«دوس-مۇقاسان» ءانسامبلىنىڭ نەگىزىن قالاۋشى جانە ونىڭ العاشقى جەتەكشىسى دوسىم سۇلەيەۆ ءوزىنىڭ 1974 جىلعى گيتاراسىن XIII قىسقى قايىرىمدىلىق بالىنىڭ اۋكسيونىنا تاپسىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ونىڭ ايتۋىنشا، بۇگىنگە دەيىن حالىق ءسۇيىپ تىڭدايتىن «جان دوسىم» ءانىنىڭ مۋزىكاسى ءدال وسى گيتارامەن جازىلعان.
«ءبىز بۇل گيتارانى ستۋدەنت كەزىمىزدە اۋىلشارۋاشىلىق جۇمىستارىنان تاپقان ەڭبەكاقىمىزعا ساتىپ الدىق. ول كەزدە جاتاقحانادا تۇردىق. وندا ەلەكتر گيتارا نەمەسە فورتەپيانو كىرگىزە المايتىنبىز. سوندىقتان، قاراپايىم گيتارا ساتىپ الدىق. بۇل اسپاپپەن جاتاقحانادا بىرگە تۇرعان قىزدارعا ارناپ ءان ايتاتىنبىز. بىزدە ءۇش گيتارا بولدى. بۇل – ءبىزدىڭ سوڭعى ساتىپ العان اسپابىمىز»، - دەدى دوسىم سۇلەيەۆ.
ول وسى گيتارانى وعان ماسكەۋگە وقۋعا كەتەر كەزدە مۋزىكا ونەرىن ۇمىت قالدىرماس ءۇشىن انسامبل مۇشەلەرى سىيعا تارتقانىن اتاپ ءوتتى. بۇل ۋاقىتتاردا دوسىم سۇلەيەۆتىڭ «توي جىرى»، «الماتى ءتۇنى» سياقتى اندەرى تىڭدارماندار اراسىندا تانىلىپ ۇلگەرگەن ەدى. كەيىن ماسكەۋدە ءجۇرىپ، جولداستارى سىيلاعان وسى اسپاپپەن «جان دوسىم» ءانىن جازعان
«ەگەر ادام جاستارعا، بالالارعا جانە ولاردىڭ بولاشاعىنا ءمان بەرمەسە، وندا ونىڭ اقىلى جوق. ال ەگەر، بالالارعا اياۋشىلىق، جاناشىرلىق تانىتپاسا، وندا ونىڭ جۇرەگى جوق. سوندىقتان، مەن وسى شاراعا قاتىسىپ وتىرمىن. ءانسامبلدىڭ ءبىرىنشى جەتەكشىسى رەتىندە توپ اتىنان ءبىز ءۇشىن جادىگەرگە اينالعان زاتتاردى تاپسىرعىم كەلەدى. ونى «بولاشاق» قورى ءوز اۋكسيونىندا ناقتى قۇنىنان قىمبات باعاعا ساتىپ، تۇسكەن اقشانى اسا اۋىر سىرقاتتارى بار بالالاردىڭ ەمىنە باعىتتايدى»، - دەپ توقتالدى دوسىم سۇلەيەۆ.
«بولاشاق» قايىرىمدىلىق قورىنىڭ مالىمەتىنشە، 10 جىل ىشىندە 800 ملن تەڭگەدەن استام قاراجات جينالىپ، وعان 70 مامانداندىرىلعان وڭالتۋ مەكەمەسى مەن 46 ينكليۋزيۆتى قولداۋ كابينەتى اشىلعان. سونداي-اق، اۋتيزم جانە باسقا دا دامۋ ەرەكشەلىكتەرى بار 700-دەن استام بالا مەن تۇرمىسى ناشار وتباسىلاردىڭ بالالارىنا كومەك كورسەتىلگەن.
ايتا كەتەيىك، دوسىم سۇلەيەۆتىڭ گيتاراسى 8 جەلتوقساندا استانادا وتەتىن XIII قىسقى قايىرىمدىلىق بالىندا اۋكسيونعا شىعارىلادى.