ولاردىڭ دەنە سالماعى 500 گرامنان باستالادى.
قازاقستاندا جىل سايىن 22 مىڭعا جۋىق نارەستە شالا تۋادى، دەپ حابارلايدى aqshamnews.kz
دەنساۋلىق ساقتاۋ مينيسترلىگىنىڭ مالىمەتىنشە، ەلىمىزدە جىل سايىن 20-22 مىڭ بالا مەرزىمىنەن بۇرىن تۋادى، بۇل بارلىق تۋعان سابيلەردىڭ شامامەن 5%-ىن قۇرايدى. جۇكتىلىگى 36 اپتادان از جانە دەنە سالماعى 2500 گرامنان كەم تۋعان بۇل بالالار ەرەكشە نازار مەن كۇتىم جاساۋدى قاجەت ەتەدى.
«شالا تۋعان نارەستەلەردە اناتوميالىق تۇرعىدان دۇرىس، ءبىراق فۋنكسيونالدى جەتىلمەگەن اعزالارى بار، بۇل ولاردى وتە ءالسىز ەتەدى. مۇنداي بالالاردىڭ تەرىسى وتە جۇقا جانە وسال، تەرى استىنداعى ماي دەڭگەيى تومەن، فۋنكسيونالدى جەتىلمەگەن وكپە، جەتىلمەگەن جۇرەك-قان تامىرلارى جانە اس قورىتۋ جۇيەلەرى، سونداي-اق وتە سەزىمتال ورتالىق نەرۆ جۇيەسى بار»، دەلىنگەن دارىگەرلەردىڭ اقپاراتىندا.
ەلىمىزدە زاماناۋي پەريناتالدىق تەحنولوگيالار دەنە سالماعى 500 گرامنان باستالاتىن جانە سالماعى 1000 گرامنان تومەن جاڭا تۋعان نارەستەلەرگە ءساتتى كۇتىم جاساۋعا مۇمكىندىك بەرەدى. بۇگىندە زاماناۋي جابدىقتارمەن جابدىقتالعان جوعارى مامانداندىرىلعان كەشەندى كومەك كورسەتۋ ءۇشىن 39 پەريناتالدىق ورتالىق جۇمىس ىستەيدى. سونداي-اق مينيسترلىك حالىقارالىق ستاندارتتارعا سايكەس كەلەتىن 12 جاڭا پەريناتالدىق ورتالىق سالۋدى جوسپارلاپ وتىر.
ايتا كەتەيىك، شالا تۋعان نارەستەلەرگە كۇتىم جاساۋ پروسەسى نەوناتولوگتاردى، انەستەزيولوگ-رەانيماتولوگتاردى، مەيىرگەرلەردى جانە باسقا دا بەيىندى مامانداردى قوسا العاندا، مەديسينا قىزمەتكەرلەرىنىڭ بارىنشا نازارى مەن بىلىكتىلىگىن تالاپ ەتەدى. ماسەلەن، ءبىر شالا تۋعان نارەستەگە كۇندەلىكتى كۇتىم جاساۋ 20-دان استام ءارتۇرلى مانيپۋلياسيانى قامتيدى.
قازاقستاندا ددۇ ۇسىنعان ءتيىمدى پەريناتالدىق تەحنولوگيالار مەن انا بولۋ قاۋىپسىزدىگى قاعيداتتارى ەنگىزىلدى. جاڭا تۋعان نارەستەلەرگە رەانيماسيا جانە قارقىندى تەراپيا دامىپ كەلەدى، نەوناتولوگتار جىل سايىن ەل ىشىندە دە، شەتەلدە دە وقىتىلادى. 2023 جىلى ءاربىر جاڭا تۋعان نارەستەنىڭ ءومىرىن ساقتاۋعا باعىتتالعان نەوناتالدىق كومەك كورسەتۋدى ۇيىمداستىرۋ ستاندارتى بەكىتىلدى.
مينيسترلىك مالىمەتىنشە، سوڭعى 15 جىلدىڭ ىشىندە (2008 جىلدان 2023 جىلعا دەيىن) نارەستە ءولىمىنىڭ كورسەتكىشى 3 ەسە، نەوناتالدىق ءولىم 3،3 ەسە تومەندەدى، ال دەنە سالماعى وتە تومەن بالالاردىڭ ءومىر ءسۇرۋ دەڭگەيى 4 ەسە ءوستى. بۇل ناتيجەلەر ورتالىق ازيا ەلدەرىنىڭ اراسىندا ۇزدىك بولىپ تابىلادى.