قارجىلىق مونيتورينگ اگەنتتىگىنىڭ ءتوراعاسى دميتريي مالاحوۆتىڭ تاپسىرماسى بويىنشا «قارجى پيراميدالارىنا قارسى ءىس-قيمىل» ارنايى جوباسى ىسكە قوسىلدى.
بۇگىندە IT قۇرالدارىن پايدالانا وتىرىپ، قارجى پيراميدالارىنىڭ قۇرىلعان ساتىنەن باستاپ، ەرتە انىقتاۋ ءۇشىن الەۋمەتتىك جەلىلەرگە تالداۋ جۇرگىزىلىپ جاتىر، دەپ حابارلايدى Almaty-akshamy.kz
«بيىل بۇعاتتاۋعا 600 مىڭ ادام اۋديتوريانى قامتىعان، مىڭعا جۋىق قارجى پيراميدالارىنىڭ بەلگىلەرى بار سايتتار مەن شوتتاردىڭ سىلتەمەسى جىبەرىلدى. تەك سوڭعى التى ايدا ينتەرنەت جەلىسىندە 36 قارجى پيراميداسى انىقتالدى. ولار بويىنشا «WhatsApp»، «Telegram» جانە «Instagram» الەۋمەتتىك جەلىلەرىندە 200 چات انىقتالعان. بۇگىنگى تاڭدا 182 چات بۇعاتتالدى»، - دەلىنگەن حابارلامادا.
وسىلايشا، 126 مىڭ ازاماتتىڭ ودان ءارى قارجىلىق شىعىندارىنىڭ الدى الىندى. 73 مىڭ اۋديتورياسى بار 7 ءىرى شەتەلدىك جوبا بويىنشا سوتقا دەيىنگى تەرگەۋ باستالدى (Eolus، نيسا، GPIBS، داري پولۋچاي، چارويت، Carhomi، Beefre). ءبىر پيراميدا بويىنشا سوت ۇكىمى بار (Eolus-ۇكىم 23.02.2024 ج. شىعارىلدى).
سونىمەن قاتار ولاردى تولىعىمەن جويۋ ءۇشىن اگەنتتىك قارجى پيراميدالارىن ۇيىمداستىردى دەگەن كۇدىكتىلەردىڭ ورنالاسقان جەرى جايلى اقپاراتپەن تمد بويىنشا ارىپتەستەرىن حاباردار ەتتى.
«ارىپتەس ەلدەرمەن ءوزارا ءىس-قيمىل تمد ەلدەرىنىڭ سالىقتىق (قارجىلىق) تەرگەپ-تەكسەرۋ ورگاندارىنىڭ ۇيلەستىرۋ كەڭەسى جانىنان قما باستاماسى بويىنشا ارنايى جۇمىس توبىن قۇرۋدىڭ ارقاسىندا مۇمكىن بولدى»، - دەلىنگەن حابارلامادا.
ايتا كەتۋ كەرەك، قارجى پيراميدالارى – ءالى دە قارجىلىق ينۆەستيسيالار سالاسىنداعى قىلمىستىق كورىنىستىڭ ەڭ ءقاۋىپتى مودەلدەرىنىڭ ءبىرى. ولاردىڭ تارالۋى ازاماتتاردىڭ قارجىلىق جاعدايىنا نۇقسان كەلتىرەدى.
مامانداردىڭ ايتۋىنشا، ازاماتتار قارىزعا كىرىپ، كوتەرمە نەسيە الادى، قىلمىس پەن سۋيسيدكە بارادى. مۇنىڭ ءبارى قوعامداعى الەۋمەتتىك شيەلەنىسكە اكەلەدى، ال قىلمىستىق ەلەمەنتتەر ودان پايدا تابۋدى جالعاستىرۋدا. وسىعان بايلانىستى، قما قارجى پيراميداسىن قۇرعانى ءۇشىن قىلمىستىق جاۋاپكەرشىلىك كوزدەلگەنىن جانە مۇلكى تاركىلەنىپ، 10 جىلعا دەيىنگى مەرزىمگە باس بوستاندىعىنان ايىرۋ جازاسى كوزدەلگەنىن ەسكەرتەدى.