Smart Data Ukimet ارقىلى ءانونيمدى دەرەكتەرگە ەركىن قول جەتكىزۋدى قامتاماسىز ەتۋ قاجەت.
پرەزيدەنت ۇكىمەتكە ەكى جىل ىشىندە جاساندى ينتەللەكتىگە ماماندانعان داتا-ورتالىقتاردىڭ قۇرىلىسىن جۇرگىزۋدى تاپسىردى، دەپ حابارلايدى Almaty-akshamy.kz
"كەلەسى جىلى ۇلتتىق جاساندى ينتەللەكت پلاتفورماسىن ىسكە قوسقان دۇرىس. بۇل باستاما مەملەكەت پەن ءىرى بيزنەس دەرەكتەرىن بىرىكتىرىپ، ولاردىڭ وزەكتىلىگى مەن قولجەتىمدىگىن قامتاماسىز ەتۋگە ءتيىس"، - دەدى توقايەۆ Digital Bridge 2023 فورۋمىنىڭ پلەنارلىق وتىرىسىندا.
مەملەكەت باسشىسى وزىق IT-ينفراقۇرىلىم سيفرلىق يندۋسترياداعى كەلەشەك پروگرەسكە، اتاپ ايتقاندا جاساندى ينتەللەكتىنىڭ دامۋىنا نەگىز قالايتىنىن اتاپ ءوتتى. سوندىقتان ينفراقۇرىلىمدى دامىتقان كەزدە ITء-ونىم ازىرلەۋشىلەردىڭ قاجەتتىلىگى ءاردايىم الدىن الا ەسكەرىلۋگە ءتيىس.
"ەڭ الدىمەن ءبىز ەسەپتەۋىش ورتالىقتاردىڭ قۋاتىن ارتتىرۋىمىز قاجەت. ۇكىمەتكە ەكى جىل ىشىندە جاساندى ينتەللەكتىگە ماماندانعان داتا-ورتالىقتاردىڭ قۇرىلىسىن جۇرگىزۋدى تاپسىرامىن"، - دەدى پرەزيدەنت.
ايتۋىنشا، بۇل ىسكە Amazon، Google، Mastercard جانە Citigroup سياقتى الەمگە تانىمال كومپانيالاردى تارتۋعا بولادى.
"جاقىندا نيۋ-يورك قالاسىنا جاساعان ساپارىمدا اتالعان كومپانيالاردىڭ باسشىلارىمەن كەزدەستىم. ءتيىستى ۋاعدالاستىقتارعا قول جەتكىزدىك. سونىمەن قاتار جاساندى ينتەللەكتىگە ارنالعان دەرەكتەر ەكوجۇيەسىن دامىتۋ ماڭىزدى. شىن مانىندە، جاساندى ينتەللەكتىنىڭ "قورەگى"، قوزعاۋشى كۇشى – ۇلكەن دەرەكتەر قورى. قازاقستاندا وسى سالادا ءتۇرلى شەشىمدەر جۇزەگە اسىرىلدى"، - دەپ جالعاستىردى ءسوزىن پرەزيدەنت.
توقايەۆتىڭ ايتۋىنشا، مەملەكەتتىك ورگانداردا جيناقتالعان ۇشى-قيىرسىز دەرەكتەر قورىنا قولجەتىمدىلىك شەكتەۋلى بولۋىنا بايلانىستى ونىڭ الەۋەتى ءالى تولىق پايدالانىلماي وتىر.
"بۇل جەردە اقپاراتتىڭ "اشىقتىق پرەزۋمپسياسىن" باسشىلىققا الۋ كەرەك. Smart Data Ukimet ارقىلى ءانونيمدى دەرەكتەرگە ەركىن قول جەتكىزۋدى قامتاماسىز ەتۋ قاجەت. مەن بۇل جەردە بارلىق اقپاراتتىڭ ءانونيمدى بولعانى ءارى سەنىمدى قورعالعانى ءجون ەكەنىن ايتىپ وتىرمىن. جەكە دەرەكتەردىڭ تارالىپ كەتۋىنە قاتىستى بارلىق ءقاۋىپتى جويۋ كەرەك"، - دەدى مەملەكەت باسشىسى.