ىشكى نارىقتا ۇن ساتىلىمى 21 پايىزعا تومەندەگەن.
ۇن باعاسى جىلدىق ەسەپتە بىردەن 41 پايىزعا قىمباتتاعان، دەپ حابارلايدى Almaty-akshamy.kz ەnergyprom.kz سايتىنا سىلتەمە جاساپ.
جەتى ايدىڭ قورىتىندىسى بويىنشا، قازاقستاندا ىشكى نارىقتا ۇن ساتىلىمى 21 پايىزعا تومەندەپ، ەكسپورت 25 پايىزعا وسكەن.
ءداندى داقىلدار مەن وسىمدىك ۇنى، سونداي-اق، ۇساق تارتىلعان قوسپالار ءوندىرىسى بيىل قاڭتار مەن تامىز ارالىعىندا 2 ميلليون توننا بولعان. بۇل بىلتىرمەن سالىستىرعاندا، 0،5 پايىزعا از. ال ودان ءبىر جىل بۇرىن ءوندىرىس كولەمى 3،8 پايىزعا تومەندەگەن.
بۇل سالاداعى شىعارىلعان ءونىمنىڭ 1،9 ميلليون توننادان استامى بيداي نەمەسە سۋرجيك ۇنىنا، 138،9 مىڭ تونناسى نان-توقاش ونىمدەرىن دايىنداۋعا ارنالعان قوسپاعا، 7،4 مىڭ تونناسى ۇساق جانە ءىرى تارتىلعان وسىمدىك ۇنىنا كەتكەن.
بيىل قاڭتار مەن شىلدە ارالىعىندا وتاندىق كومپانيالار ءداندى داقىلداردان ۇساق تارتىلعان ۇنعا سۇرانىستى 98،9 پايىزعا، بىلتىر 99،6 پايىزعا قارسى قامتاماسىز ەتكەن. بۇل ءبىر جىلدا 1،2 پايىزعا قىسقارعان، ال يمپورت 2،5 ەسە، ءبىراق تەك 18،8 مىڭ تونناعا دەيىن وسكەن.
ەكسپورت 2022 جىلعى قاڭتار مەن شىلدە ارالىعىندا 935،3 مىڭ توننا بولىپ، 24،9 پايىزعا ارتقان، ال ىشكى نارىقتا ساتىلىم كولەمى 20،5 پايىزعا، 757،5 مىڭ تونناعا دەيىن قىسقارعان.
2022 جىلعى تامىزدىڭ قورىتىندىسى بويىنشا، ۇن باعاسى ءبىر ايدا 4،3 پايىزعا وسكەن، بۇل - 2011 جىلدان باستاپ ۇننىڭ ايلىق دەڭگەيدە قىمباتتاۋىنىڭ ەڭ جوعارى كورسەتكىشتەرىنىڭ ءبىرى. سونىمەن قاتار، 2011 جىلدان باستاپ رەكورد كورسەتكىش بيىلعى ءساۋىر مەن مامىردا تىركەلگەن، ياعني 7،5 پايىز جانە 6،8 پايىز بولعان.
2011 جىلدان باستاپ 2021 جىلعا دەيىن ۇن باعاسىنىڭ ورتاشا ايلىق ءوسىمى 0،8 پايىز بولعان. بيىل قاڭتار مەن تامىز ارالىعىندا ۇن ايىنا ورتا ەسەپپەن 4 پايىزعا قىمباتتاعان.
وڭىرلەر اراسىندا، 2022 جىلعى تامىزدىڭ قورىتىندىسى بويىنشا، ۇن باعاسىنىڭ ەڭ جوعارى ايلىق ءوسىمى پاۆلودار (12،8 پايىزعا)، جەتىسۋ (12،4 پايىزعا) جانە باتىس قازاقستان (11،9 پايىزعا) وبلىستارىندا بايقالعان. ۇن اقمولا (0،3 پايىزعا)، اقتوبە (0،6 پايىزعا) جانە سولتۇستىك قازاقستان (0،8 پايىزعا) وبلىستارىندا ايتارلىقتاي قىمباتتاماعان.