ول دەپۋتاتتىق ساۋالىن پرەمەر-مينيستردىڭ ءبىرىنشى ورىنباسارى رومان سكليارعا، باس پروكۋرور بەرىك اسىلوۆقا جولدادى.
ءماجىلىس دەپۋتاتى باقىتجان بازاربەك قازاقستاندىق وليگارحتارعا تيەسىلى بانكتەردى مەملەكەتتىك قولداۋدان ايىرۋدى ۇسىندى، دەپ حابارلايدى Almaty-akshamy.kz
«30 جىلدا نەشە رەت بانكتەردى كۇتقاردىق! حالىقتىڭ قازىناداعى اقشاسىنا تيمۋر قۇلىبايەۆتىڭ، ادىلبەك جاقسىبەكوۆتىڭ جانە باسقا دا وليگارحتار مەن جوعارى شەندىلەردىڭ بانكتەرىن قۇتقارۋدى قاشان دوعارامىز؟ بانكتەردى ەمەس، حالىقتى اشتىق پەن جۇمىسسىزدىقتان قورعاۋ كەرەك. سونىڭ بىردەن ءبىر جولى – بانكتەرگە كەپىلگە قويىلعان اۋىل شارۋاشىلىق جەرلەردى قايتارۋىمىز كەرەك. ول بانكتەردىڭ ارتىندا كىم تۇرعانىن، كىمنىڭ يەلىگىندە وتىرعانىن جانە قانداي جولمەن اۋىل شارۋاشىلىق جەرلەردى كەپىلگە قويىپ جىبەرگەنىن قوعام، حالىق ءبىلۋى قاجەت»، - دەدى باقىتجان بازاربەك.
باس پروكۋراتۋرانىڭ مالىمەتىنشە، بانكتەر مەن كارجى ينستيتۋتتارىنىڭ يەلىگىندە كەپىلدىك رەتىندە 2 ملن گەكتار 3،9 مىڭ اۋىل شارۋاشىلىق ماقساتىنداعى جەرلەر جاتىر.
«ونى بانكتەر جانە قارجى ۇيىمدارى وزدەرى پايدالانبايدى. ولار سول جەرلەردى مەملەكەتتىك مەنشىككە قايتارۋعا اسىقپايدى. وسى بانكتەردە كەپىلگە قويىلعان، قاماۋدا جاتقان 2 ملن گەكتار جەردىڭ ىشىندە ۇلەستىك اۋىل شارۋاشىلىق ماقساتىنداعى جەرلەر بار ەكەنىن حالىق بىلە مە؟ زاڭسىز، جەمقور اكىمدەردىڭ كەسىرىنەن پايلارى، ياعني شارتتى جەر ۇلەستەرىنەن ايىرىلعان اۋىل حالقى تابانىن توزدىرىپ، اقيقات ىزدەۋ جولىندا پايلارىن قايتارۋ ءۇشىن سوتتاسىپ الەك بولىپ ءجۇر. سوتتار تالاپ ارىزدىڭ كوپشىلىگىن قاراۋسىز قالدىرادى نە بولماسا تالاپتىڭ ەسكىرۋ مەرزىمىن قولدانىپ، ۇلەسكەرلەردىڭ جەرلەرىن بانككە كەپىلگە كويۋ تۋرالى كەلىسىم-شارتتارىن بۇزۋ تۋرالى تالاپ ارىزدارىن قاناعاتتاندىرۋسىز قالدىرادى»، - دەدى دەپۋتات.
ونىڭ پىكىرىنشە، ناقتى قادام جاسايتىن ۋاقىت كەلگەن.
«ناقتى جەر رەفورماسىن باستاپ، ەكىنشى دەڭگەيلى بانكتەر مەن قارجى ينستيتۋتتارىنىڭ يەلىگىندەگى جەرلەرگە قامقور بولۋىمىز قاجەت. بۇل دا حالىقتىڭ جەرى ەكەنىن ۇمىتپاۋىمىز قاجەت»، - دەدى باقىتجان بازاربەك.
ول ۇكىمەت پەن باس پروكۋراتۋراعا مىناداي ۇسىنىستار ايتتى:
بىرىنشىدەن، 2025 جىلعا دەيىن قازاقستاندا جەر امنيستياسىن جاريالاپ، شارتتى جەر ۇلەسىنەن تۇراتىن جانە بانكتەردە كەپىلگە قويىلعان جەرلەردى ۇلەسكەرلەرگە قايتادان قايتارۋدى كوزدەيتىن مەملەكەتتىك جوبانى قابىلداۋ كەرەك. ۇلەسكەرلەرگە ەركىن جاۋاپكەرشىلىگى شەكتەۋلى سەرىكتەستىكتەر مەن وزگە شارۋاشىلىق ۇيىمداردان شىعۋدىڭ زاڭدى مۇمكىندىگىن قاراستىرۋ كەرەك.
ەكىنشىدەن، كوممەرسيالىق بانكتەردىڭ يەلىگىندەگى 2 ملن گەكتار كولەمىندەگى جەرلەردى ءماجبۇرلى تۇردە جەر كودەكسىنىڭ 92-94 بابىنا سايكەس مەملەكەتتىك مەنشىككە قايتارۋدى قامتاماسىز ەتۋىمىز قاجەت.
ۇشىنشىدەن، قازاقستاندىقتاردىڭ شارتتى جەر ۇلەسىنەن تۇراتىن جەر پايدالانۋ قۇقىعىن ەكىنشى دەنگەيلى بانكتەردە جانە قارجى ۇيىمدارىندا كەپىلگە قويۋعا موراتوريي ەنگىزۋ.