ومىرتقا پاتولوگياسىن ەمدەۋدىڭ تاعى ءبىر ءتۇرى تابىلدى.
وتاندىق دارىگەرلەر رەسەيلىك ارىپتەستەرىمەن جاڭا تەحنولوگيانى قولدانۋ ارقىلى ءۇش جاسار بالانىڭ دەرتىنە ەم تاپتى. وپەراسيا جاسالعان ەراسىلدىڭ جاسى 3-تە. دياگنوزى - تۋا ءبىتتى ومىرتقا پاتولوگياسى. ياعني بالاعا ارتىق ومىرتقا بىتكەن. سالدارىنان سكوليوز پايدا بولىپ، سۇيەكتەرى قيسايا باستاعان، دەپ حابارلايدى Almaty-akshamy.kz Qazaqstan.tv-عا سىلتەمە جاساپ.
شۇعىل ەم-دوم جاسالماسا، بالا قيمىلسىز قالۋى مۇمكىن دەپ وتىر ماماندار. مۇگەدەكتىكتەن قۇتقارۋدىڭ جالعىز جولى – وپەراسيا. بۇل سىرقاتتىڭ سىرى وتاندىق دارىگەرلەرگە ءمالىم. ءجيى جاساپ ءجۇر. ويتكەنى كەسەل كوپ بالادا كەزدەسەدى. دەگەنمەن ەراسىلدىڭ ەمى بولەك. رەسەيلىك پروفەسسورلار جاڭا بەكىتۋ مەتالىن ويلاپ تاپقان. ونىڭ ارتىقشىلىعى دا از ەمەس.
«100 پايىزعا دەيىن ومىرتقانى تۇزەي الامىز. ارتىق ومىرتقانى الىپ تاستايمىز. ارى قاراي كەلەشەكتە بالادا ەشقانداي ومىرتقا جاعىنان قيسىقتىق نەمسەسە قانداي دا اۋرۋ شىقپايدى. سالىنعان پلاستينكا 2-3 جىل تۇرادى. بىتكەن سوڭ الىپ تاستالادى»، - دەدى ن.ج.باتپەنوۆ اتىنداعى ۇلتتىق عىلىمي تراۆماتولوگيا جانە ورتوپەديا ورتالىعىنىڭ ءبولىم مەڭگەرۋشىسى سەيدالى ابدالييەۆ.
تۋا ءبىتتى ومىرتقا پاتولوگياسىن انىقتاۋ وڭاي ەمەس. بالا كەزىندە بىردەن بىلىنبەيدى. باستاپقىدا دامۋى، ءجۇرۋى قالىپتى. تەك وسكەن سايىن جاعدايى قيىندايدى. ەراسىل وپەراسيادان كەيىن عانا قۇلان-تازا ايىقتى دەيدى دارىگەرلەر. كوپ ۇزاماي قاتارلاستارى سىندى قالىپتى ومىرگە ورالادى.
«بالانىڭ جاعدايى جاقسى. ءقازىر پالاتاعا جاتقىزدى. ەرەكشە وپەراسيا دەپ ايتتى. سويلەپ، مۋلتفيلمدەر كورىپ، ويىنشىقتارىمەن ويناپ ءجۇر»، - دەيدى ەراسىلدىڭ اكەسى دامير.
دەرتتى دەندەتپەۋ كەرەك. بۇل - دەنساۋلىق قاعيداسى. ومىرتقا پاتولوگياسى دا سولاي. العاشقى جىلدارى ەمدەمەسە، وپەراسيانىڭ ءوزى كومەكتەسە المايدى دەپ وتىر دارىگەرلەر.