رەانيماسياعا ءتۇسىپ، قايتىس بولعان پاسيەنتتەردىڭ باسىم بولىگى دەر كەزىندە دارىگەرگە حابار بەرمەي، ءوزىن-وزى ەمدەۋمەن اينالىسقان.
30 جىلدىق تاجىريبەسى بار ينفەكسيونيست دارىگەر، نۇر-سۇلتان قالاسىنىڭ كوپسالالى مەديسينالىق ورتالىعى ديرەكتورىنىڭ ورىنباسارى ساۋلە اتىعايەۆا وسىلاي دەيدى، دەپ حابارلايدى Almaty-akshamy.kz سoronavirus2020.kz سايتىنا سىلتەمە جاساپ.
دارىگەر ءوزىن-وزى ەمدەۋدىڭ قانداي جاعدايعا جەتكىزەتىنىن، رەانيماسياعا قانداي ناۋقاس تۇسەتىنىن، كۆي-مەن اۋىرعاندا الدىمەن نە ىستەۋ كەرەكتىگىن جانە ۆاكسينانىڭ ماڭىزىن تىلگە تيەك ەتتى . ونىڭ ايتۋىنشا، ءوزىن-وزى ەمدەۋمەن بىرنەشە كۇن اينالىسقان اۋىر ناۋقاستار ينفەكسيالىق ستاسيونارلارعا جاتقىزىلادى.
«ينتەرنەتتەگى اقپاراتتار نەگىزىندە بيولوگيالىق قوسپالاردى، شوپتەردى، يممۋنوستيمۋلياتورلاردى پايدالانىپ ەمدەلەتىندەر بار. ولار انتيكواگۋليانتتاردى بىردەن قابىلداپ جاتادى. ونى پايدالى جانە يممۋندىق جۇيەنى نىعايتادى دەپ سانايدى. دەگەنمەن بۇل ۇيدە ەمدەلۋدىڭ ەڭ ءتيىمسىز جانە ەڭ ساۋاتسىز ءتاسىلى. مامانداندىرىلعان مەديسينالىق كومەككە جۇگىنبەۋى ارقىلى ءوز دەنساۋلىعىنا زيان كەلتىرەدى. كوروناۆيرۋستىڭ وتە ءقاۋىپتى ەكەنىن ءتۇسىنۋىمىز كەرەك. ال مۋتاسيالانعان «دەلتا» شتامى تىپتەن جۇقپالى. ياعني، ءوزىڭ عانا ەمەس، جاقىندارىڭنىڭ دا رەانيماسياعا تۇسۋىنە سەبەپ بولۋىڭ مۇمكىن»، - دەيدى ساۋلە اتىعايەۆا.
دارىگەر ناۋقاستار ابدەن اۋرۋ دەندەپ كەتكەن كەزدە عانا مەديسينالىق كومەككە جۇگىنەتىنىن اتاپ ءوتتى.
«جوعارى تەمپەراتۋرا، ەنتىگۋ، دەم الا الماۋ سەكىلدى بەلگىلەرى شىققاندا عانا دارىگەرلەرگە حابار بەرەدى. وكىنىشتىسى، التىن ۋاقىتىن ءوزىن-وزى ەمدەيمىن دەپ جوعالتادى. قانشا دەگەنمەن ستاسيونارلىق ەمدەۋ مەن رەانيماسياعا جەتكىزبەيتىن ۋاقىتى بولدى ەمەس پە؟!» - دەيدى ول.
ماماننىڭ ايتۋىنشا، ناۋقاستاردىڭ باسىم بولىگى اۋىر جاعدايدا كەلىپ، تىنىس الۋ اپپاراتىن قولدانادى.
«وكىنىشكە قاراي، ءوزىن-وزى ەمدەۋدەن كەيىن ءبارى بىردەي امان قالا بەرمەيدى. ءبىز ۋاقىت جوعالتامىز، سالدارىنان ناۋقاستاردى امان الىپ قالۋ مۇمكىن بولماي جاتادى. رەانيماسياعا ءتۇسىپ، قايتىس بولعان پاسيەنتتەردىڭ باسىم بولىگى دەر كەزىندە دارىگەرگە حابار بەرمەي، ءوزىن-وزى ەمدەۋمەن اينالىسقان. ال ايرىقشا ايتا كەتەرلىگى، بۇل ناۋقاستار ۆاكسينا الماعان! ۆاكسينانى تولىعىمەن الىپ، رەانيماسيا توسەگىندە جاتقان بىردە-بىر ناۋقاس بولعان جوق. سەبەبى ءبىز بىلەتىندەي، ۆاكسيناسيا كوروناۆيرۋستىڭ اۋىر تۇرىنەن قورعايدى. ال رەانيماسيادا جاتقان ناۋقاستار ۋاقىتىندا ۆاكسينا الماعانىنا وكىنىپ جاتادى»، - دەيدى ساۋلە اتىعايەۆا.