كوروناۆيرۋس ينفەكسياسىن جۇقتىرۋدىڭ، اسىرەسە، ەلوردادا جانە قاراعاندى وبلىسىندا كوبەيگەنىن كورىپ وتىرمىز. كۇن سايىن رەسپۋبليكا بويىنشا 3 مىڭعا دەيىن جاعداي تىركەلەدى. بۇل - وتە جوعارى كورسەتكىش. شەكتەۋ شارالارىنىڭ ساقتالۋىن قامتاماسىز ەتۋ كەرەك. ماسكا تاعۋ، الەۋمەتتىك قاشىقتىقتى ساقتاۋ سياقتى الدىن الۋدىڭ نەگىزگى شارالارى قاتاڭ ساقتالۋى كەرەك. ۆاكسينالاۋ مەن ريەۆاكسينالاۋدىڭ تومەن قارقىنى ەپيدەميولوگيا جاعدايىنىڭ كۇرت ناشارلاۋىنا الىپ كەلەدى. سوندىقتان اكىمدىكتەرگە حالىقتى ۆاكسينالاۋ جانە ريەۆاكسينالاۋ جۇمىستارىن جانداندىرۋدى تاپسىرامىن»، - دەدى پرەمەر-مينيستر ءاليحان سمايىلوۆ.