ەلىمىزدە قارجى پيراميدالارىنا قاتىستى جۇمىس تاسىلدەرى جەتىلدىرىلۋدە

بيىل 28 قارجى پيراميداسىن ۇيىمداستىرۋشىلارعا قاتىستى 33 قىلمىستىق ءىس تىركەلدى.

قارجىلىق مونيتورينگ اگەنتتىگى قارجى پيراميدالارىنا قاتىستى جۇمىس تاسىلدەرىن جەتىلدىرۋدە، دەپ حابارلايدى Almaty-akshamy.kz قازاقپاراتقا سىلتەمە جاساپ.

اتاپ ايتقاندا، اناليتيكالىق قۇرالداردى كەڭىنەن قولدانۋ ارقىلى «جازالاۋشى» پوستفاكتورلىق ادىستەن پروفيلاكتيكالىق ادىسكە كوشۋ جۇزەگە اسىرىلدى. سونىمەن قاتار قولدانىستاعى زاڭناماعا قارجى پيراميدالارىن جارنامالاعانى ءۇشىن قىلمىستىق جاۋاپكەرشىلىك ەنگىزىلدى. قارجى پيراميدالارىنىڭ قىزمەتىن جارنامالايتىن سايتتاردى بۇعاتتاۋدىڭ تەتىگى ازىرلەندى.

«قابىلدانعان شارالاردىڭ ارقاسىندا 3 مىڭنان استام وسىنداي سايتتار بۇعاتتاۋعا جىبەرىلدى. بيىل بارلىعى 28 قارجى پيراميداسىن ۇيىمداستىرۋشىلارعا قاتىستى قىلمىستىق كودەكستىڭ 217-بابى بويىنشا 33 قىلمىستىق ءىس تىركەلگەن»، - دەپ جازدى ۆەدومستۆودان.

سوت 7 قىلمىستىق ءىستى قاراپ، ولار بويىنشا 11 ادام سوتتالدى، ونىڭ ىشىندە 1-ەۋى شەت مەملەكەتتىڭ (ۋكراينا) ازاماتى.

«بارلىق تۇلعالارعا ناقتى مەرزىمگە – 3 جىلدان 6 جىل 8 ايعا دەيىن باس بوستاندىعىنان ايىرۋ جازاسى تاعايىندالدى. بۇل رەتتە 7 ادام 5 جىلعا باس بوستاندىعىنان ايىرىلدى. قما ازاماتتاردى اسا ساق بولۋعا جانە ولاردى قارجىلىق پيراميدالارعا تارتاتىن الاياقتاردىڭ ايلا-امالىنا تۇسپەۋگە شاقىرادى»، - دەلىنگەن حابارلامادا.