تىرشىلىك كوزىن قولجەتىمدى ەتۋ ءۇشىن بار كۇش-جىگەردى سالۋ كەرەك.
21 شىلدەدە الماتى اكىمى باقىتجان ساعىنتايەۆ «الماتى» تەلەارناسىنىڭ تىكەلەي ەفيرىندە جوبالاردىڭ ونلاين-پرەزەنتاسياسىن وتكىزدى.بۇل پرەزەنتاسيا بارىسىندا شاھار باسشىسى قالانىڭ كوممۋنالدىق ينفراقۇرىلىمىن دامىتۋ جانە جاڭعىرتۋ، سۋ بۇرۋ جانە سۋمەن جابدىقتاۋ، قالا كوشەلەرىن جارىقتاندىرۋ تۋرالى ايتىپ بەردى. «الماتىباسجوسپارلاۋ» عىلىمي-زەرتتەۋ ينستيتۋتىنىڭ باس ينجەنەرى گۇلنار مايدان قىزى الماتىنىڭ ءبىرقاتار شاعىناۋداندارىندا سۋ قۇبىرى مەن كارىز جۇيەسى مۇلدەم بولماعاندىعىن ايتتى، دەپ حابارلايدى Almaty-akshamy.kz.
«بۇگىندە اۋىز سۋدىڭ ساپاسى مەن قولجەتىمدىلىگى الەمدىك ماسەلەگە اينالىپ وتىر. سەبەبى، حالىقتى ساپالى اۋىز سۋمەن قامتۋ - ەڭ ماڭىزدى الەۋمەتتىك ماسەلەنىڭ ءبىرى. سوندىقتان تىرشىلىك كوزىن قولجەتىمدى ەتۋ ءۇشىن بار كۇش-جىگەردى سالۋ كەرەك دەپ سانايمىن. قالا اكىمى باقىتجان ساعىنتايەۆ كەزەكتى تىكەلەي ەفيرىندە قالا اۋداندارىن سۋ جۇيەسىمەن قامتاماسىز ەتۋ ماقساتىندا سالىنىپ جاتقان جانە جوسپارلانعان ينجەنەرلىك جەلىلەر قۇرىلىسىمەن تانىستىردى. ينفراقۇرىلىمنىڭ ورتالىق ايماقتاردا بىركەلكى دامىماعانىن، الايدا بۇل جاعداي قوسالقى اۋداندار مەن شەت ايماقتارمەن سالىستىرعاندا جاقسى ەكەنىن اتاپ ءوتتى» »، – دەيدى گۇلنار مايدان قىزى.
گۇلنار مايدان قىزىنىڭ ايتۋىنشا، قالانىڭ كەيبىر بولىكتەرىندە ءالى دە تۇراقتى سۋمەن جابدىقتاۋ جوق.
«تۇرعىندار كوشە باعاندارىن نەمەسە بۇرىنعى شارۋا قوجالىقتارىنىڭ جەلىلەرىن پايدالانۋعا ءماجبۇر. ءبىرقاتار شاعىناۋدانداردا سۋ قۇبىرى مەن كارىز جۇيەسى مۇلدەم بولماعان.قالا تۇرعىندارىن ساپالى اۋىزسۋمەن قامتۋ ولاردىڭ ساپالى ءومىر سۇرۋىنە تىكەلەي قاتىستى»، – دەيدى گۇلنار مايدان قىزى.