ەلىمىزدە تاعى ءبىر كاسىپقوي فۋتبول كلۋبى قۇرىلادى

جەزقازعاندا سوناۋ كەڭەستىك كەزەڭدە بۇكىلوداقتىق تۋرنيرلەردە جۇلدە سالعان «ەڭبەك» فۋتبول كومانداسى قايتا قۇرىلماق.

ءقازىردىڭ وزىندە ۇيىمداستىرۋ جۇمىستارى باستالىپ كەتتى. وبلىس اكىمدىگى مەن قازاقستان فۋتبول فەدەراسياسى اراسىندا ەكىجاقتى مەموراندۋمعا قول قويىلدى. كەلىسىمگە سايكەس 2023 جىلدىڭ ناۋرىز ايىنا دەيىن جاڭا كوماندا جاساقتالادى، دەپ حابارلايدى Almaty-akshamy.kz 24.kz-كە سىلتەمە جاساپ. 

"كاسىبي كوماندا مەن باپكەرلىك قۇرامدى قالىپتاستىرۋ تولىعىمەن دەمەۋشىلەر ەسەبىنەن جۇزەگە اسادى. وڭىردەگى فۋتبول ستاديوندارى مەن جاتتىعۋ بازالارىنىڭ دا ماتەريالدىق جاعدايىنا باسا كوڭىل بولىنبەك. جاڭا كوماندانىڭ اتاۋى «ەڭبەك» بولىپ قالۋى نەمەسە وزگەرۋى دە مۇمكىن. ونى جانكۇيەرلەر اراسىندا ساۋالناما جۇرگىزۋ ارقىلى انىقتايدى. فۋتبول كلۋبى الدىنداعى باستى ماقسات – الداعى 2-3 جىلدىڭ ىشىندە قازاقستان پرەمەر-ليگاسىنا شىعۋ"، - دەيدى باسى-قاسىنداعىلار. 

«مەن كەزىندە، 1996 جىلى، «ەڭبەك» كومانداسىندا دوپ تەپكەم. ءبىز كوماندانى 1ء-شى ليگادان جوعارى ليگاعا وتكىزدىك. كەيىنگى جىلدارى كوپتەگەن قيىندىقتار ورىن الدى. سوڭعى 12 جىلدىڭ كولەمىندە بۇل وڭىردە ۇلكەن فۋتبول مۇلدە بولعان جوق. ەندى، مىنە، ءبارىمىز بىرلەسىپ، كۇش بىرىكتىرىپ، قىسقا مەرزىمدە ۇلىتاۋ وبلىسىنداعى كاسىبي فۋتبولدى دامىتامىز دەپ ويلايمىن»، - دەيدى فۋتبول ارداگەرى تالعات بايسۋفينوۆ.