قمدب «زەكەت جانە قايىرىمدىلىق» قورىنىڭ «ەل ۇلەسى – پاتەرگە» قايىرىمدىلىق اكسياسى اياسىندا 2023 جىلى باسپاناعا مۇقتاج 91 وتباسىعا پاتەر كىلتى تابىستالدى.
بۇل تۋرالى قور ديرەكتورى ماقساتبەك قايىرعالييەۆ مالىمدەدى، دەپ حابارلايدى Almaty-akshamy.kz قازاقستان مۇسىلماندارى ءدىني باسقارماسىنىڭ سايتىنا سىلتەمە جاساپ.
«2023 جىلى ەلىمىز بويىنشا 780 087 وتباسىعا كومەك بەرىلدى. اتاپ ايتقاندا، «ەل ۇلەسى – پاتەرگە» جوباسى بويىنشا 27 ءدىن قىزمەتكەرىنە جانە 64 مۇقتاج وتباسىعا، جالپى ءبىر جىلدا 91 ءۇيدىڭ كىلتى بەرىلدى. وسىعان دەيىن اتالعان جوبا اياسىندا 715 وتباسى باسپانالى بولدى. «قايىرىمدى جۇما» اكسياسىمەن 39 455 وتباسى كومەك الدى. ال قۇربان ايت مەرەكەسىندە «راببىڭ ءۇشىن قۇربان شال» جوباسى بويىنشا 115 047 وتباسىعا قۇرباندىق ەتى تاراتىلدى. باعدارلىق بايانداماداعى تاپسىرماعا ساي Zeket HUB قويما ورتالىعى جۇمىسىن باستادى جانە جىلدىڭ قورىتىندىسى بويىنشا قورعا قاراستى QAIYRYMDYLYQ JARSHYLARY ەرىكتەلەرىنىڭ 18 وڭىرلىك ەرىكتىلەر فورۋمى ءوتتى» دەدى ماقساتبەك ماقسوت ۇلى.
سونداي-اق «تايقازان» اكسياسى بويىنشا 97 888 وتباسىنا ازىق-تۇلىكپەن كومەك كورسەتىلسە، «قولدان – قولعا» جوباسى اياسىندا 12 736 وتباسى قايىرىمدىلىق كومەك الدى. «جەتىم كورسەڭ جەبەي ءجۇر» جوباسى اياسىندا 4 705 جەتىم بالاعا كومەك بەرىلسە، «مەكتەپكە جول» اكسياسى بويىنشا 22 614 الەۋمەتتىك از قامتىلعان وتباسىلاردىڭ بالالارىنا وقۋ قۇرالدارىمەن كومەك جاسالىندى.
ايتا كەتەيىك، قمدب «زەكەت جانە قايىرىمدىلىق» قورى ءبىلىم جولىنداعى شاكىرتتەرگە، ەلىمىزدەگى 9 مەدرەسە، نۇر-مۇباراك ۋنيۆەرسيتەتى مەن حۋسامۋددين اس-سىعاناقي اتىنداعى يسلام ينستيتۋتى، شەتەلدە ءدىني ءبىلىم الىپ جاتقان «تالابا» قاۋىمداستىعى مۇشەلەرىنە ۇدايى كومەك كورسەتىپ كەلەدى. سونداي-اق قور ەرىكتىلەردىڭ اتسالىسۋىمەن ەلىمىزدە جانە تۇركيا، سيريا مەملەكەتىندە بولعان ءارتۇرلى تابيعي اپات، وقىس وقيعالار كەزىندە كوپشىلىككە جاردەم جاسادى.