توتەنشە جاعدايلار ۆيسە-مينيسترى باۋىرجان سىزدىقوۆ جاڭا زاڭ جوباسى اياسىندا تاۋعا شىققان نەمەسە ورماندى جەرلەرگە شىققان تۋريستەرگە GPS ترەكەر بەرۋ تارتىبىنە تۇسىنىك بەردى، دەپ حابارلايدى اlmaty-akshamy.kz.
اتاپ ايتقاندا، بۇگىن ماجىلىستە ازاماتتىق قورعاۋعا قاتىستى زاڭ جوباسى تانىستىرىلدى. وسى قۇجاتتا تۋريستەردىڭ، ەكسكۋرسانتتاردىڭ، تۋريستىك قىزمەتتى جۇزەگە اسىراتىن ادامداردىڭ، ەلىمىز اۋماعىندا تۇراقتى تۇراتىن ازاماتتار مەن ادامداردىڭ تجم اۋماقتىق ورگاندارىن الداعى ءجۇرىپ-تۇرۋ مارشرۋتتارى تۋرالى حاباردار ەتۋى جونىندەگى مىندەتتەرىن ەنگىزۋ ۇسىنىلدى.
باۋىرجان سىزدىقوۆتىڭ ايتۋىنشا، ەلىمىزگە كەلگەن تۋريستەر نەمەسە قازاقستان ازاماتتارى تاۋلى جەرلەردە بارعان كەزدە، اداسىپ كەتىپ جاتادى.
«بۇل تۇرعىدا اتالعان نورمالار زاڭعا ەنسە، تۋريستىك مەكەمەلەر توتەنشە جاعدايلار مينيسترلىگىنىڭ اۋماقتىق بولىمشەلەرىنە ولاردىڭ جۇرەتىن جولدارى مەن باعدارى جايىندا اقپاراتتى بەرۋى كەرەك. ەكىنشىدەن، زاڭعا تاۋەلدى ەرەجەنى قابىلداماقپىز. سونىڭ اياسىندا تۋريستىك اگەنتتىكتەر ادامدى تاۋعا، ورماندى جەرلەرگە الىپ شىقسا، GPS ترەكەرلەردى تۋريستەرگە بەرۋى كەرەك. بۇل قۇرىلعى ءتۋريستىڭ كيىمىنە نەمەسە جۇگىنە بەكىتىلۋى ءتيىس»، - دەدى ۆيسە-مينيستر.
ونىڭ پايىمىنشا وسىنداي تالاپتار اداسىپ كەتكەن ادامداردى تەز تابۋعا مۇمكىندىك بەرەدى.