ديماشتىڭ جانكۇيەرلەرى قازاقستان حالقىنىڭ قۇرمەتىنە مۋزىكالىق تۋىندى ارنادى

ءچيليدىڭ بارلىق جانكۇيەرلەرى ءۇشىن ماڭىزدى وقيعا بولدى.

برازيليا استاناسى برازيليادا وتكەن قازاق جازۋشىسى، دراماتۋرگ، عالىم مۇحتار اۋەزوۆكە ارنالعان كونفەرەنسيادا ديماش قۇدايبەرگەننىڭ چيليلىك جانكۇيەرلەرى بەلسەندىلىك تانىتتى، دەپ حابارلايدى Almaty-akshamy.kz dimashnews.com سايتىنا سىلتەمە جاساپ.

مۇحتار اۋەزوۆتىڭ 125 جىلدىعىنا ارنالعان ءىس-شارا 16 قاراشادا وتكەن. كونفەرەنسيا بارىسىندا قازاق ءتىلى ءپانىنىڭ وقىتۋشىسى، تۇركىتانۋ فاكۋلتەتىنىڭ اسپيرانتى مارسيا كاسترو بارشا قاتىسۋشىلارعا جازۋشىنىڭ ءومىر جولى مەن ايگىلى «اباي جولى» رومانى تۋرالى ماعلۇمات بەردى.

شارانى ۇيىمداستىرۋشىلار «قازاقستان-چيلي دوستىعى قوعامى» قۇرىلعانىن رەسمي تۇردە جاريالادى. بۇل تۋرالى بۇعان دەيىن قازاقستاننىڭ چيليدەگى ەلشىسى بولات ءنۇسىپوۆ مالىمدەگەن. چيليلىك جانكۇيەرلەر وزدەرىنىڭ ۇلتتىق ءبيىن – مۋزىكاسى مەن ءماتىنى وسى ماڭىزدى وقيعاعا ارنايى جازىلعان كۋەكانى ۇسىندى.

«ديماش ءارقاشان بۇكىل الەمنەن Dears-تى قازاقستانعا قوناققا شاقىرادى، سوندىقتان ءبىزدىڭ «قازاقستان – باتىل حالىق» اتتى كۋەكامىز (ۇلتتىق بي) ءچيليدىڭ بارلىق جانكۇيەرلەرى ءۇشىن ماڭىزدى وقيعا بولدى. بۇل قۋەكا ءبىزدىڭ سۇيىكتى ورىنداۋشىمىزدىڭ وتانىنا ءبىر كۇنى بارۋ دەگەن اسىل ارمانىمىزعا بۇرىنعىدان دا جاقىنداعانىمىزدى سەزىندىرەدى»، - دەيدى جوبا اۆتورلارى كلاۋديا لوبوس پەن كارمەن ساندوۆال.