ەلىمىزدە ۇشاق بيلەتتەرى ارزاندايدى

كەلەسى جىلدان باستاپ ەلىمىزدە اۋە كولىگىنە بيلەت قۇنى ارزاندايدى.

بۇل تۋرالى يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

سەناتتىڭ جالپى وتىرىسىندا جۋرناليستەر قازاقستاندا اۋە بيلەتتەرىنىڭ نەگە قىمبات ەكەنىن سۇرادى.

«باعا بەلگىلەۋدىڭ ديناميكالىق جۇيەسى بار. ءۇش اي بۇرىن ساتىپ الساڭىز، بيلەت 12-15 مىڭ، ءقازىر ساتىپ الساڭىز، 50-60 مىڭ، ودان دا جوعارى بولۋى مۇمكىن»، - دەپ جاۋاپ بەردى قايىربەك وسكەنبايەۆ.

سونداي-اق ول قازاقستاننىڭ ارزان اۆياكومپانيالاردى تارتۋ باعىتىندا اتقارىلىپ جاتقان جۇمىستارى جونىندە ايتتى.

«ءقازىر ءتيىستى جۇمىستار اتقارىلىپ جاتىر. بىزدە ۇلتتىق وپەراتور سەگمەنتى بار، سونداي-اق لوۋكوستەر سەگمەنتى ەسكەرىلگەن. اتاپ ايتقاندا، «اشىق اسپان» رەجيمى اياسىندا جولاۋشىلاردى تاسىمالداۋعا قاتىستى ءتيىستى رۇقسات تاسىلدەرىن ەنگىزەمىز. ماسەلەن، لوۋكوستەرلەر ءبىر ەلدەن ۇشىپ كەلىپ، ءبىزدىڭ ەل ارقىلى باسقا مەملەكەتكە ساپارلاي الادى، ياعني ەۋروپاعا نەمەسە تۇركياعا اۋە كولىگىمەن بارۋ مۇمكىندىگى قامتىلماق. لوۋكوستەر بولعاندىقتان، بيلەت قۇنى الدەقايدا ارزان بولادى. بۇل قادامداردى كەلەسى جىلدان باستاپ ىسكە اسىرۋ جوسپارلانىپ وتىر»، - دەدى مينيستر.

ول لوۋكوستەر اۋەكومپانيالارىنىڭ قىزمەتى باسقاشا بولاتىنىن، ءبىراق قازاقستاندىقتار الەم مويىنداعان اۋە كومپانيالارىندا ۇشا الاتىنىن ءتۇسىندىردى.