ەلىمىزدە «سالاماتتى مەكتەپ» جوباسىنىڭ جۇزەگە اسىرىلا باستاعانىنا كوپ بولا قويعان جوق. ايتا كەتەيىك، اتالعان جوبا بالانىڭ مەكتەپتە قالاي تاماقتاناتىنىنان باستاپ، كۇندەلىكتى ءومىر ءسۇرۋ سالتىنا ءمان بەرەتىن سالاۋاتتى ۇرپاق قالىپتاستىرۋ باعىتىن ۇستانعان.
«سالاماتتى مەكتەپ» بويىنشا رەسپۋبليكانىڭ بارلىق وڭىرىندە سەمينارلار باستالعان-دى. سونداي ماڭىزدى باسقوسۋلاردىڭ ءبىرى الماتى قالاسى ءبىلىم باسقارماسىنىڭ قولداۋىمەن
№34 گيمنازيادا ءوتتى. وعان شاھارداعى بارلىق مەكتەپتىڭ تاربيە ءىسى جونىندەگى ورىنباسارلارى، مۇعالىمدەر، مەكتەپ مەدبيكەلەرى مەن سەس ماماندارى، باس-اياعى 200-دەن استام ادام قاتىستى.
سەمينار دەنساۋلىق ساقتاۋ مينيسترلىگى مەن وقۋ-اعارتۋ مينيسترلىگىنىڭ بىرلەسكەن قازاقستان رەسپۋبليكاسىندا مەكتەپ جاسىنداعى بالالاردىڭ دەنساۋلىعىن نىعايتۋ جونىندەگى 2024-2026 جىلدارعا ارنالعان ءىس-شارالار جوسپارى شەڭبەرىندە ۇيىمداستىرىلدى.
سپيكەرلەر – دەنساۋلىق ساقتاۋ مينيسترلىگىنە قاراستى قوعامدىق دەنساۋلىق ساقتاۋ ۇلتتىق ورتالىعىنىڭ بالالار مەن جاستاردىڭ دەنساۋلىعىن نىعايتۋ ءبولىمىنىڭ باس مامانى جانسايا حاميت پەن اتالعان ورتالىقتىڭ جۇقپالى ەمەس اۋرۋلار پروفيلاكتيكاسى ءبولىمىنىڭ باس مامانى ديانا تۇرعىنوۆا مەكتەپ دەڭگەيىندەگى ينديكاتورلار تۋرالى تارقاتتى. ياعني وقۋشىلاردىڭ تاماقتانۋى، فيزيكالىق بەلسەندىلىك، سانيتاريا جانە گيگيەنا تاقىرىپتارى جەكە-جەكە قاۋزالدى. سەبەبى، بۇل ماسەلەلەر ءالى دە وزەكتى بولىپ وتىرعان كورىنەدى.
سونداي-اق، «سالاماتتى مەكتەپ» باستاماسىن ىسكە اسىرۋدىڭ ۇلتتىق مودەلى، نيكوتين مەن تەمەكىگە قاتىستى مەكتەپ ساياساتى تانىستىرىلدى. ءيا، بالالار اراسىنداعى بۋللينگ، تەمەكىگە اۋەستىك، جاسوسپىرىمدەردىڭ ەرتە جىنىستىق قاتىناسقا تۇسەتىن جاعدايلارى دا كەڭىنەن قوزعالدى.
سەمينارعا جينالعاندار ءتورت توپقا ءبولىنىپ، «سالاماتتى مەكتەپ» جوباسىن تالقىلادى. ۇسىنىس-پىكىرىلەرىن ورتاعا سالدى. الماتى ۇستازدارىنىڭ تاراپىنان بالانىڭ دەنى ساۋ، ەڭسەسى بيىك، ساباق ۇلگەرىمى جاقسى بولۋى ءۇشىن مەكتەپ ءىشىنىڭ جارىق بولۋى دا ماڭىزدى ەكەندىگى ايتىلدى. كەيبىر مەكتەپتەردە سپورت زالىنىڭ بارلىق سىنىپقا بىرەۋ ەكەنى، كەم دەگەندە ەكى سپورت زالى بولۋىنىڭ ماڭىزدىلىعى دا قوزعالدى. مەكتەپ اسحانالارىندا ۇستازدىڭ بولەك وتىرىپ تۇستەنەتىن ارنايى ايماعى بولۋى كەرەكتىگى دە تىلگە تيەك بولدى. سونداي-اق، اتا-انالار اراسىندا ءجاسوسپىرىم قىز بالالارعا ادام پاپيللوما ۆيرۋسىنا قارسى ەگىلەتىن ۆاكسينا تۋرالى دا ءتۇسىندىرۋ جۇمىستارىن شيراتۋ كەرەكتىگى ايتىلدى.
بۇل جۇزدەسۋدىڭ «سالاماتتى مەكتەپ» جوباسىن ءتيىمدى جۇزەگە اسىرۋ ءۇشىن وڭىرلىك جانە جەرگىلىكتى ۇيلەستىرۋشىلەر، مەكتەپ وكىلدەرى مەن اتا-انالاردىڭ الەۋەتىن ارتتىرۋدا ماڭىزدى بولعانى انىق.
– 2015 جىلمەن سالىستىرعاندا 2020 جىلى تاڭعى اسقا ءمان بەرەتىن بالالار سانى وسكەن. ياعني 2015 جىلى كۇندە تاڭەرتەڭ تاماقتاناتىن وقۋشىلار سانى 49،4% بولسا، 2020 جىلى بۇل كورسەتكىش 74،5%-عا جەتكەن. دەگەنمەن، بالالاردىڭ كوكونىس پەن جەمىس-جيدەكتى تۇتىنۋ دەڭگەيى كوڭىل كونشىتپەيدى. ماسەلەن، 2015 جىلى كوكونىستى كۇندە تۇتىناتىن جەتكىنشەكتەر سانى 30،2% بولسا، 2020 جىلى بۇل كورسەتكىش نەبارى 3%-عا عانا وسكەن. كۇندە جەمىس جەيتىندەر سانىنا دا 3% عانا قوسىلعان. ايتپاقشى، ءتاتتى شىرىندى كوپ ىشەتىن بالالار دەنساۋلىعى دا الاڭداتادى. ماسەلەن، 2015 جىلى ءتاتتى سۋسىنداردى كۇندە ىشەتىن ورەندەر سانى 10،9% بولسا، 2020 جىلى بۇل كورسەتكىش 16،7%-عا كوتەرىلگەن. ال ءتاتتى سۋسىنداردى شەكتەن تىس تۇتىنۋ دۇرىس تاماقتانۋ سالتىنا جاتپايتىنىن بالالار بىلە بەرمەۋى مۇمكىن. سوندىقتان جاس ۇرپاقتىڭ دەنساۋلىعىنا اتا-انا، ۇستاز بولىپ بىرىگىپ ءمان بەرۋىمىز كەرەك، – دەيدى قوعامدىق دەنساۋلىق ساقتاۋ ۇلتتىق ورتالىعىنىڭ بالالار مەن جاستاردىڭ دەنساۋلىعىن نىعايتۋ ءبولىمىنىڭ باس مامانى جانسايا حاميت.