احمەت بايتۇرسىن ۇلىنىڭ 150 جىلدىق مەرەيتويى قوستاناي وبلىسىندا كەڭ كولەمدە اتالىپ وتەدى دەپ جوسپارلانىپ وتىر.
ءىس-شارالاردىڭ نەگىزگى بولىگى ساياسي قايراتكەردىڭ تۋعان ولكەسىندە وتەدى. اقكول اۋىلىندا احمەت بايتۇرسىنۇلىنا جانە ءمىرجاقىپ دۋلاتۇلىنا ارنالعان ەسكەرتكىش اشىلادى.
اعارتۋشى احمەت بايتۇرسىن ۇلىنىڭ ەڭبەك جولى مەن ءومىرى بيىل ەرەكشە نازاردا، دەپ حابارلايدى Almaty-akshamy.kz.
وسى ماقساتتا، ءتىپتى، ەكسپەديسيا دا توپتاستىرىلعان. عالىمدار مەن تاريحشىلار قازاقستان،رەسەي جانە ءازىربايجاننىڭ بىرنەشە وبلىستارىندا بولىپ، ونداعى مۇراعاتتاردى زەرتتەپ، ۇلت ۇستازى قىزمەت ەتكەن مەكتەپتەر مەن رەداكسيالاردى ارالايدى. جوبانىڭ قورىتىندىسى بويىنشا دەرەكتى فيلم تانىستىرىلادى.
«ەكسپەديسيانىڭ قورىتىندىسىن ىبىراي التىنسارين اتىنداعى مەكتەپتە شىعارعالى وتىرمىز. سەبەبى كەزىندە وسى مەكتەپتىڭ قابىرعاسىندا قوستاناي پەداگوگيكالىق سىنىبى جۇمىس جاساعان. اتالمىش سىنىپتا احمەت بايتۇرسىن ۇلى قازاق تىلىنەن ساباق بەرگەن ەدى»، - دەيدى ەكسپەديسيا جەتەكشىسى الماس ءابسادىق.
نەگىزگى شارالاردىڭ ءبىرى مۋزەي-ۇيدىڭ اشىلۋى بولماق. وسى ماقساتتا احمەت بايتۇرسىن ۇلى ءومىر ءسۇردى دەگەن بولجام ايتىلىپ جۇرگەن ءۇي ورنىندا جاڭا عيمارات سالىنىپ، ول تاريحي ەكسپوناتتارمەن تولتىرىلادى.