كارتادا 19،4 ملن ازامات تۋرالى دەرەك جيناقتالعان.
1 قىركۇيەكتەن باستاپ الەۋمەتتىك كودەكس جوباسى اياسىندا وتباسىنىڭ سيفرلىق كارتاسى پيلوتتىق رەجيمدە ىسكە قوسىلادى، دەپ حابارلايدى Almaty-akshamy.kz
اقپاراتتىق جۇيە ازاماتتارعا پرواكتيۆتى فورماتتا، ياعني الۋشىنىڭ ءوتىنىشىن كۇتپەي كومەك كورسەتۋدى كوزدەيدى، بۇل سىبايلاس جەمقورلىق تاۋەكەلدەرىن تومەندەتىپ، مەملەكەتتىك قىزمەتتەردىڭ ساپاسىن جاقسارتۋعا مۇمكىندىك بەرەدى
ەرتەڭ، 1 قىركۇيەكتەن باستاپ الەۋمەتتىك كودەكس جوباسى اياسىندا وتباسىنىڭ سيفرلىق كارتاسى پيلوتتىق رەجيمدە ىسكە قوسىلادى.
وتباسىنىڭ سيفرلىق كارتاسى – بۇل ءارتۇرلى مەملەكەتتىك ورگانداردان الىنعان مالىمەتتەردى جيناقتايتىن، ازاماتتاردىڭ الەۋمەتتىك ءال-اۋقاتىنىڭ دەڭگەيىن ايقىنداۋعا جانە ولارعا پرواكتيۆتى فورماتتا كەپىلدىك بەرىلگەن مەملەكەتتىك قولداۋ كورسەتۋگە مۇمكىندىك بەرەتىن اقپاراتتىق جۇيە.
ەڭبەك جانە حالىقتى الەۋمەتتىك قورعاۋ مينيسترلىگىنىڭ اقپاراتىنشا، سيفرلىق كارتادا 6 ملن وتباسىنا بولىنگەن 19،4 ملن ازامات تۋرالى دەرەكتەر جيناقتالعان.
وتباسىلاردىڭ ءال-اۋقاتى 5 كريتەريي بويىنشا ايقىندالادى:
ەكونوميكالىق ءومىر ءسۇرۋ جاعدايى،
دەنساۋلىق ساقتاۋ قىزمەتتەرىمەن قامتۋ جانە مۇگەدەكتىگى بار ادامداردىڭ بولۋى،
تۇرعىن ءۇي جاعدايلارى،
الەۋمەتتىك جاعدايلار،
ءبىلىم بەرۋ قىزمەتتەرىمەن قامتۋ جانە وتباسى مۇشەلەرىنىڭ ءبىلىم دەڭگەيى.
وتباسىنىڭ سيفرلىق كارتاسىنىڭ جۇمىس ىستەۋ الگوريتمى بىلاي: مەملەكەتتىك قولداۋ شارالارىن الۋعا قۇقىق بەلگىلەنگەن كەزدە، الەۋەتتى الۋشىعا مەملەكەتتىك قىزمەت كورسەتۋگە كەلىسىم الۋ ءۇشىن سمس-حابارلاما جىبەرىلەدى. كەلىسىم العاننان كەيىن الەۋمەتتىك جاردەماقى، تولەم نەمەسە مەملەكەتتىك قولداۋدىڭ وزگە دە ءتۇرى تاعايىندالىپ، اقشا كومەك الۋشىنىڭ بانك شوتىنا اۋدارىلادى.
جوبانى ىسكە اسىرۋ كەزەڭدەرى:
وسى جىلعى 1 قىركۇيەكتەن باستاپ جاردەماقىلار مەن الەۋمەتتىك تولەمدەردىڭ 9 ءتۇرى بويىنشا جاڭا فورماتتا قىزمەتتەر الۋ مۇمكىندىگى ۇسىنىلدى؛
2023 جىلعى 1 قاڭتاردان باستاپ ءتىزىم الەۋمەتتىك قورعاۋ سالاسىنداعى قىزمەتتەرمەن كەڭەيتىلەدى؛
2024 جىلعى 1 قاڭتاردان باستاپ دەنساۋلىق ساقتاۋ جانە ءبىلىم بەرۋ سالالارىنداعى مەملەكەتتىك كەپىلدىكتەر ەنگىزىلەدى؛
2025 جىلدان باستاپ مەملەكەتتىك كەپىلدىكتەردىڭ بارلىق ءتۇرى قامتىلادى.
وتباسىنىڭ سيفرلىق كارتاسىن پيلوتتىق رەجيمدە ىسكە قوسۋعا دايىندىق بارىسىندا ەڭبەك مينيسترلىگى جەلىسى بويىنشا مەملەكەتتىك قىزمەتتەرگە مۇقتاج ازاماتتار انىقتالدى. ال 1 قىركۇيەكتەن باستاپ ولارعا پرواكتيۆتى قىزمەت كورسەتۋ ءۇشىن سمس-حابارلاما جىبەرىلەدى.