القالى جيىندا الماتى قالاسى، جەتىسۋ جانە الماتى وبلىستارىنىڭ مەكتەپ ديرەكتورلارى، ءبىلىم باسقارمالارى مەن بولىمدەرىنىڭ باسشىلارى ءبىلىم بەرۋ سالاسىنداعى وزەكتى ماسەلەلەردى تالقىلادى.
2023 جىلعى ءبىلىم سالاسىنداعى بارلىق باقىلاۋ ءىس-شارالارىنىڭ قورىتىندىسى بويىنشا وقۋ-اعارتۋ مينيسترلىگى ءبىرقاتار تەجەۋشى فاكتورلاردى انىقتادى. بۇل، ءوز كەزەگىندە، ۇسىنىلاتىن ءبىلىم بەرۋ قىزمەتتەرىنىڭ، ءبىلىم ساپاسىنىڭ تومەندەۋىنە جانە بالالاردىڭ ءبىلىم الۋ قۇقىقتارىنىڭ بۇزىلۋىنا اكەلەدى. ناتيجەسىندە مينيسترلىك تاراپىنان ادىستەمەلىك ۇسىنىمدار بەرىپ، بارلىق انىقتالعان زاڭبۇزۋشىلىقتاردى جويۋ بويىنشا جۇمىس جاسالدى.
جيىنعا رەسپۋبليكالىق كادر رەزەرۆىنىڭ مۇشەلەرى - "ءبىلىم بەرۋدەگى جاڭا وزگەرىستەردىڭ 1000 كوشباسشىسى" باعدارلاماسىنىڭ ءبىرىنشى پلەياداسىنىڭ تۇلەكتەرى دە قاتىستى.
"ءبىلىم بەرۋدەگى جاڭا وزگەرىستەردىڭ 1000 كوشباسشىسى" جوباسى مەنىڭ كوپتەگەن ارىپتەستەرىمە ءوزىنىڭ باعىن سىناۋىنا جاقسى مۇمكىندىك بولدى. باعدارلامانىڭ باسىنان باستاپ ءبىز ىرىكتەۋدىڭ ءارتۇرلى كەزەڭدەرىنەن وتتىك. ەلىمىزدىڭ وزىق مەكتەپتەرىندە وقىدىق جانە تاعىلىمدامادان وتتىك. مەن وسى باعدارلامانىڭ ءبىر بولىگى بولعانىما قۋانىشتىمىن. مەن ەلىمىزدىڭ يگىلىگى مەن وتاندىق ءبىلىم بەرۋدىڭ وركەندەۋى ءۇشىن ودان دا زور قۇلشىنىسپەن جۇمىس ىستەۋگە دايىنمىن" — دەدى الماتى قالاسىنداعى م.ماقاتايەۆ اتىنداعى № 140 گيمنازياسى ديرەكتورىنىڭ وقۋ-تاربيە جۇمىسى جونىندەگى ورىنباسارى داۋرەن ساعىنعالييەۆ.
ەستەرىڭىزگە سالا كەتەيىك، رەسپۋبليكالىق كادر رەزەرۆىنە 208 ۇمىتكەر كىردى. جاڭا بۋىن مەنەدجەرلەرى كادر تاپشىلىعىن شەشۋگە جانە جاڭا مەكتەپتەردى، ونىڭ ىشىندە "جايلى مەكتەپ" ۇلتتىق جوباسى اياسىندا سالىنىپ جاتقان ءبىلىم وشاقتارىن كادرلىق جاعىنان قامتاماسىز ەتۋگە ىقپال ەتەدى دەپ جوسپارلانۋدا.
سونداي-اق، فورۋمدا الماتى قالاسى، الماتى وبلىسى جانە جەتىسۋ وبلىسى مەكتەپتەرىنىڭ باسشىلارى ءسوز سويلەدى. ولار وقۋ-اعارتۋ مينيسترىنە تىكەلەي ساۋالدارىن قويىپ، جاۋاپتارىن الدى. كەزدەسۋگە ەلىمىزدىڭ ءۇش وبلىسىنىڭ ورتا ءبىلىم بەرۋ ۇيىمدارىنىڭ 800 باسشىسى قاتىستى. بۇل ءىس-شارا ەلىمىزدىڭ باسقا وڭىرلەرىندە دە جالعاسادى.