مەگاپوليستە «كوشباسشىلىق جانە تۇراقتى دامۋ» IV رەسپۋبليكالىق دەنساۋلىق ساقتاۋ باسشىلارىنىڭ فورۋمى ءوتتى. وعان الماتى قالاسى اكىمىنىڭ ورىنباسارى اسەم ءنۇسىپوۆا قاتىسىپ، ءسوز سويلەدى.
«قازاقستاننىڭ دەنساۋلىق ساقتاۋ مەنەدجەرلەرىنىڭ قاۋىمداستىعى» رەسپۋبليكالىق قوعامدىق بىرلەستىگىنىڭ ۇيىمداستىرۋىمەن وتكەن القالى جيىندا وتاندىق جەتەكشى ساراپشىلارمەن بىرگە، گارۆارد ۋنيۆەرسيتەتى (اقش)، كينگس كوللەدجى (ۇلىبريتانيا) سياقتى بەدەلدى وقۋ جانە زەرتتەۋ مەكەمەلەرىنىڭ الەمدىك دەڭگەيدەگى جەتەكشى ماماندارى، سونداي-اق گەرمانيادان كەلگەن ساراپشىلار دا ءسوز الىپ، تاجىريبەلەرىمەن ءبولىسىپ، حالىقارالىق جانە جاھاندىق دەڭگەيدەگى ادىس-تاسىلدەرىن ۇسىندى.
فورۋمنىڭ نەگىزگى ماقساتى – دەنساۋلىق ساقتاۋ سالاسىنداعى جۇمىستاردىڭ تيىمدىلىگىن ارتتىرۋعا، ونىڭ باسشىلارى اراسىندا كوشباسشىلىقتى نىعايتۋعا جانە قازىرگى زامانعى سىن-قاتەرلەر جاعدايىندا سالانى ورنىقتى دامىتۋعا باعىتتالعان ستراتەگيالار مەن شەشىمدەردى ازىرلەۋ.
ءيا، دەنساۋلىق ساقتاۋ سالاسىن زامان كوشىنەن قالماي سۇيرەۋ ءۇشىن جاڭاشىل باسشى كەرەك ەكەنى داۋسىز. بۇل باعىتتا جەتەكشىنىڭ كوشباسشىلىق قاسيەتى ۇلكەن ءرول اتقارادى. كادر بىلىكتىلىگى، ينفراقۇرىلىم ساپاسى دا كوپ ماسەلەنى شەشەدى. فورۋم تورىندە دەنساۋلىق ساقتاۋ سالاسىنداعى باسشىلاردىڭ كوشباسشىلىق قاسيەتتەرى مەن قۇزىرەتتەرى؛ مەديسينالىق قىزمەتكەرلەردىڭ مارتەبەسىن قولداۋداعى باسشىلاردىڭ ءرولى؛ دەنساۋلىق ساقتاۋ سالاسىنداعى ستراتەگيالىق جوسپارلاۋ؛ ءتيىمدى مەنەدجمەنت تاجىريبەسى، ياعني ءساتتى كەيستەر تالقىلاندى.
سونداي-اق، مەديسينا مەكەمەلەرى ينفراقۇرىلىمىنىڭ قازىرگى احۋالى، كادرل تاپشىلىعى جانە مەديسينالىق قىزمەتتەردىڭ ساپاسىن ارتتىرۋ جولدارى قاۋزالدى. ءيا، بۇگىندە ەلىمىزدەگى دەنساۋلىق ساقتاۋ عيماراتتارىنىڭ 49،3%-ى توزعان، باسىم كوپشىلىگى جارتى عاسىر بۇرىن سالىنعان. كەي وڭىرلەردە مەديسينالىق جابدىقتاردىڭ جەتىسپەۋشىلىگى دە وزەكتى تاقىرىپقا اينالعان.
فورۋمدا مەديسينالىق قىزمەت ساپاسىن باقىلاۋ جانە ستاندارتتاۋ تاقىرىبى دا كوتەرىلدى. ماسەلەن، سپيكەرلەر كوپتەگەن مەملەكەتتىك كلينيكالاردا پاسيەنتتەرگە ساپالى قىزمەت كورسەتۋگە ارنالعان باقىلاۋ جۇيەسىنىڭ السىزدىگىن العا تارتتى. ال جەكەمەنشىك سەكتوردا بۇل باعىتتاعى جۇمىستار ايتارلىقتاي جاقسى جولعا قويىلعان دەگەن پىكىردە.
فورۋم قاتىسۋشىلارى مەملەكەتتىك-جەكەمەنشىك ارىپتەستىك، جەكە ينۆەستورلار ارقىلى اۋىلدىق جەرلەردەگى دەنساۋلىق ساقتاۋ دەڭگەيىن كوتەرۋ، مەديسينالىق مەكەمەلەردىڭ تولىقتاي سيفرلاندىرىلۋى ماسەلەسىن دە كوتەردى.
جالپى، اتالعان فورۋم ءبىلىم مەن تاجىريبە الماسۋعا، سونداي-اق ەلىمىزدە مەديسينانى دامىتۋدىڭ بولاشاق باعىتتارىن تالقىلاۋعا ارنالعان بىرەگەي پلاتفورماعا اينالا ءبىلدى.
– مەن بۇل فورۋمعا بيىل ەكىنشى مارتە قاتىسىپ وتىرمىن. ناقتى جول كورسەتەتىن، باعدار بەرەتىن القالى جيىن. جاسىراتىنى جوق، قازىرگى كۇنى كرەديتورلىق بەرەشەگى بار مەديسينا مەكەمەلەرى از ەمەس. بۇل جاعداي ءبىزدىڭ دە باسىمىزدا بار. بۇگىن وسى ماسەلە دە، ودان شىعۋ جولدارى دا تالقىلاندى. ءبىز بەرەشەگىمىزدەن قۇتىلۋدى وسىدان ەرتەرەك باستاپ كەتكەنبىز. شىنى كەرەك، شالعاي اۋىلدارعا، شاعىن قالالارعا جاس ماماندار كەلە بەرمەيدى. ولار وقۋدى بىتىرە سالىپ جۇمىسىن بىردەن الىپ شاھارلاردا باستاعىسى كەلەدى. ال نەگىزىندە تاجىريبە جيناقتاۋ ءۇشىن شاعىن ەمحانا، اۋرۋحانالاردان باستاۋ ماڭىزدى. كوپ وڭىردە بالالار دارىگەرلەرى جەتىسپەيدى. بۇل دا بۇگىنگى پروبلەما. مەديسينالىق قىزمەتتىڭ ساپاسى تومەن بولسا، ناۋقاستار تاراپىنان ارىز-شاعىم دا كوپ بولادى. ءبىز بىلىكتى مامانداردى 160 مىڭ تۇرعىنى بار جاڭاوزەن قالاسىنا ارنايى شاقىرىپ، جالاقىسىنا قوسا ۇستەماقى تولەپ، باسپانا بەرىپ، قاتارىمىزعا تارتتىق. ولار ءقازىر وزىمىزدەگى مامانداردى زاماناۋي اپپاراتتاردىڭ ءتىلىن مەڭگەرۋگە ۇيرەتىپ جاتىر. بيىل جىل سوڭىنا دەيىن كرەديتورلىق بەرەشەگىمىزدەن تولىقتاي قۇتىلامىز دەپ وتىرمىز. ماقساتىمىز – تۇرعىندارعا ساپالى قىزمەت كورسەتۋ، – دەيدى فورۋم قوناعى، جاڭاوزەن (ماڭعىستاۋ وبلىسى) قالالىق كوپبەيىندى اۋرۋحانا ديرەكتورىنىڭ ەمدەۋ ءىسى جونىندەگى ورىنباسارى مارات ەدىلحانوۆ.