ەلىمىزدە سارى مايعا سۇرانىس ارتقان

ءبىراق ءوندىرىس ازايعان.

بيىل قازاقستاندا سارى ماي ءوندىرىسىنىڭ كولەمى بىلتىرعىمەن سالىستىرعاندا 12،6%-كە تومەندەپ، باعاسى 15% قىمباتتاعان، دەپ حابارلايدى Almaty-akshamy.kz Energyprom.kz-كە سىلتەمە جاساپ.

وڭىرلەر بويىنشا سارى ماي باعاسى ماڭعىستاۋ وبلىسىندا كۇرت قىمباتتاپ، جىل باسىنان بەرى 29%-كە وسكەن.

جالپى، ەل بويىنشا قاڭتار-شىلدە ارالىعىندا 13،9 مىڭ توننا سارى ماي ءوندىرىلدى. بۇل بىلتىرعى كەزەڭمەن سالىستىرعاندا 12، 6 پايىزعا كەم. قاڭتار-مامىر ارالىعىندا وتاندىق وندىرۋشىلەر سارى مايعا دەگەن سۇرانىستىڭ 71 پايىزىن قامتاماسىز ەتتى. وتكەن جىلى بۇل كورسەتكىش 83،6% بولدى. ناتيجەسىندە يمپورت بىردەن 83،5%-عا ارتتى.

شىلدە ايىنىڭ قورىتىندىسى بويىنشا، تۇزدالماعان سارى مايدىڭ باعاسى ءبىر ايدا 1،2 پروسەنتكە، ءبىر جىلدا 17 پايىزعا وسكەن. جىل باسىنان بەرگى ءوسىم 14،7%-دى قۇرادى.

تۇزدالماعان سارى مايدىڭ ءبىر كەلىسىنىڭ ەلدەگى ورتاشا باعاسى 3،3 مىڭ تەڭگە شاماسىندا. ءىرى قالالار ىشىندە پاۆلوداردا ءبىر كەلى ماي باعاسى 2،7 مىڭ تەڭگە، ال اتىراۋدا 4،3 مىڭ تەڭگەگە جەتتى.

جىل باسىنان بەرى باعانىڭ شارىقتاۋى ماڭىستاۋ وبلىسىندا تىركەلدى، باعا بىردەن 29%-عا ارتتى. ەكىنشى ورىندا شىمكەنت قالاسى (26،7%) مەن جامبىل وبلىسى (26،4%) تۇر. ال نۇر-سۇلتان (3%) قالاسى مەن الماتى (5،6%) جانە پاۆلودار (7،2%) وبلىستارىندا باعا بىرتىندەپ كوتەرىلىپ جاتىر.