ەلىمىزدە تاعى ءبىر قارجىلىق پيراميدانىڭ جولى كەسىلدى

سوڭعى ۋاقىتتا ەلىمىزدە قارجىلىق پيراميدالار دا، ولارعا سەنىپ، بارىنان ايىرىلعاندار دا كوبەيىپ كەتتى. 

قازاقستان رەسپۋبليكاسىنىڭ قارجىلىق مونيتورينگ اگەنتتىگىنىڭ مالىمەتىنشە، LV Force قارجى پيراميداسىنىڭ زاڭسىز قىزمەتىنىڭ كەلتىرگەن شىعىنى 450 ملن. تەڭگەدەن اسادى، دەپ حابارلايدى Almaty-akshamy.kz

قارجى مونيتورينگى اگەنتتىگى ازاماتتارعا ق ر اكىمشىلىك قۇقىق بۇزۋشىلىق تۋرالى كودەكسىنىڭ 150-بابىمەن جانە ق ر قىلمىستىق كودەكسىنىڭ 217-بابىمەن قارجى پيراميدالارىن جارنامالاۋ جانە ولاردىڭ قىزمەتىن جۇزەگە اسىرۋ ءۇشىن اكىمشىلىك جانە قىلمىستىق جاۋاپكەرشىلىك قاراستىرىلعانىن ەسكەرتەدى. 

اقمولا وبلىسى بويىنشا قارجىلىق مونيتورينگ اگەنتتىگىنىڭ اۋماقتىق دەپارتامەنتى «LV Force» قارجى پيراميداسىنىڭ زاڭسىز قىزمەتىنىڭ جولىن كەستى. قابىلدانعان شارالاردىڭ ناتيجەسىندە شىمكەنت، الماتى قالالارىندا جانە شىعىس قازاقستان، باتىس قازاقستان، اقتوبە، قىزىلوردا، ماڭعىستاۋ وبلىستارىندا «LV Force» قارجى پيراميداسىنىڭ بولىمشەلەرى جويىلدى. 

قارجى پيراميداسىنا 2000-نان استام ادام الدانىپ قالعان. كەلتىرىلگەن شىعىن 450 ملن. تەڭگەدەن استى. قازىرگى ۋاقىتتا الاياقتىق سحەمانىڭ باستى ۇيىمداستىرۋشىسى 2 ايعا قاماۋعا الىندى.