ق ر وقۋ-اعارتۋ ءمينيسترى جۇمىس ساپارىمەن الماتىعا كەلدى.
مۇندا ارنايى جانە ينكليۋزيۆتى ءبىلىم بەرۋ ماسەلەلەرى بويىنشا عىلىمي قوعامداستىق پەن ۇكىمەتتىك ەمەس ۇيىمداردىڭ وكىلدەرىمەن كەزدەسۋ ءوتتى، دەپ حابارلايدى Almaty-akshamy.kz وقۋ-اعارتۋ مينيسترلىگىنە سىلتەمە جاساپ.
كەزدەسۋ بارىسىندا 2024 جىلعا ارنالعان جۇمىس جوسپارى تۋرالى ق ر وقۋ-اعارتۋ مينيسترلىگى ارنايى جانە ينكليۋزيۆتى ءبىلىم دەپارتامەنتىنىڭ ديرەكتورى لاۋرا بۋتابايەۆا ايتىپ بەردى. ەرەكشە ءبىلىم بەرۋ قاجەتتىلىكتەرى بار بالالارعا ەرتە كومەك كورسەتۋ ماقساتىندا بۇگىنگى تاڭدا پسيحولوگيالىق-پەداگوگيكالىق تۇزەتۋ كابينەتتەرىنىڭ سانىن ارتتىرۋ بويىنشا جۇمىس جۇرگىزىلۋدە. ءقازىر ەلىمىزدە 215 پپتك جۇمىس ىستەيدى، 2024 جىلى قوسىمشا 9 تۇزەتۋ كابينەتىن اشۋ جوسپارلانۋدا. قازىرگى كۇنى مەكتەپتەردە 700-دەن استام ينكليۋزيانى قولداۋ كابينەتى جۇمىس ىستەيدى، 2024 جىلى ولاردىڭ سانى تاعى 57 بىرلىككە ۇلعايتىلاتىن بولادى. سونىمەن قاتار، بيىل 14 پمپك اشۋ جوسپارلانۋدا.
دوڭگەلەك ۇستەلدە ءسوز سويلەگەن ق ر وقۋ-اعارتۋ ءمينيسترى عاني بەيسەمبايەۆ ينكليۋزيۆتى ءبىلىم بەرۋ جۇيەسىن دامىتۋ مەملەكەتتىك ساياساتتىڭ باسىم باعىتتارىنىڭ ءبىرى ەكەنىن اتاپ ءوتتى. بۇل باعىتتى دامىتۋدىڭ ماڭىزدىلىعىن تۇسىنە وتىرىپ 2023 جىلدىڭ جەلتوقسانىندا مينيسترلىك قۇرىلىمىندا ارنايى جانە ينكليۋزيۆتى ءبىلىم دەپارتامەنتى اشىلدى.
«ارنايى ءبىلىم ءار بالامەن جەكە جۇمىس جاساۋدى، ءار بالاعا نازار اۋدارۋدى قاجەت ەتەدى. وسى ماقساتتا ۇلتتىق ۇزدىكسىز ينكليۋزيۆتى ءبىلىم بەرۋ ورتالىعىن ىسكە قوسۋ جوسپارلانۋدا. سونىمەن قاتار ءبىز كادرلاردى دايارلاۋ جانە قايتا دايارلاۋ ماسەلەسىن قاراستىرامىز. سوندىقتان پەداگوگتەر وقىتاتىن جوعارى وقۋ ورىندارىنىڭ باعدارلامالارىنا «ينكليۋزيۆتى ءبىلىم بەرۋ» ءمودۋلىن قوسۋ جوسپارلانىپ، پەداگوگتەر ءۇشىن بىلىكتىلىكتى ارتتىرۋدىڭ جاڭا كۋرستارى ازىرلەنۋدە»، — دەدى عاني بەيسەمبايەۆ.
دوڭگەلەك ۇستەل بارىسىندا عىلىمي قوعامداستىق وكىلدەرى: پەداگوگيكا عىلىمدارىنىڭ دوكتورى، پروفەسسور روزا سۇلەيمەنوۆا، دوسەنت، پەداگوگيكا جانە پسيحولوگيا ينستيتۋتىنىڭ ديرەكتورى، پەداگوگيكا عىلىمدارىنىڭ كانديداتى عاليا ابايەۆا، سونداي-اق ۇكىمەتتىك ەمەس ۇيىمداردىڭ باسشىلارى ءسوز سويلەدى. ولاردىڭ قاتارىندا «دارا» قورىنىڭ «قازاقستاندا ينكليۋزيۆتى قوعام قۇرۋ» جوباسىنىڭ ۇيلەستىرۋشىسى ساۋلە دۇيسەمبەكوۆا، بولات وتەمۇراتوۆ قورىنىڭ ديرەكتورى مارات ايتماعامبەتوۆ تە بار.
شارا سوڭىندا ق ر وقۋ-اعارتۋ ءمينيسترى عاني بەيسەمبايەۆ دەپارتامەنت ديرەكتورىنا ەلىمىزدەگى ينكليۋزيۆتى ءبىلىم بەرۋدى دامىتۋدىڭ ستراتەگيالىق جوسپارىن ازىرلەۋدى تاپسىردى.