14-15 قىركۇيەكتە ەلورداداعى تاۋەلسىزدىك سارايىندا وتەتىن الەمدىك جانە ءداستۇرلى دىندەر ليدەرلەرىنىڭ VII سەزىنە دايىندىق كەزەڭى تولىعىمەن اياقتالىپ، باعدارلاماسى مەن بايانداماشىلاردىڭ قۇرامى جاساقتالدى، دەپ حابارلايدى Almaty-akshamy.kz Inform.kz-كە سىلتەمە جاساپ.
سەزدىڭ نەگىزگى تاقىرىبى: «پاندەميادان كەيىنگى كەزەڭدە ادامزاتتىڭ رۋحاني جانە الەۋمەتتىك دامۋىنداعى الەمدىك جانە ءداستۇرلى دىندەر ليدەرلەرىنىڭ ءرولى».
سەزگە قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ قاتىسادى. جاڭارتىلعان مالىمەتتەرگە سايكەس، ءىس-شاراعا الەمنىڭ 60 ەلىنەن 100-دەن استام دەلەگاسيا قاتىسادى.
جالپى سەزد ماڭىزدى قاتىسۋشىلار قۇرامىن جينايدى. ولاردىڭ قاتارىندا ريم پاپاسى فرانسيسك، ءال-ازحاردىڭ جوعارعى يمامى شەيح احماد ات-تايەب، ءيزرايلدىڭ باس اشكەنازي ءراۆۆينى داۆيد لاۋ، ءيزرايلدىڭ باس سەفارسد ءراۆۆينى يسحاك يوسەف، يەرۋساليم پراۆوسلاۆيە شىركەۋىنىڭ پاتريارحى فەوۆيل III جانە باسقا دا ءدىني كوشباسشىلار بار.
«VII سەز اياسىندا يسلام، حريستيان ءدىنى (بارلىق ءۇش باعىت – پراۆوسلاۆيە، كاتوليسيزم، پروتەستانتيزم)، بۋدديزم، يۋدايزم، يندۋيزم، داوسيزم، زورواستريزم، سينتويزم رۋحاني كوشباسشىلارىنىڭ قاتىسۋى كۇتىلۋدە. وسى جىلى سەزد جۇمىسىنا العاش رەت ءۇندىستاننىڭ ەجەلگى ءدىنى، دجاينيزم وكىلدەرى قاتىسادى.
شارا بارىسىندا كونفەسسيالاردى بىلدىرەتىن ءدىني كوشباسشىلار، سونىڭ ىشىندە بۇرىن قارىم-قاتىناستىڭ كۇردەلى تاريحى بارلار ءبىر ۇستەلگە جينالادى. وسىلايشا، ءدىني ليدەرلەر ىزگى نيەتتىڭ، كەز كەلگەن ايىرماشىلىقتى ەڭسەرۋگە دايىن بولۋدىڭ ۇلگىسىن كورسەتەدى. بۇل سەزدىڭ باستى ميسسياسى»، - دەدى الەمدىك جانە ءداستۇرلى دىندەر ليدەرلەرىنىڭ VII سەزىنىڭ رەسمي وكىلى نازىم جانعازينوۆا.
نازىم جانعازينوۆا ايتقانداي، بۇۇ باسشىلارى، سونداي-اق بەدەلدى حالىقارالىق ۇيىمدار باسشىلارىنىڭ سەزدىڭ جۇمىسىنا قاتىسۋدىڭ ماڭىزى زور. ماسەلەن، سەزد دەلەگاتتارىنىڭ اراسىندا بۇۇ باس حاتشىسى انتونيۋ گۋتەرريش، يسلام ىنتىماقتاستىعى ۇيىمىنىڭ (يىۇ) باس حاتشىسى حۋسەين يبراحيم تاحا، يسلام ءبىلىم بەرۋ، عىلىمي جانە مادەني ۇيىمىنىڭ (يسەسكو) باس ديرەكتورى ساليم بين مۇحاممەد ال-مالىك، پارلامەنتارالىق وداق ءتوراعاسى دۋارتە پاشەكۋ، بۇۇ باس حاتشىسىنىڭ وركەنيەت اليانسى جونىندەگى جوعارعى وكىلى ميگەل موراتينوس جانە ت.ب. بار.