قازاقستان 13-18 قىركۇيەك ارالىعىندا الماتىداعى جاڭا ADD ۇستەل تەننيسى ورتالىعىندا وتەتىن ۇستەل تەننيسىنەن بەدەلدى WTT Contender Almaty حالىقارالىق ءتۋرنيرىن قابىلدايدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
وعان الەمنىڭ 28 ەلىنەن 140 اتلەت قاتىسادى. قازاقستان العاش رەت جۇلدە قورى 75 مىڭ USD قۇرايتىن Contender سەرياسىنىڭ الەمدىك دەڭگەيدەگى ءتۋرنيرىن قابىلدايتىن بولادى.
"قازاقستان ۇستەل تەننيسى فەدەراسياسى ءاردايىم حالىقارالىق فەدەراسيا قامقورلىعىمەن بەدەلدى تۋرنيرلەردى ۇيىمداستىرۋ بويىنشا ۇزاق مەرزىمدى نيەتتەرى تۋرالى مالىمدەگەن بولاتىن. بۇل ءبىزدىڭ ەلىمىزدەگى ۇستەل تەننيسى بويىنشا العاشقى حالىقارالىق وقيعا ەمەس. 2017 جىلى نۇر-سۇلتان قالاسىندا الەمنىڭ ەڭ مىقتى سپورتشىلارىنىڭ قاتىسۋىمەن ITTF World Tour Grand Finals حالىقارالىق ءتۋرنيرى وتكىزىلگەن بولاتىن. وتكەن جىلى ءبىز ITTF International Kazakhstan Open حالىقارالىق ءتۋرنيرىن وتكىزدىك، وندا ءبىزدىڭ سپورتشىلار وزدەرىن جاقسى كورسەتتى. بۇل تۋرنير قازاقستاندىق سپورتشىلارعا ءوز اۋماعىندا بەدەلدى حالىقارالىق تۋرنيرگە قاتىسۋعا بىرەگەي مۇمكىندىك بەرەدى. ءبىز حالىقارالىق فەدەراسيا كورسەتكەن سەنىمدى جوعارى باعالايمىز جانە بۇل ءتۋرنيردى جىل سايىن وتكىزۋدى جوسپارلاپ وتىرمىز"،- دەدى ۇلتتىق ۇستەل تەننيسى فەدەراسياسىنىڭ پرەزيدەنتى دانيار ءابىلعازين.
تۋرنيرگە الەمدىك ۇستەل تەننيسىنىڭ اتاقتى جۇلدىزدارى، ونىڭ ىشىندە وليمپيادا ويىندارىنىڭ بىرنەشە دۇركىن جۇلدەگەرى جانە الەم كۋبوگىنىڭ جەڭىمپازى دميتريي وۆچاروۆ (گەرمانيا)، وليمپيادا ويىندارىنىڭ قولا جۇلدەگەرى لين يۋنجۋ (قىتايدىڭ تايبەيى)، الەم چەمپيوناتىنىڭ كۇمىس جۇلدەگەرى ماتتياس فالك (شۆەسيا)، ەۋروپا چەمپيونى، وليمپيادا ويىندارىنىڭ قولا جۇلدەگەرى دانگ سيۋ (گەرمانيا)، الەم چەمپيوناتىنىڭ قولا جۇلدەگەرى ان دجە-حون (وڭتۇستىك كورەيا) جانە باسقالار قاتىسادى.
ITTF جانە WTT ەرەجەلەرىنە سايكەس، اتالعان تۋرنيردە قازاقستاننىڭ اتىنان 11 ەر سپورتشى جانە 11 ايەل سپورتشى قاتىساتىن بولادى، ولاردىڭ ىشىندە قۇرامانىڭ كوشباسشىسى، ريو-2016، توكيو-2020 وليمپيادا ويىندارىنىڭ قاتىسۋشىسى جانە كوپتەگەن حالىقارالىق ءتۋرنيردىڭ جەڭىمپازى كيريلل گەراسيمەنكو، سونداي-اق حالىقارالىق جارىستاردىڭ بىرنەشە دۇركىن جۇلدەگەرى، جاسوسپىرىمدەر اراسىنداعى ازيا چەمپيوناتىنىڭ قولا جۇلدەگەرى الان قۇرمانعالييەۆ بار.
ءتۋرنيردى تىكەلەي ەفيردە "QAZSPORT" تەلەارناسى مەن ITTF حالىقارالىق فەدەراسياسىنىڭ رەسمي سايتى كورسەتەدى.
قازاقستاننىڭ ۇستەل تەننيسى فەدەراسياسى ءتۋرنيردى ۇيىمداستىرۋعا قولداۋ كورسەتكەنى ءۇشىن ق ر مادەنيەت جانە سپورت مينيسترلىگىنە، ۇلتتىق وليمپيادا كوميتەتىنە، سپورتتى دامىتۋ ديرەكسياسىنا جانە الماتى قالاسىنىڭ اكىمدىگىنە العىس بىلدىرەدى. سونداي-اق باس دەمەۋشى - سامۇرىق - قازىنا، "تۋريزم جانە سپورت يندۋسترياسىن قولداۋ قورى"، "ADD Capital"، "PTC Holding"، "Qazaq Oil"، "قازاقمىس كورپوراسياسى"، "Sulpak"، "Halyk bank" دەمەۋشىلەرىنە جانە ءتۋرنيردىڭ اقپاراتتىق سەرىكتەسى - "QAZSPORT" تەلەارناسىنا العىس بىلدىرەدى.