ق ر سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ جاپونيانىڭ قازاقستانداعى توتەنشە جانە وكىلەتتى ەلشىسى دجۋن يامادامەن كەزدەستى.
تاراپتار وتاندىق سۋ سالاسىن دامىتۋ باعىتىنداعى ىنتىماقتاستىق مۇمكىندىكتەرىن تالقىلادى، دەپ حابارلايدى Almaty-akshamy.kz سۋ رەسۋرستارى جانە يرريگاسيا مينيسترلىگىنە سىلتەمە جاساپ.
ەلشى سۋ رەسۋرستارىن پايدالانۋ جانە باسقارۋ ماسەلەلەرىمەن اينالىساتىن جەكە مينيسترلىك قۇرۋ باسقا مەملەكەتتەر ءۇشىن ۇلگى بولاتىن وتە ماڭىزدى جانە دۇرىس قادام ەكەنىن اتاپ ءوتتى.
سونداي-اق يامادا مىرزا جاپونيانىڭ قازاقستانمەن ۇزاق مەرزىمدى جانە تولىققاندى ىنتىماقتاستىققا مۇددەلى ەكەنىن مالىمدەدى. ال سۋ تەحنولوگيالارى سالاسىندا جۇمىس ىستەيتىن جاپون كومپانيالارى ەلىمىزدە ءوز جوبالارىن ىسكە اسىرۋعا، اتاپ ايتقاندا، سۋدى قايتا پايدالانۋ باعىتىندا سەرىكتەستىك ورناتۋعا نيەتتى ەكەنىن ايتتى. ەلشى ق ر سۋ رەسۋرستارى جانە يرريگاسيا مينيسترلىگى مەن جاپوندىق كاسىپكەرلەر اراسىندا بايلانىس ورناتۋعا جاردەمدەسۋگە دايىن ەكەنىن ءبىلدىردى.
ءوز كەزەگىندە نۇرجان نۇرجىگىتوۆ مينيسترلىك جاپونيانىڭ سۋ سالاسىن اۆتوماتتاندىرۋ جانە سيفرلاندىرۋ بويىنشا تاجىريبەسىن زەرتتەۋگە نيەتتى ەكەنىن اتاپ ءوتتى، سونداي-اق جاپوندىق ساراپشىلار مەن عالىمداردى تارتۋ ارقىلى قازاقستاندىق مامانداردىڭ بىلىكتىلىگىن ارتتىرۋ ءۇشىن بىرلەسىپ جۇمىس ىستەۋدى ۇسىندى.
سونىمەن قاتار، مينيستر ەلىمىزدە سۋ ايدىندارىن تازارتۋ تەحنولوگيالارىنا سۇرانىس جوعارى ەكەنىن ايتىپ، جاپونياداعى ەڭ ءىرى بيۆا كولىن تازارتۋدى مىسالعا كەلتىردى. سونداي-اق، نۇرجان نۇرجىگىتوۆ جاپوندىق مۇحيتتانۋشى عالىمداردى كاسپيي تەڭىزىنىڭ عىلىمي-زەرتتەۋ ينستيتۋتىمەن بىرلەسىپ جۇمىس ىستەۋگە شاقىردى.
كەزدەسۋ قورىتىندىسى بويىنشا تاراپتار ىنتىماقتاستىقتىڭ مۇمكىندىگى زور باعىتتارىن تالقىلاۋدى جالعاستىرۋعا كەلىستى.
«حالىقارالىق ىنتىماقتاستىق – ءبىزدىڭ مينيسترلىك جۇمىسىنىڭ نەگىزگى باعىتتارىنىڭ ءبىرى. سەبەبى، قازاقستان ترانسشەكارالىق وزەندەرگە تاۋەلدى. الايدا، ءبىز كورشىلەرمەن عانا ەمەس، باسقا مەملەكەتتەرمەن دە بايلانىس ورناتۋعا دايىنبىز. ولاردىڭ تاجىريبەسىن قابىلداۋعا، بىرلەسكەن جوبالاردى ىسكە اسىرۋعا جانە زاماناۋي تەحنولوگيالاردى ەنگىزۋگە نيەتتىمىز. ءبىزدىڭ جاپونيامەن ىنتىماقتاستىعىمىز بەرىك ءارى ناتيجەلى بولادى دەپ ۇمىتتەنەمىز»،
– دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.