ەلىمىزدە سىبايلاس جەمقورلىققا قارسى ءىس-قيمىل بويىنشا قانداي شارالار قابىلدانىپ جاتىر؟

پرەزيدەنتكە ەلىمىزدە سىبايلاس جەمقورلىققا قارسى ءىس-قيمىل بويىنشا قابىلدانىپ جاتقان شارالار تۋرالى سىبايلاس جەمقورلىققا قارسى قىزمەتتىڭ ەسەبى بەرىلدى، دەپ حابارلايدى Almaty-akshamy.kz اقورداعا سىلتەمە جاساپ. 

مەملەكەت باسشىسىنا ۆەدومستۆونىڭ جۇمىسىندا سىبايلاس جەمقورلىقتىڭ العىشارتتارىن جويۋعا باسا نازار اۋدارىلعانى باياندالدى.

اسحات جۇماعاليدىڭ ايتۋىنشا، سىبايلاس جەمقورلىق تاۋەكەلدەرىنە سىرتتان تالداۋ جۇرگىزۋ كەزىندە جەردى ءبولۋ جانە الماتىنىڭ  قالا قۇرىلىسىن دامىتۋ ءىسىن جوسپارلاۋ بارىسىندا ءجيى قايتالاناتىن زاڭ بۇزۋشىلىقتارعا جول بەرىلگەنى انىقتالدى.

سونىمەن قاتار كەزدەسۋدە مەملەكەت باسشىسىنا ءبىلىم بەرۋ سالاسىنداعى بيۋدجەتتىك وتىنىمدەردى ازىرلەۋ تەتىكتەرىنىڭ جەتىلدىرىلمەگەنىنە، قىزمەتكەرلەردى ءبىر ورتالىقتان ەسەپكە الۋدىڭ بولماۋىنا جانە قارجى جىمقىرۋعا اكەپ سوقتىرعان بۋحگالتەرلىك جۇيەلەردىڭ قازىناشىلىقتاعى دەرەكتەر بازاسىمەن بىرىكتىرىلۋىنە بايلانىستى تاۋەكەلدەر انىقتالعانى جونىندە اقپارات بەرىلدى.

پرەزيدەنت بۇل سالاداعى سىبايلاس جەمقورلىق فاكتىلەرىنىڭ الدىن الۋ ماڭىزدى ەكەنىن جانە پروسەستەردى سيفرلاندىرۋ قاجەتتىگىن ەرەكشە اتاپ ءوتتى.

قاسىم-جومارت توقايەۆقا بيىلعى 6 ايدا 130 نىسانعا تالداۋ جانە مونيتورينگ جۇرگىزىلگەنى، جەمقورلىقتى جويۋعا قاتىستى 1000-نان استام ۇسىنىس ەنگىزىلگەنى تۋرالى مالىمەت بەرىلدى.

كاسىپكەرلىكتى دامىتۋعا كەدەرگى كەلتىرەتىن اكىمشىلىك توسقاۋىلداردى جويۋ ءۇشىن «بيزنەسكە جول» جوباسىن جۇزەگە اسىرۋ ءىسى جالعاسادى. بۇل باستاما قولعا الىنعان ساتتەن بەرى 21 مىڭ بيزنەس سۋبەكتىسىنە كومەك كورسەتىلدى، 400-دەن استام تۇيتكىلدى كەيس شەشىمىن تاپتى.

بۇدان بولەك، اسحات جۇماعالي قاسىم-جومارت توقايەۆقا سىبايلاس جەمقورلىققا قاتىستى ءبىرقاتار زاڭ بۇزۋشىلىقتىڭ، سونىڭ ىشىندە وليگوپوليا وكىلدەرى جاساعان زاڭسىز ارەكەتتەردىڭ جولىن كەسۋ، سونداي-اق كەلتىرىلگەن شىعىنداردى وتەۋ جانە اكتيۆتەردى قايتارۋ شارالارى تۋرالى باياندادى.

جىل باسىنان بەرى ەلىمىزدە 1000-عا جۋىق سىبايلاس جەمقورلىققا قاتىستى قىلمىس تىركەلدى، 700-دەن استام ادام اشكەرەلەندى، ونىڭ 98ء-ى ءتۇرلى دەڭگەيدەگى باسشىلار.

سوتقا دەيىنگى اياقتالعان تەرگەۋ امالدارىنىڭ ناتيجەسى بويىنشا 232،6 ميلليارد تەڭگە وتەلدى.

جالپى، 1،5 جىلدا بيۋدجەتكە جانە كۆازيمەملەكەتتىك سەكتور سۋبەكتىلەرىنە شامامەن 860 ميلليارد تەڭگە كولەمىندە مۇلىكتىك اكتيۆتەر مەن اقشالاي قاراجات قايتارىلدى.

كەزدەسۋ سوڭىندا قاسىم-جومارت توقايەۆ سىبايلاس جەمقورلىققا قارسى جۇيەلى جۇمىستاردى جالعاستىرۋدى، اسىرەسە الەۋمەتتىك ماڭىزى بار سالالارعا باسا ءمان بەرۋدى تاپسىردى. سونداي-اق الدىن الۋ شارالارىنىڭ اسا ماڭىزدى ەكەنىن ايتتى.